CCHR៖ អាជ្ញាធរមិនលើកទឹកចិត្តឲ្យស្ត្រីអ្នកតវ៉ាប្រើប្រាស់សិទ្ធិប្រមូលផ្តុំដោយសន្តិវិធីនៅទីសាធារណៈឡើយ
នៅព្រឹកថ្ងៃទី១៣ ខែវិច្ឆិកា ម្សិលមិញនេះ មានស្ត្រីអ្នកតវ៉ាប្រហែលជា២០នាក់ ដែលជាសាច់ញាតិរបស់អតីតមន្ត្រីគណបក្សសង្គ្រោះជាតិដែលកំពុងជាប់ឃុំ បានប្រមូលផ្តុំគ្នានៅឯព្រះអង្គដងកើពីមុខព្រះបរមរាជវាំង ដើម្បីបួងសួងសុំឲ្យមានការដោះលែងប្តីនិងឪពុករបស់ពួកគេ។ អ្នកតវ៉ា ក៏មានបំណងដាក់ញត្តិទៅកាន់ព្រះបរមរាជវាំងដើម្បីសុំព្រះរាជអន្តរាគមន៍ពីព្រះមហាក្សត្រដែរ ប៉ុន្តែត្រូវបានរារាំង។
ចុះផ្សាយនៅថ្ងៃ៖
គួរកត់សំគាល់ជូនថា នេះមិនមែនជាលើកទី១នោះទេ ដែលអាជ្ញាធររាជធានីភ្នំពេញ បានរារាំងសកម្មភាពតវ៉ារបស់ក្រុមស្ត្រីប្រហែលជា២០នាក់ ដែលសុទ្ធសឹងជាភរិយារបស់អតីតមន្ត្រីគណបក្សសង្គ្រោះជាតិ ដែលកំពុងជាប់ឃុំនៅក្នុងពន្ធនាគារ។ កាលពីថ្ងៃទី ០៦ វិច្ឆិកា កន្លងទៅ ពួកគេក៏ត្រូវបានសន្តិសុខខណ្ឌរារាំង និងទប់ស្កាត់សកម្មភាពតវ៉ារបស់ពួកគេ មិនអោយយកញត្តិទៅដាក់នៅព្រះបរមរាជវាំង ដើម្បីសុំព្រះរាជអន្តរាគមន៍ពីព្រះមហាក្សត្រកម្ពុជាផងដែរ បន្ទាប់ពីពួកគេបានប្រមូលផ្តុំគ្នាតវ៉ានៅមុខសាលាដំបូងរាជធានីភ្នំពេញ។ ដោយឡែកនៅក្នុងសកម្មភាពតវ៉ាមួយទៀត កាលពីថ្ងៃ សុក្រ ទី១៣ វិច្ឆិកា អ្នកតវ៉ាជាស្ត្រីទាំង២០នាក់ ក៏មានបំណងដាក់ញត្តិទៅកាន់ព្រះបរមរាជវាំងជាលើកទី២ ប៉ុន្តែត្រូវបានសន្តិសុខខណ្ឌរារាំង។ សកម្មភាពនេះ ត្រូវបានមជ្ឈមណ្ឌលសិទ្ធិមនុស្សកម្ពុជាចាត់ទុកថា អាជ្ញាធរមិនលើកទឹកចិត្តឲ្យស្ត្រីអ្នកតវ៉ាប្រើប្រាស់សិទ្ធិសេរីភាពក្នុងការប្រមូលផ្តុំដោយសន្តិវិធីនៅទីសាធារណៈនោះឡើយ ដោយសំអាងថាកំពុងមានការរីករាលដាលនៃជំងឺកូវីដ១៩នៅក្នុងប្រទេស ខណៈតំណាងព្រះបរមរាជវាំង ក៏បានណែនាំពួកគេឲ្យយកញត្តិទៅដាក់នៅរដ្ឋសភា ព្រឹទ្ធសភា ឬខុទ្ទកាល័យនាយករដ្ឋមន្ត្រីជំនួសវិញ។ នេះបើតាមមជ្ឈមណ្ឌលសិទ្ធិមនុស្សកម្ពុជា។
គួរជំរាបជូនថា ចាប់តាំងពីដើមខែមិថុនាឆ្នាំ២០២០មក ក្រុមគ្រួសារសាច់ញាតិរបស់អតីតសមាជិកគណបក្សប្រឆាំង ត្រូវបានអូស ទាញ ទាត់ និងវាយដំ ក្នុងអំឡុងពេលដែលពួកគេ បានតវ៉ាដោយសន្ដិវិធី ដើម្បីអំពាវនាវអោយដោះលែងសមាជិកគ្រួសាររបស់ពួកគេ ដែលគិតមកទល់ពេលនេះ មានអតីតសមាជិកគណបក្សសង្គ្រោះជាតិជិត៣០នាក់ហើយ ដែលត្រូវបានចាប់និងឃុំខ្លួនក្នុងពន្ធនាគារ។ កាលពីថ្ងៃទី ១៤ សីហា ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ប្រចាំនៅកម្ពុជា ក៏បានកត់សំគាល់ដែរថា អាជ្ញាធរកម្ពុជាបានប្រើប្រាស់កម្លាំងហួសប្រមាណដើម្បីទប់ទល់នឹងក្រុមបាតុករដែលភាគច្រើនជាស្ត្រី និងយុវជនកម្ពុជា បើទោះបីជាការជួបប្រជុំនោះ ធ្វើឡើងដោយសន្តិវិធីក្តី។
ការិយាល័យនេះ បានអំពាវនាវឱ្យអាជ្ញាធរពាក់ព័ន្ធរបស់កម្ពុជា គោរពសិទ្ធិរបស់អ្នកតវ៉ាក្នុងការជួបប្រជុំ និងឲ្យការពារអ្នកដែលប្រើប្រាស់សិទ្ធិជួបប្រជុំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ