គ.ជ.ប ប្តឹងមន្រ្តីជាន់ខ្ពស់បក្សLDPម្នាក់ទៅកាន់តុលាការ បន្ទាប់ពីមន្រ្តីនោះហៅគ.ជ.បថា ជា«ចោរ»
គណៈកម្មាធិការជាតិរៀបចំការបោះឆ្នោត(គ.ជ.ប)នៅរសៀលថ្ងៃចន្ទនេះ បានសម្រេចដាក់ពាក្យបណ្តឹងទៅកាន់សាលាដំបូងរាជធានីភ្នំពេញប្តឹងលោកអ៊ី សាំងឡេង អនុប្រធានគណបក្សសម្ព័ន្ធដើម្បីប្រជាធិបតេយ្យ(LDP) បន្ទាប់ពីមន្រ្តីរូបនេះបានហៅស្ថាប័នគ.ជ.បថា ជា«ចោរ»ពាក់ព័ន្ធនឹងដំណើរការចុះឈ្មោះបោះឆ្នោត និងអ្នកសង្កេតការណ៍បោះឆ្នោត។
ចុះផ្សាយនៅថ្ងៃ៖
ស្តាប់ - ០១:៣០
តាមរយៈសេចក្តីប្រកាសព័ត៌មានរបស់ខ្លួន គណៈកម្មាធិការជាតិរៀបចំការបោះឆ្នោត(គ.ជ.ប)បានប្តឹងលោកអ៊ី សាំងឡេង ៣ បទល្មើស គឺបទបរិហារកេរ្តិ៍ជាសាធារណៈ ជេរប្រមាថជាសាធារណៈ និងបទ ញុះញង់ឱ្យប្រព្រឹត្តបទឧក្រិដ្ឋជាអាទិ៍។ លោកអ៊ី សាំងឡេង តាមរយៈការផ្សាយលើទំព័រហ្វេសប៊ុករបស់គណបក្សបសម្ព័ន្ធដើម្បីប្រជាធិបតេយ្យ បានចាត់ទុកសកម្មភាពខ្លះនៃការចុះឈ្មោះបោះឆ្នោតរបស់គ.ជ.បថា ជាសកម្មភាពចោរ ជាចោរបំផ្លាញជាតិដោយអនុវត្តផែនការចុះឈ្មោះមនុស្សដោយខុសច្បាប់ ដើម្បីធានាថាបរទេសនៅតែអាចត្រួតត្រាខ្មែរបាន។ នេះបើតាមការដកស្រង់របស់គ.ជ.ប។
សម្រាប់គ.ជ.ប ការលើកឡើងរបស់អនុប្រធានគណបក្សLDPនេះ គឺជាទង្វើបរិហារកេរ្តិ៍ បំផ្លើសពីការពិតដែលនាំឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ស្ថាប័នរៀបចំការបោះឆ្នោតរបស់ជាតិ។ តាមគ.ជ.ប ទង្វើទាំងនេះ គឺជាបទល្មើសព្រហ្មទណ្ឌដែលអ្នកប្រព្រឹត្តត្រូវទទួលទោសតាមច្បាប់ជាធរមាន។
ជុំវិញការប្តឹងនេះ គណបក្សសម្ព័ន្ធដើម្បីប្រជាធិបតេយ្យមិនទាន់មានប្រតិកម្មយ៉ាងណានៅឡើយទេ។ លោកចិន ថុន អគ្គលេខាធិការគណបក្សបានអះអាងប្រាប់វិទ្យុបារាំងអន្តរជាតិនៅល្ងាចថ្ងៃចន្ទនេះថា គណបក្សកំពុងរង់ចាំមើលចំណាត់ការបន្តទៅទៀតរបស់គ.ជ.ប និងបោះជំហានទៅតាមក្រោយ។ បន្ថែមលើបញ្ហានេះ លោកចិន ថុន បានគូសបញ្ជាក់ថា គ.ជ.ប ត្រូវតែដោះស្រាយបញ្ហាបណ្តឹងនានាដែលប្តឹងដោយគណបក្សLDPឱ្យបានត្រឹមត្រូវ ដើម្បីបញ្ចប់បញ្ហាចម្រូងចម្រាស និងជម្លោះរវាងគ.ជ.ប និងLDP៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ