អ្នកការពារសិទ្ធិមនុស្សថាការបង្ហាញអត្តសញ្ញាណអ្នកដែលឆ្លងកូវីដ១៩ប៉ះពាល់ដល់សិទ្ធិឯកជន
អ្នកការពារសិទ្ធិមនុស្សនៅកម្ពុជាបានហៅវិធានការចុងក្រោយដែលក្រសួងសុខាភិបាលបង្ហាញអត្តសញ្ញាណបុគ្គល ដែលឆ្លងកូវីដ១៩នោះ ថាជំហានគួរឲ្យព្រួយបារម្ភ ហើយដែលប៉ះពាល់ដល់សិទ្ធិឯកជនរបស់បុគ្គល។ ការលើកឡើងយ៉ាងដូច្នេះ បន្ទាប់ពីប្រមុខរដ្ឋាភិបាលកម្ពុជា កាលពីថ្ងៃទី០៥ធ្នូ បានអនុញ្ញាតឱ្យក្រសួងសុខាភិបាលបង្ហាញអត្តសញ្ញាណអ្នកជំងឺកូវីដ១៩ ដើម្បីឱ្យអ្នកពាក់ព័ន្ធទៅធ្វើតេស្ត និងអនុវត្តវិធានការចត្តាឡីស័ក ចៀសវាងការចម្លងទៅក្រុមគ្រួសារ ឬសហគមន៍។
ចុះផ្សាយនៅថ្ងៃ៖
ស្តាប់ - ០២:០៥
«រដ្ឋាភិបាលមានកាតព្វកិច្ចក្នុងការគោរពនិងការពារទាំងសិទ្ធិខាងសុខភាពនិងសិទ្ធិមានឯកជនភាពរបស់បុគ្គល»។ នេះជាការលើកឡើងរបស់លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជានៅថ្ងៃទី៧ធ្នូនេះ។
តែជាមួយគ្នានេះ លោកស្រីទទួលស្គាល់ថា មានការប្រឈមកិច្ចការដ៏លំបាកមួយ ដែលរដ្ឋាភិបាលមានបំណងទប់ស្កាត់ការរីករាលដាលជំងឺឆ្លងនេះ ហើយលោកស្រីក៏ចូលរួមគាំទ្រដល់កិច្ចប្រឹងប្រែងទប់ស្កាត់នេះតាមតែអាចធ្វើទៅបាន។
យ៉ាងណាក្តី អ្នកការពារសិទ្ធិមនុស្សរូបនេះបានហៅ«វិធានការចុងក្រោយដែលតម្រូវឱ្យមានការបង្ហាញនូវអត្តសញ្ញាណបុគ្គល ដោយលម្អិតទាំងរូបថត ជាដើម ជាជំហានគួរឲ្យព្រួយបារម្ភ ហើយដែលប៉ះពាល់ដល់សិទ្ធិឯកជនរបស់បុគ្គល»។
បើតាម លោកស្រី ចក់ សុភាព ការដែលគ្រាន់តែបញ្ជាក់ពីទីតាំងនិងលម្អិតពីស្ថានភាពនៃទំនាក់ទំនងរវាងអ្នកវិជ្ជមាននិងទីតាំងដែលបុគ្គលនោះបានប្រាស្រ័យទាក់ទងគឺគ្រប់គ្រាន់ដើម្បីឱ្យអ្នកទាំងឡាយអាចចូលរួមទប់ស្កាត់ ហើយព័ត៌មានបន្ថែម គឺស្ថាប័នទទួលបន្ទុកអាចមានសិទ្ធិប្រមូលនិងផ្ទុកឯកសារទាំងនោះ។ នេះគឺអាចជៀសបានហានិភ័យ បង្កជាការរើសអើង។ល។ ដល់អ្នកដែលត្រូវបានស្ថាប័នបង្ហាញអត្តសញ្ញាណនោះ។
និយាយដល់ការរើសអើងនេះ លោកបណ្ឌិត ប៉ា ច័ន្ទរឿន លើកឡើងដែរថា គេគួរចាត់ទុកអ្នកជំងឺកូវីដ១៩ គឺជាជនរងគ្រោះ ព្រោះគ្មានអ្នកណាម្នាក់ចង់ឆ្លងជំងឺនេះឡើយ។
បើតាមអ្នកវិភាគបញ្ហាសង្គមរូបនេះ តិចឬច្រើនវាប៉ះពាល់ទៅដល់សិទ្ធិឯកជនភាពរបស់បុគ្គលចំពោះការបង្ហាញអត្តសញ្ញាណជនដែលឆ្លងកូវីដ១៩។តែលោកមិនជំទាស់នឹងចំណាត់ការនេះទេដោយសារតែសង្គមយើងនៅខ្វះយន្តការតាមដានរកប្រភពអ្នកចម្លងជំងឺ និងថាការបង្ហាញអត្តសញ្ញាណបែបនេះជាវិធីសាស្ត្រមួយដើម្បីទប់ស្កាត់ការចម្លងកាន់តែច្រើនទៅក្នុងសហគមន៍។
កាលពីថ្ងៃទី០៥ធ្នូ ប្រមុខរដ្ឋាភិបាលកម្ពុជា តាមរយៈសារលើបណ្តាញសង្គមហ្វេសបុករបស់លោក បានអនុញ្ញាតឱ្យក្រសួងសុខាភិបាល បង្ហាញអត្តសញ្ញាណអ្នកជំងឺកូវីដ១៩ ដើម្បីឱ្យអ្នកពាក់ព័ន្ធផ្ទាល់ ឬប្រយោលត្រូវទៅធ្វើតេស្តរកវីរុសកូវីដ១៩ និងអនុវត្តវិធានការចត្តាឡីស័កឱ្យបានត្រឹមត្រូវ ចៀសវាងការចម្លងទៅក្រុមគ្រួសារ ឬសហគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ