ស្ថានទូតស៊ុយអែតប្រចាំកម្ពុជាប្រកាសបិទទ្វារនៅចុងឆ្នាំ២០២១
រដ្ឋាភិបាលនៃប្រទេសស៊ុយអែតប្រកាសនៅថ្ងៃទី២៦វិច្ឆិកា ម្សិលមិញថា ស្ថានទូតរបស់ខ្លួនប្រចាំនៅទីក្រុងភ្នំពេញ(ជាន់ទី១០នៃអគារភ្នំពេញថោវ័រ)នឹងត្រូវបិទទ្វារនៅចុងឆ្នាំ២០២១។ ប្រទេសដែលជាគំរូខាងការគោរពសិទ្ធិមនុស្សមួយនេះបានអះអាងថាស៊ុយអែតដែលធ្លាប់មានទំនាក់ទំនងល្អជាមួយកម្ពុជានោះនឹងបន្តការងារនេះតាមតាមវិធីថ្មី។ សម្រាប់មន្ត្រីសិទ្ធិមនុស្សនៅក្នុងស្រុកខ្មែរសំដែងការសោកស្តាយ។តែអ្នកនាំពាក្យក្រសួងការបរទេសកម្ពុជា អះអាងថា ការបិទស្ថានទូតនេះ មិនប៉ះពាល់ដល់ទំនាក់ទំនងរវាងកម្ពុជានិងស៊ុយអែតទេ។
ចុះផ្សាយនៅថ្ងៃ៖
ស្តាប់ - ០២:២១
នៅពេលស្ថានទូតស៊ុយអែតនៅទីក្រុងភ្នំពេញត្រូវបិទទ្វារនៅចុងឆ្នាំ២០២១ នោះឯកអគ្គរដ្ឋទូតស៊ុយអែតប្រចាំនៅទីក្រុងបាងកកនឹងរ៉ាប់រងការងារទូតនៅប្រទេសកម្ពុជាថែមទៀត ហើយសកម្មភាពការងារជាមួយក្រសួងការបរទេសក៏ត្រូវផ្ទេរទៅស្ថានទូតស៊ុយអែតនៅទីក្រុងបាងកកផងដែរ។ នេះបើតាមការប្រកាសរបស់ក្រសួងការបរទេសស៊ុយអែត នៅថ្ងៃទី២៦វិច្ឆិកា២០២០។
ដូច្នេះនឹងមិនមានបុគ្គលិកផ្នែកការទូតប្រចាំការនៅកម្ពុជាទៀតហើយ តែថាកិច្ចសហប្រតិបត្តិការអភិវឌ្ឍន៍នឹងបន្តអនុវត្តដោយអង្គការស៊ុយអែតឈ្មោះស៊ីដា។
បើតាមប្រទេសស៊ុយអែត ការផ្លាស់ប្តូរទាំងនេះ គឺជាផ្នែកមួយនៃការសម្របខ្លួន ទៅតាមស្ថានភាពជាក់ស្តែងនៃអង្គការចាត់តាំងរបស់ខ្លួននៅឯបរទេស ហើយថានេះគឺជាដំណើរការផ្លាស់ប្តូរដោយទៀតទាត់មួយដែលប្រទេសស៊ុយអែត ពេលខ្លះបើក ឬបិទស្ថានទូត និងស្ថានកុងស៊ុលរបស់ខ្លួន ស្របតាមតម្រូវការជាក់ស្តែង។
យ៉ាងណាក៏ដោយសម្រាប់មន្ត្រីសិទ្ធិមនុស្សនៅក្នុងស្រុកខ្មែរសំដែងការសោកស្តាយ។ សោកស្តាយពីព្រោះថា តាំងពីក្រោយកិច្ចព្រមព្រៀងសន្តិភាពទីក្រុងប៉ារីស២៣តុលាមក មានបណ្តារប្រទេសលោកសេរីជាច្រើនបានចំណាយថវិកាអស់ជាច្រើនម៉ឺន-លានដុល្លារ ជួយជ្រោមជ្រែងកម្ពុជា ឲ្យមានរបបដឹកនាំតាមបែបលទ្ធិប្រជាធិបតេយ្យសេរីពហុបក្ស គោរពសិទ្ធិមនុស្ស និងការអភិវឌ្ឍន៍។នេះជាការលើកឡើងរបស់ សឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក។
សូមបញ្ជាក់ថា ទំនាក់ទំនងការទូតរវាងកម្ពុជា និងស៊ុយអែតបានបង្កើតឡើងតាំងពីឆ្នាំ១៩៦១ គឺការងារទូតត្រូវបានធ្វើឡើងតាមរយៈស្ថានទូតរបស់ខ្លួនប្រចាំនៅបាងកក ពោលស្ថានទូតស៊ុយអែតនៅកម្ពុជាទើបបង្កើតឡើងនៅឆ្នាំ២០១០។
រយៈពេល១០ឆ្នាំមកនេះ ស៊ុយអែតដែលជាសមាជិករបស់សហភាពអឺរ៉ុប បានគូសបញ្ជាក់ថា ខ្លួនបានរួមចំណែកយ៉ាងសកម្ម ក្នុងការសម្របសម្រួលបញ្ហានយោបាយ កិច្ចសហប្រតិបត្តិការអភិវឌ្ឍន៍ គោលនយោបាយពាណិជ្ជកម្ម និងវប្បធម៌។
កាលពីខែមិថុនា ស៊ុយអែតបានសម្រេចបង្វែរជំនួយសហប្រតិបត្តិការអភិវឌ្ឍន៍ជាមួយរដ្ឋាភិបាលកម្ពុជា ទៅជាជំនួយលើការគាំទ្រការគោរពសិទ្ធិមនុស្ស លទ្ធិប្រជាធិបតេយ្យវិញ ដោយសំអាងថា លំហប្រជាធិបតេយ្យនៅកម្ពុជាប៉ុន្មានឆ្នាំមកនេះមានការ រឹតត្បិតយ៉ាងធ្ងន់ធ្ងរ។ នេះជាចំណាត់ការមួយរបស់ស៊ុយអែត ស្របពេលសហភាពអឺរ៉ុបបានដកហូតប្រព័ន្ធអនុគ្រោះ (EBA)២០%ពីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ