ទិវា១០ធ្នូ៖ សង្គមស៊ីវិលខ្លះរៀបចំតាមអនឡាញ និងខ្លះទៀតពន្យារពេល
អង្គការសង្គមស៊ីវិលខ្លះ នឹងប្រារព្ធខួប៧២ឆ្នាំនៃទិវាសិទ្ធិមនុស្ស១០ធ្នូនៅពេលខាងមុខ តាមរយៈការប្រជុំគ្នាតាមអនឡាញ ចំណែកអង្គការ និងសមាគមមួយចំនួនទៀត ពន្យារប្រារព្ធទិវានេះ។ ការបត់បែនយ៉ាងដូច្នេះ គឺដោយសារតែអាជ្ញាធរពាក់ព័ន្ធមិនអនុញ្ញាតឲ្យមានការជួបជុំមនុស្សច្រើនឡើយ ដើម្បីទប់ស្កាត់ការឆ្លងរាលដាលកូវីដ១៩នៅក្នុងសហគមន៍បន្ថែមទៀត។
ចុះផ្សាយនៅថ្ងៃ៖
ស្តាប់ - ០២:០៥
លោក ថេង សាវឿន ជាប្រធានបណ្តាញសហគមន៍កសិករបានប្រាប់វិទ្យុបារាំងអន្តរជាតិ RFI នៅថ្ងៃអាទិត្យនេះថា ការប្រារព្ធទិវាសិទ្ធិមនុស្ស១០ធ្នូនៅតែធ្វើទៅបានតាមរយៈការប្រជុំគ្នាតាមអនឡាញ ដោយមានវាគ្មិនជជែកគ្នាតាមបណ្តាញសង្គម ព្រមគ្នាជាមួយការផ្សាយផ្ទាល់ដោយមានប្រធានបទផ្សេងៗគ្នា។ ចំណែកប្រជាពលរដ្ឋនៅតាមសហគមន៍ ពួកគេនឹងជួបជុំគ្នាក្រោម២០នាក់ ដោយអនុវត្តទៅតាមវិធានសុខាភិបាល។ ហើយអ្វីដែលជាសារ ឬជាកង្វល់របស់ប្រជាហគមន៍ ពួកគេនឹងត្រូវលើកឡើងតាមបដាផ្សេងៗ។
គួររំឭកថា នៅមុនមានព្រឹត្តិការណ៍សហគមន៍២៨វិច្ឆិកា ក្រុមអង្គការសង្គមស៊ីវិលបានស្នើរៀបចំទិវាសិទ្ធិមនុស្សនៅទីលានប្រជាធិបតេយ្យដោយគ្រោងមនុស្សចូលរួម១៥០០នាក់។
ជាមួយគ្នានេះ លោក វន់ ពៅ ប្រធានសមាគមប្រជាធិតេយ្យឯករាជ្យនៃសដ្ឋកិច្ចក្រៅប្រព័ន្ធដែលគ្រោងប្រារព្ធទិវា១០ធ្នូនៅក្រុងប៉ោយប៉ែត ក៏បានបញ្ជាក់ថា លោកនឹងពន្យាពេលរៀបចំពិធីនេះទៅថ្ងៃទី២០ធ្នូវិញ។
ការផ្លាស់ប្ដូរបត់បែនបែបនេះ គឺដោយសារតែ កាលពីថ្ងៃទី៣០វិច្ឆិកា អាជ្ញាធរខេត្តបន្ទាយមានជ័យនិងអាជ្ញាធររាជធានីភ្នំពេញបានបញ្ជាក់ជំហរដូចគ្នាថា មិនអនុញ្ញាតឲ្យមានការជួបជុំមនុស្សច្រើនក្នុងការរៀបចំទិវាសិទ្ធិមនុស្ស១០ធ្នូខួបលើកទី៧២នៅពេលខាងមុខទេ។ ហេតុផលរបស់អាជ្ញាធរគឺដើម្បីបង្កាទប់ស្កាត់ការឆ្លងរាលដាលកូវីដ១៩នៅក្នុងសហគមន៍បន្ថែមទៀត ខណៈជំងឺនេះកំពុងរាលដាលទៅក្នុងសហគមន៍មិនទាន់អាចគ្រប់គ្រងបាន។
ដោយផ្អែកលើបញ្ហាកូវីដ១៩ អាជ្ញាធររាជធានីភ្នំពេញ បានស្នើឲ្យខាងអង្គការសង្គមស៊ីវិលដែលគ្រោងជួបជុំមនុស្ស១៥០០នាក់នៅទីលានប្រជាធិបតេយ្យនោះ ពន្យាពេលប្រារព្ធទិវានេះ។ បើតាមអាជ្ញាធររាជធានីភ្នំពេញ នៅពេលដែលស្ថានភាពអាចគ្រប់គ្រងបាន អង្គការសង្គមស៊ីវិលអាចដាក់លិខិតស្នើសុំប្រារព្ធទិវាសិទ្ធិមនុស្ស១០ធ្នូនេះសារជាថ្មី។
ដោយឡែកអាជ្ញាធរខេត្តបន្ទាយមានជ័យវិញ មិនត្រឹមតែមិនអនុញ្ញាតឲ្យក្រុមលោក វន់ ពៅ លោក មឿន តុលា និងលោក ឌិន ពុទ្ធី រៀបចំទិវាសិទ្ធិមនុស្សនៅក្រុងប៉ោយប៉ែតប៉ុណ្ណោះទេ គឺថែមទាំងបានព្រមានចាត់វិធានការតាមផ្លូវច្បាប់ ប្រសិនបើមានការជួបជុំ។ នេះយោងតាមលិខិតរបស់អាជ្ញាធរខេត្តបន្ទាយមានជ័យនៅថ្ងៃទី៣០វិច្ឆិកា២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ