ការឆ្លងកូវីដ-១៩ទៅក្នុងសហគមន៍៖ លោក ហ៊ុន សែន បង្ខំចិត្តលះបង់សេដ្ឋកិច្ចខ្លះជាថ្នូរនឹងអាយុជីវិតពលរដ្ឋ
លោកនាយករដ្ឋមន្ដ្រី ហ៊ុន សែន តាមសារបទអន្តរាគមន៍រយៈពេលជាង២០នាទី កាលពីយប់ថ្ងៃសៅរ៍ទី០៤ធ្នូ បានរឹតបន្តឹងផ្នែកខ្លះនៃសេដ្ឋកិច្ចដើម្បីកាត់បន្ថយការចម្លងវីរុសកូវីដ-១៩ចូលក្នុងសហគមន៍។ បើតាមលោកនាយករដ្ឋមន្ដ្រី ការលះបង់សេដ្ឋកិច្ចខ្លះនាពេលនេះ ធ្វើឡើងក្នុងបំណងជួយជីវិតពលរដ្ឋកម្ពុជាដែលប្រឈមនឹងវិបត្តិកូវីដ-១៩។
ចុះផ្សាយនៅថ្ងៃ៖ កែប្រែថ្ងៃទី៖
ការលះបង់ខ្លះដើម្បីអាយុជីវិតរបស់ពលរដ្ឋកម្ពុជា ដែលលោក ហ៊ុន សែន លើកឡើងនេះ សំដៅដល់ការរឹតបន្ដឹងការធ្វើចត្តាឡីស័ករបស់ធុរជនដែលកន្លងមកមានត្រឹម២ថ្ងៃ ដោយពន្យារពេលធ្វើចត្តាឡីស័ករហូតដល់១៤ថ្ងៃ។ លោកបញ្ជាក់ថា ការណ៍នេះ អាចនឹងប៉ះពាល់ដល់ដំណើរការរបស់ក្រុមហ៊ុនក្នុងស្រុក ប៉ុន្តែមានតែមធ្យោបាយនេះទេ ដែលអាចការពារអាយុជីវិតពលរដ្ឋ ក្នុងពេលដែលកម្ពុជាកំពុងប្រឈមនឹងការរីករាលដាលកូវីដ-១៩នៅក្នុងសហគមន៍។
ទោះបីជាក្រុមអ្នកជំនាញរកមិនទាន់ឃើញប្រភពចម្លងនៃការឆ្លងចូលសហគមន៍ក៏ដោយ តែលោកនាយករដ្ឋមន្ត្រី ហ៊ុន សែន មានជំនឿចិត្តថា តិចឬច្រើន ការឆ្លងកូវីដ-១៩មកក្នុងប្រទេសកម្ពុជា មួយផ្នែកគឺបណ្ដាលមកពីការធ្វើចត្តាឡីស័កមិនបានពេញលេញពីសំណាក់ជនបរទេសនិងធុរ:កិច្ចមួយចំនួននេះឯង។
នៅចំពោះមុខការឆ្លងចូលសហគមន៍ លោក ហ៊ុន សែន បានសុំចិត្តអ្នកដែលពាក់ព័ន្ធនឹងព្រឹត្តិការណ៍២៨វិច្ឆិកាដែលមានជាង២០នាក់ បង្ហាញភាពស្មោះត្រង់ថា ខ្លួនមានជាប់ពាក់ព័ន្ធនឹងអ្នកណាខ្លះ ទីតាំងណាខ្លះ ដើម្បីផ្ដាច់ឫសគល់នៃការឆ្លងចូលសហគមន៍ ព្រោះប្រសិនបើមិនដូច្នោះទេ វានឹងនាំមកនូវភាពមហន្តរាយដល់សុខភាពសាធារណៈ។
ជាមួយគ្នានេះ ប្រមុខរដ្ឋាភិបាលកម្ពុជា បានឯកភាពឲ្យមានការបញ្ចេញអត្តសញ្ញាណនៃអ្នកឆ្លងកូវីដ-១៩ ដើម្បីឲ្យពលរដ្ឋប្រុងប្រយ័ត្ននិងដើម្បីទប់ស្កាត់និងរកឃើញអ្នកឆ្លងកូវីដ-១៩ឲ្យបានទាន់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ