អង្គការសិទ្ធិមនុស្សធំៗ៣ ស្នើឲ្យរដ្ឋាភិបាលចាត់វិធានការចាំបាច់ ដើម្បីការពារអ្នកជាប់ឃុំអំឡុងពេលកូវីដ១៩
អង្គការជាតិ និងអន្តរជាតិចំនួន៣ គឺអង្គការលើកលែងទោសអន្តរជាតិ (Amnesty International) អង្គការឃ្លាំមើលសិទ្ធិមនុស្ស (Human Rights Watch) និងអង្គការការពារសិទ្ធិមនុស្ស LICADHO នៅថ្ងៃទី៩ ខែធ្នូនេះ បានស្នើឲ្យរដ្ឋាភិបាលកម្ពុជា ចាត់វិធានការឲ្យបានឆាប់ ដើម្បីការពារសិទ្ធិទទួលបានសេវាសុខភាពរបស់អ្នកជាប់ឃុំ ក្នុងពន្ធនាគារ និងមន្ត្រីពន្ធនាគារ។ ការស្នើសុំនេះ បានធ្វើឡើងបន្ទាប់ពីអ្នកគ្រប់គ្រងពន្ធនាគារជាន់ខ្ពស់មានវិជ្ជមានកូវីដ១៩ ខណៈដែលកម្ពុជាកំពុងប្រឈមនឹងការឆ្លងកូវីដ១៩ក្នុងសហគមន៍។
ចុះផ្សាយនៅថ្ងៃ៖
ស្តាប់ - ០១:៣២
ផ្តើមចេញពីការឆ្លងមេរោគកូវីដ១៩ ទៅលើលោក ឆែម សាវុធ អគ្គនាយកពន្ធនាគារក្រសួងមហាផ្ទៃ ក្រុមអង្គការ ដែលធ្វើការទាក់ទងទៅនឹងសិទ្ធិមនុស្សទាំង៣ បានឲ្យដឹងថាអ្នកជាប់ឃុំនៅកម្ពុជាអាចមានហានិភ័យខ្ពស់ក្នុងការឆ្លងជំងឺកូវីដ១៩ ដោយសារមន្ត្រីពន្ធនាគារ ដែលបានចុះទៅធ្វើការនៅពន្ធនាគារនានា មានជាប់ពាក់ព័ន្ធនឹងមេរោគកូវីដ១៩។
ដោយសារពន្ធនាគារនៅក្នុងប្រទេសកម្ពុជាមានភាពចង្អៀតណែនខ្លាំង កង្វះនូវការទទួលបានសេវាថែទាំនិងព្យាបាលជំងឺ ក៏ដូចជាតម្រូវការជាមូលដ្ឋានដូចជា សាប៊ូ និងទឹកស្អាត ដើម្បីអនុវត្តវិធានការអនាម័យ អ្នកជាប់ឃុំក្នុងពន្ធនាគារនៅកម្ពុជាជិត ៤ម៉ឺននាក់ គឺកំពុងតែប្រឈមយ៉ាងខ្លាំងពីការឆ្លងវីរុសកូវីដ១៩ ដែលអាចបណ្ដាលឱ្យមានការស្លាប់បាត់បង់ជីវិតដោយសារការឆ្លងវីរុសនេះ។ នេះបើតាមអង្គការទាំង៣។
ក្រៅពីនេះអង្គការជាតិ និងអន្តរជាតិទាំងនេះ បានលើកឡើងផងដែរ នូវការទទួលបានសិទ្ធិការពារសុខភាពរបស់អ្នកជាប់ឃុំ ដូចជាអ្នកនៅក្នុងសហគមន៍ខាងក្រៅដែរ។ ការរំលឹករបស់អង្គការសុខភាពពិភពលោក កាលពីខែមីនាឆ្នាំ២០២០ ឲ្យរដ្ឋាភិបាលប្រទេសនីមួយៗ ពិចារណាលើការដោះលែងអ្នកជាប់ឃុំ ដែលប្រឈមនឹងហានិភ័យខ្ពស់ក្នុងការឆ្លងវីរុសកូវីដ១៩ វិបត្តិភាពចង្អៀតណែនខ្លាំងនៅក្នុងពន្ធនាគារ ដែលជាបញ្ហាប្រឈមធំ ក្នុងពេលមានការរីករាលដាលនៃវីរុសកូវីដ១៩ និងបញ្ហាប្រឈមមួយចំនួនទៀតក៏ត្រូវបានដាក់បញ្ចូលក្នុងសេចក្តីថ្លែងការណ៍នេះដែរ។
ជុំវិញការលើកឡើងរបស់អង្គការជាតិ និងអន្តរជាតិទាំង៣នេះ អគ្គនាយកដ្ឋានពន្ធនាគារ មិនទាន់មានការឆ្លើយតបយ៉ាងណានៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ