ធនាគារADB បន្តព្យាករថា សេដ្ឋកិច្ចកម្ពុជានឹងធ្លាក់ចុះ-៤%នៅក្នុងឆ្នាំ២០២០នេះដោយសារវិបត្តិកូវីដ១៩
ធនាគារអភិវឌ្ឍន៏អាស៊ីADBនៅថ្ងៃព្រហស្បតិ៍ម្សិលមិញនេះ បានបង្ហាញការព្យាករណ៍ជាថ្មីនៃសេដ្ឋកិច្ចកម្ពុជាដែលនឹងធ្លាក់ចុះដល់ទៅ-៤ភាគរយនៅក្នុងឆ្នាំ២០២០នេះ ដោយសារតែវិបត្តិរីករាលដាលនៃជំងឺកូវីដ១៩។ ការព្យាករណ៍ចុងក្រោយនេះ គឺខុសពីការព្យាករណ៍រដ្ឋាភិបាលកម្ពុជាដែលបានអះអាងថា សេដ្ឋកិច្ចកម្ពុជានឹងអាចធ្លាក់ចុះ-១.៩ភាគរយ។ ជាការកត់សម្គាល់ ការព្យាករណ៍សេដ្ឋកិច្ចខ្លួនឯងរបស់រដ្ឋាភិបាលកម្ពុជា គឺប្រហាក់ប្រហែលគ្នានឹងធនាគារពិភពលោកដែលបានវាយតម្លៃថា សេដ្ឋកិច្ចកម្ពុជានឹងធ្លាក់ចុះ-២ភាគរយ។
ចុះផ្សាយនៅថ្ងៃ៖
ស្តាប់ - ០២:២៥
លោក David Freedman សេដ្ឋវិទូរបស់ធនាគារអភិវឌ្ឍន៍អាស៊ីADB ប្រចាំនៅប្រទេសកម្ពុជាបានអះអាងថា សេដ្ឋកិច្ចកម្ពុជានឹងធ្លាក់ចុះក្នុងរង្វង់-៤.០ភាគរយនៅក្នុងឆ្នាំ២០២០នេះ ប៉ុន្តែកម្ពុជានឹងមានកំណើនសេដ្ឋកិច្ចស្ទុះឡើងវិញក្នុងរង្វង់៥.៤ ភាគរយនៅឆ្នាំ ២០២១។ ការព្យាករណ៍ជាថ្មីនេះ គឺដូចគ្នានឹងការព្យាករណ៍របស់ធនាគារអភិវឌ្ឍន៍អាស៊ីADB កាលពីខែកញ្ញា ឆ្នាំ២០២០កន្លងទៅ។ លោក David Freedman បានវិភាគថា កម្ពុជាកំពុងធ្វើពិពិធកម្មសមត្ថភាពនាំចេញរបស់ខ្លួនដែលនេះ គឺជាគន្លឹះនៃកំណើននាពេលអនាគតពីព្រោះកំណើនរបស់កម្ពុជាត្រូវបានអ្នកជំនាញសេដ្ឋកិច្ចរូបនេះអះអាងថា កើតឡើងដោយផ្អែកលើការបើកចំហពាណិជ្ជកម្ម។
នៅចំពោះមុខការព្យាករណ៍ចុងក្រោយរបស់ធនាគារADBនេះ រដ្ឋាភិបាលកម្ពុជានៅតែរក្សាការព្យាករណ៍លើសេដ្ឋកិច្ចរបស់ខ្លួនដូចលើកមុនដដែល ពោល គឺកម្ពុជាវាយតម្លៃថា សេដ្ឋកិច្ចនឹងធ្លាក់ចុះមក-១.៩ភាគរយនៅក្នុងឆ្នាំ២០២០នេះដោយសារតែវិបត្តិកូវីដ១៩ ហើយនៅក្នុងឆ្នាំ២០២១ សេដ្ឋកិច្ចកម្ពុជានឹងងើបមកវិញក្នុងរង្វង់៣.៥ភាគរយ។ លោកមាស សុខសេនសាន្ត អ្នកនាំពាក្យក្រសួងសេដ្ឋកិច្ចកម្ពុជាបានគូសបញ្ជាក់ថា ការព្យាករណ៍ខុសគ្នារវាងធនាគារADB និងរដ្ឋាភិបាលកម្ពុជានេះ គឺដោយសារតែប្រើប្រាស់វិធិសាស្រ្តផ្សេងគ្នា។ លោកថា ការវាយតម្លៃរបស់រដ្ឋាភិបាលកម្ពុជា គឺពឹងផ្អែកទៅលើការប្រមូលទិន្នន័យជាក់ស្តែងក៏ដូចជាការមើលឃើញពីការបន្តកើនឡើងនៃនាំចេញរបស់កម្ពុជា ជាពិសេស ការនាំចេញទៅទីផ្សារអាមេរិក។
ត្បិតថាខុសគ្នាជាមួយADB ប៉ុន្តែការព្យាករណ៍របស់រដ្ឋាភិបាលកម្ពុជានេះ គឺប្រហាក់ប្រហែលគ្នានឹងការព្យាករណ៍របស់ធនាគារពិភពលោក។ ធនាគារពិភពលោកកាលពីអំឡុងខែកញ្ញា បានប៉ាន់ប្រមាណថា សេដ្ឋកិច្ចកម្ពុជានៅក្នុងឆ្នាំនេះ គឺនឹងធ្លាក់ចុះ-២ភាគរយ។ រីឯ មូលនិធិរូបិយវត្ថុអន្តរជាតិIMF ធ្លាប់បានព្យាករណ៍ថា សេដ្ឋកិច្ចនឹងធ្លាក់ចុះ -១.៥ភាគរយ។
សូមបញ្ជាក់ថា ក្រៅពីប្រទេសកម្ពុជា ប្រទេសជិតខាងកម្ពុជាមានថៃ និងឡាវក៏ត្រូវបានព្យាករពីសេដ្ឋកិច្ចធ្លាក់ចុះដែរនៅក្នុងឆ្នាំ២០២០នេះ។ សេដ្ឋកិច្ចប្រទេសថៃ នឹងធ្លាក់ចុះទៅដល់-៧.៨ភាគរយ ខណៈប្រទេសឡាវនឹងធ្លាក់ចុះ-២.៥ភាគរយ ដោយសារតែវិបត្តិកូវីដ១៩។ ប៉ុន្តែសេដ្ឋកិច្ចប្រទេសវៀតណាមវិញ បែរជាមានការកើនឡើង២.៣ភាគរយ ខណៈនៅឆ្នាំ២០២១នឹងកើនដល់៦.១ភាគរយ។ នេះបើតាមការព្យាករណ៍របស់ធនាគារអភិវឌ្ឍន៍អាស៊ីADB៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ