សេចក្តីព្រាងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ គ្រោងនឹងបញ្ចប់នៅចុងឆ្នាំនេះ
សេចក្តីព្រាងនៃកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង គ្រោងនឹងបញ្ចប់នៅចុងឆ្នាំ២០២០ ខណៈភាគីទាំងពីរកំពុងបន្តចរចាជុំទី៤ នាសប្តាហ៍នេះ។ នេះបើតាមមន្ត្រីក្រសួងពាណិជ្ជកម្ម នៅថ្ងៃទី១៩ ខែវិច្ឆិកានេះ។ កិច្ចប្រជុំតាមប្រព័ន្ធវីដេអូ ដែលធ្វើឡើងរយៈពេល៣ថ្ងៃ ផ្តោតសំខាន់ទៅលើការកំណត់ទូទៅ, បញ្ហាពន្ធ, និងការភ្ជាប់ទៅកាន់ទីផ្សារនៃប្រទេសទាំងពីរ រួមនឹងបញ្ហាមួយចំនួនទៀត។
ចុះផ្សាយនៅថ្ងៃ៖
ស្តាប់ - ០៣:០០
កម្ពុជា និងកូរ៉េខាងត្បូងចាប់ផ្តើមចរចាជាលើកទី៤ លើកិច្ចព្រមព្រៀងពាណិជ្ជកម្មសេរីទ្វេភាគី ដែលធ្វើឡើងរយៈពេល៣ថ្ងៃ គិតចាប់ថ្ងៃពុធ សប្តាហ៍នេះ។ នេះបើតាមរដ្ឋមន្ត្រីពាណិជ្ជកម្មកូរ៉េខាងត្បូង និងត្រូវបានចុះផ្សាយដោយទីភ្នាក់ងារព័ត៌មានកូរ៉េយ៉ុនហាប់ កាលពីថ្ងៃទី១៦ ខែវិច្ឆិកា។
លោក ឡុង កែមវិចិត្រ អ្នកនាំពាក្យក្រសួងពាណិជ្ជកម្ម បានប្រាប់វិទ្យុបារាំងនៅថ្ងៃទី១៩ ខែវិច្ឆិកា នេះថា កម្ពុជាព្យាយាមធ្វើយ៉ាងណាបញ្ចប់ការចរចានៅក្នុងឆ្នាំ២០២០ ប៉ុន្តែគឺអាស្រ័យលើបញ្ហានៅសេសសល់ ហើយបើការចរចានៅជុំទី៤អាចបញ្ចប់នូវបញ្ហា ដែលនៅសេសសល់ និងកំពុងពិភាក្សាបាន នោះការចរចានឹងបញ្ចប់។
លោកបន្ថែមថា បើទោះបីជាបញ្ចប់ការចរចានៅក្នុងឆ្នាំនេះ ក៏ភាគីទាំងពីរមិនអាចចុះកិច្ចព្រមព្រៀងនៅក្នុងឆ្នាំនេះដែរ។ ប៉ុន្តែ កម្ពុជាសង្ឃឹមថានឹងអាចចុះហត្ថលេខាលើកិច្ចព្រមព្រៀងនេះក្នុងពេលឆាប់ៗ ប៉ុន្តែមិនអាចកំណត់ពីពេលវេលាជាក់នាពេលនេះបានទេ។ លោក ឡុង កែមវិចិត្រ បានអះអាងបន្តថា កិច្ចព្រមព្រៀងពាណិជ្ជកម្មសេរីកម្ពុជាកូរ៉េ នឹងបើកទីផ្សារកម្ពុជាបន្ថែមទៀត ក៏ដូចជាជំរុញការនាំចេញទៅកាន់ប្រទេសកូរ៉េខាងត្បូង។
រដ្ឋមន្ត្រីក្រសួងពាណិជ្ជកម្មកូរ៉េខាងត្បូងបានអះអាងថា កិច្ចព្រមព្រៀងពាណិជ្ជកម្មជាមួយប្រទេសកម្ពុជានឹងអនុញ្ញាតឲ្យក្រុមហ៊ុនរកស៊ីរបស់កូរ៉េខាងត្បូង អាចបង្កើនទំហំរបស់ខ្លួនបន្ថែមទៀត ក្នុងទីផ្សាររបស់ប្រទេសអាស៊ីអាគ្នេយ៍ ដែលកំពុងតែមានការលូតលាស់គួរឲ្យកត់សម្គាល់។
ជាការកត់សម្គាល់ កន្លងមកភាគីទាំងពីរបានចរចាជាមួយគ្នាចំនួន៣ដងរូចមកហើយក្នុងឆ្នាំនេះ ហើយភាគីទាំងពីរ គ្រោងនឹងបញ្ចប់សេចក្តីព្រាងនៃកិច្ចព្រមព្រៀងពាណិជ្ជកម្ម នាដំណាច់ឆ្នាំនេះផងដែរ។ កម្ពុជា និងកូរ៉េខាងត្បូងបានផ្តើមសិក្សារួមគ្នាលើកិច្ចព្រមព្រៀងពាណិជ្ជកម្មសេរី កាលពីដើមឆ្នាំ២០២០ រហូតដល់ពាក់កណ្តាលឆ្នាំ ហើយនៅខែកក្កដា ភាគីទាំងពីរបានប្រកាសចរចាកិច្ចព្រមព្រៀងនេះ។
គួរបញ្ជាក់ថានៅឆ្នាំ២០១៩ ទំហំពាណិជ្ជកម្មរវាងកម្ពុជា និងកូរ៉េខាងត្បូង គឺមានប្រមាណ ១.០៣ពាន់លានដុល្លារអាមេរិក ដែលបានកើនឡើងប្រមាណ ៦%ធៀបនឹងឆ្នាំ២០១៨។ កម្ពុជាគឺជាទីផ្សារនាំចេញលំដាប់ទី៥៨របស់កូរ៉េខាងត្បូង។
សូមជម្រាបជូនថា កាលពីថ្ងៃទី១២ ខែ តុលា កន្លងទៅ កម្ពុជា និង ចិន បានចុះ កិច្ចព្រមព្រៀងពាណិជ្ជកម្មសេរីទ្វេភាគីជាផ្លូវការ។ កិច្ចព្រមព្រៀងពាណិជ្ជកម្មសេរីកម្ពុជា-ចិន គឺជាកិច្ចព្រមព្រៀងលើកទី១ហើយដែលកម្ពុជាសម្រេចបានជាមួយបរទេស។ រដ្ឋាភិបាលកម្ពុជារំពឹងថា ក្រោយមានកិច្ចព្រមព្រៀងនេះ ការនាំចេញរបស់កម្ពុជាទៅចិននឹងមានការកើនឡើង២៥%បន្ថែមទៀត។
រដ្ឋាភិបាលកម្ពុជាបានឲ្យដឹងថា ក្រៅពីប្រទេសចិន និង កូរ៉េខាងត្បូងនេះ កម្ពុជាក៏គ្រោងនឹងធ្វើការចរចាយកកិច្ចព្រមព្រៀងពាណិជ្ជកម្មសេរីជាមួយប្រទេសផ្សេងៗទៀត តួយ៉ាង អង់គ្លេស អាមេរិក ជប៉ុន ម៉ុងហ្គោលី ឥណ្ឌា និង សហភាពសេដ្ឋកិច្ចអឺរ៉ាស៊ាន (EAEU)។ ក្រសួងពាណិជ្ជកម្មបានបង្កើតក្រុមការងារ ដើម្បីរៀបចំគោលនយោបាយ និងយុទ្ធសាស្ត្រចរចាជាមួយប្រទេសគោលដៅទាំងអស់នេះរួចរាល់អស់ហើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ