ប្រជាពលរដ្ឋក្រីក្រមួយចំនួន ដែលបានពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ថាមិនទាន់ទទួលបានប្រាក់ឧបត្ថម្ភនៅឡើយ
គិតចាប់តាំងពីថ្ងៃ ២៨វិច្ឆិកា ឆ្នាំ២០២០ រហូតដល់ថ្ងៃទី១៥ ធ្នូនេះ មានរយៈពេល១៣ថ្ងៃហើយ នៃការឆ្លងរាលដាលវីរុសកូវីដ១៩ ចូលក្នុងសហគមន៍ជាដំបូងបង្អស់នៅកម្ពុជា។ មានប្រជាពលរដ្ឋមួយចំនួនដែលអះអាងថាមានជីវភាពក្រីក្រ ជាអ្នកដែលជាប់ពាក់ព័ន្ធនឹងព្រឹត្តការណ៍សហគមន៍២៨វិច្ឆិកា បានត្អូញត្អែរថា ខ្លួនមិនបានទទួលប្រាក់ឧបត្ថម្ភដូចដែលប្រមុខរដ្ឋាភិបាលបានលើកឡើងថា នឹងផ្តល់ប្រាក់ឧបត្ថម្ភជូនពួកគាត់ ចំនួន ២០ ០០០រៀល ក្នុងមួយថ្ងៃ ដែលរយៈពេល១៥ថ្ងៃ មានចំនួន ៣០ម៉ឺនរៀលក្នុងមួយគ្រួសារៗ។
ចុះផ្សាយនៅថ្ងៃ៖
ស្តាប់ - ០២:២៧
ទោះជាមានការលើកឡើងពីប្រមុខរដ្ឋាភិបាលក្រោយប្រទេសកម្ពុជាបានប្រឈមនូវព្រឹត្តិការណ៍ឆ្លងជំងឺកូវីដចូលសហគមន៍ថ្ងៃទី២៨វិច្ឆិកា ថានឹងមានប្រាក់ឧបត្ថម្ភដល់អ្នកធ្វើចត្តាឡីស័ក ដែលជាបង្គោលគ្រួសារ មានជីវភាពខ្សត់ខ្សោយក៏ដោយ ក៏មកទល់ពេលនេះ មានពលរដ្ឋខ្មែរមួយចំនួន ក្នុងនោះក៏មានអ្នកមានលំនៅដ្ឋានតាមខេត្ត ហើយមកធ្វើការនៅភ្នំពេញដែរ បានអះអាងថាពួកគេមិនបានទទួលថវិកាអ្វីទាំងអស់ខណៈកំពុងធ្វើចត្តាឡីស័ក។
ទោះយ៉ាងណាគេមិនអាចបញ្ជាក់ពីស្ថាប័នជំនាញបាននៅឡើយទេថា នីតិវិធីក្នុងជ្រើសរើស និងលក្ខខណ្ឌ ក្នុងការផ្តល់ប្រាក់ឧបត្ថម្ភសម្រាប់អ្នកធ្វើចត្តាឡីស័កនៅទូទាំងប្រទេសដោយរបៀបណាទេ!
ក៏ប៉ុន្តែ នៅក្នុងក្របខណ្ឌរាជធានីភ្នំពេញ លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រាប់វិទ្យុបារាំងអន្តរជាតិ RFIនៅថ្ងៃនេះថា នីតិវិធីនៃការផ្តល់ប្រាក់ឧបត្ថម្ភ ជូនទៅប្រជាពលរដ្ឋក្រីក្រ/គ្រួសារក្រីក្រ ដែលមានជីវភាពខ្សត់ខ្សោយ នៅរាជធានីភ្នំពេញ ដែលពាក់ព័ន្ធនឹងព្រឹត្តិការណ៍ ២៨វិច្ឆិកា ត្រូវមានលក្ខណៈសម្បត្តិ ៤យ៉ាង ទី១ត្រូវជាអ្នកពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា ទី២ជាអ្នកដែលបានធ្វើតេស្តរកវីរុសកូវីដ១៩ ទី៣ អ្នកដែលបានធ្វើតេស្តរកវីរុសកូវីដ១៩ហើយអវិជ្ជមាន និងទី៤ជាគ្រួសារ ដែលមានជីវភាពខ្សត់ខ្សោយរកមួយថ្ងៃសម្រាប់ចំណាយ១ថ្ងៃប៉ុណ្ណោះ។
គួរបញ្ជាក់ដែរថា ការធ្វើចត្តាឡីស័ក គឺមានតែរយៈពេល ១៤ថ្ងៃប៉ុណ្ណោះ តែរដ្ឋាភិបាលកម្ពុជាគិតជូន១៥ថ្ងៃ ព្រោះចង់លើកទឹកចិត្តដល់គ្រួសារក្រីក្រ ដែលបានចូលខ្លួនធ្វើចត្តាឡីស័ក ដើម្បីទប់ស្កាត់ការរីករាលដាលវីរុសកូវីដ១៩ទៅក្នុងសហគមន៍។ នេះបើតាមលោកម៉េត មាសភក្តី។
ជាមួយគ្នានេះដែរ ចំពោះថវិកាដែលប្រមុខរដ្ឋាភិបាលកម្ពុជា បានដាក់ចេញ និងទម្លាក់ជូន នៅរាជធានីភ្នំពេញ គឺធ្វើឡើងទៅតាមមន្រ្តីមូលដា្ឋន ដែលមានចំនួន ១០៥សង្កាត់។ ហើយមន្ត្រីមូលដ្ឋានទាំងនោះ ត្រូវចាំបាច់នាំយកសាច់ប្រាក់ចំនួន ៣០ ០០០ម៉ឺនរៀល ឬអាចមានជាសំភារៈឧបភោគ បរិភោគបន្ថែម ទៅចែកជូនគ្រួសារក្រីក្រ ដែលបានធ្វើចត្តាឡីស័កនៅតាមផ្ទះរៀងៗខ្លួន មុន និងក្នុងអំឡុងពេលធ្វើចត្តាឡីស័កតែម្តង។
គួររម្លឹកជូនដែរថា កាលពីថ្ងៃទី៣០ ខែវិច្ឆិកា ឆ្នា២០២០ ប្រមុខរដ្ឋាភិបាលលោកហ៊ុន សែន បានសម្រេចទម្លាក់ថវិកាចំនួន១ពាន់លានរៀលទៅកាន់រាជធានី ខេត្តទូរទាំងប្រទេស ព្រមទាំងបានកំណត់ផ្តល់ថវិកាជួយពលរដ្ឋក្រីក្រដែលធ្វើចត្តាឡីស័ក ម្នាក់២ម៉ឺនរៀល/ថ្ងៃ ក្នុងរយៈពេល ១៥ថ្ងៃ ដែលថវិកាសរុបទទួលបាន ៣០ ម៉ឺនរៀល ក្នុងមួយគ្រួសារៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ