HRW ស្នើអោយកម្ពុជា ទម្លាក់ចោលសេចក្តីព្រាងច្បាប់ស្តីពី បទល្មើសបច្ចេកវិទ្យាព័ត៌មាន ឬ Cyber Crime Law
អង្គការឃ្លាំមើលសិទ្ធិមនុស្សអន្តរជាតិ Human Right Watch នៅថ្ងៃទី ១៣ វិច្ឆិកា នេះ បានចេញសេចក្តីថ្លែងការណ៍មួយ ដោយអំពាវនាវអោយរដ្ឋាភិបាលកម្ពុជាទម្លាក់ចោលសេចក្តីព្រាងច្បាប់ស្តីពី បទល្មើសបច្ចេកវិទ្យាព័ត៌មាន ឬ Cyber Crime Law។ បើតាម Human Right Watch សេចក្តីព្រាងច្បាប់នេះ នឹងរំលោភលើឯកជនភាពរបស់អ្នកប្រើប្រាស់អ៊ីនធឺណែត និងសេរីភាពនៃការបញ្ចេញមតិតាម Online។
ចុះផ្សាយនៅថ្ងៃ៖
ស្តាប់ - ០២:៣៨
សេចក្តីថ្លែងការណ៍របស់អង្គការឃ្លាំមើលសិទ្ធិមនុស្សអន្តរជាតិ Human Right Watch បានលើកឡើងថា រដ្ឋាភិបាលកម្ពុជា គួរតែទម្លាក់ចោលសេចក្តីព្រាងច្បាប់ស្តីពី បទល្មើសបច្ចេកវិទ្យាព័ត៌មាន ឬ Cyber Crime Law ដោយសារតែច្បាប់នេះនឹងរំលោភលើឯកជនភាពរបស់អ្នកប្រើប្រាស់អ៊ីនធឺណែត ការកើនឡើងនៃការឈ្លបមើលព័ត៌មានរបស់បុគ្គល និងសេរីភាពនៃការបញ្ចេញមតិតាម Online ជាដើម។ តាមរយៈសេចក្តីថ្លែងការណ៍នេះ លោក ប៊្រេដ អាដាម (Brad Adams) នាយកអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ី បានចោទប្រកាន់ថា លោកនាយករដ្ឋមន្ត្រី ហ៊ុន សែន ដែលត្រូវបានគេដឹងជាយូមកហើយថា បានលួចស្ដាប់នូវការសន្ទនាតាមខ្សែទូរសព្ទនិងការជ្រៀតចូលទៅក្នុងសារអ៊ីម៉ែលនោះ នឹងផ្ដល់ភាពស្របច្បាប់បន្ថែមទៀត ដើម្បីបន្តតាមដានកិច្ចសន្ទនាឯកជនរបស់អ្នកដទៃ។
គួរជំរាបជូនថា សេចក្តីព្រាងច្បាប់ស្ដីពីបទល្មើសបច្ចេកវិទ្យាព័ត៌មាន ឬ Cyber Crime Law ដែលរួមមាន៨ជំពូកនិង៥០មាត្រា ត្រូវបានក្រសួងមហាផ្ទៃតាក់តែងឡើងនៅក្នុងឆ្នាំ២០១៦ ហើយបានជួបប្រជុំពិភាក្សាជាបន្តបន្ទាប់ចំនួន៦៨លើករួចមកហើយ។ ដោយកិច្ចប្រជុំទាំងនោះរួមមានទាំងកិច្ចប្រជុំអន្តរក្រសួង កិច្ចប្រជុំជាមួយនាយកដ្ឋានជំនាញរបស់ក្រសួងមហាផ្ទៃ ព្រមទាំងមានជំនួយឧបត្ថមបច្ចេកទេសពីក្រសួងយុត្តិធម៌សហរដ្ឋអាមេរិកផងដែរ។ លោក ប៊ុន ហ៊ុន រដ្ឋលេខាធិការក្រសួងមហាផ្ទៃ ទទួលបន្ទុកក្រុមប្រឹក្សានីតិកម្ម បានថ្លែងនៅក្នុងកិច្ចប្រជុំពិភាក្សាទៅលើសេចក្តីព្រាងច្បាប់នេះ កាលពីថ្ងៃទី ២៥ កញ្ញាថា សេចក្តីព្រាងច្បាប់នេះ ត្រូវបានបង្កើតឡើង ដោយសារតែមានការព្រួយបារម្ភពីបទល្មើសបច្ចេកវិទ្យាកើនឡើង ធ្វើឱ្យប៉ះពាល់ដល់សន្តិសុខជាតិ ប៉ះពាល់ដល់សណ្តាប់ធ្នាប់សារធារណៈ និងប៉ះពាល់ដល់ផលប្រយោជន៍ប្រជាពលរដ្ឋ។ បើតាមខ្លឹមសារនៃកិច្ចប្រជុំកាលនោះ ការផ្តួចផ្តើមបង្កើតសេចក្តីព្រាងច្បាប់នេះឡើង គឺក្នុងគោលបំណងធានាសុច្ចរិតភាព នៃការប្រើប្រាស់ ការគ្រប់គ្រងប្រព័ន្ធកុំព្យូទ័រ ទិន្នន័យកុំព្យូទ័រ និងការពារសន្តិសុខ សណ្តាប់ធ្នាប់សាធារណៈ ព្រមទាំងការការពារសិទ្ធិសេរីភាពបុគ្គល ដើម្បីបង្ការ ទប់ស្កាត់ និងបង្រ្កាប បទល្មើស បច្ចេកវិទ្យាព័ត៌មាន។ ជាងនេះទៅទៀត ច្បាប់នេះមានវិសាលភាពអនុវត្តចំពោះបទល្មើសបច្ចេកវិទ្យាព័ត៌មានដែលប្រព្រឹត្តនៅក្នុងឬក្រៅប្រទេសកម្ពុជា ហើយដែលអំពើនោះធ្វើឲ្យប៉ះពាល់ដល់រូបវន្តបុគ្គល នីតិបុគ្គល សន្តិសុខ សណ្តាប់ធ្នាប់ របៀបរៀបរយសាធារណៈ ឬផលប្រយោជន៍របស់ព្រះរាជាណាចក្រកម្ពុជា។
ទោះជាយ៉ាងនេះក្តី អង្គការឃ្លាំមើលសិទ្ធិមនុស្សអន្តរជាតិ Human Right Watch បានលើកឡើងថា រដ្ឋាភិបាលកម្ពុជា បានទទួលយោបល់ពីសហរដ្ឋអាមេរិកក្នុងការបង្កើតច្បាប់នេះតាំងពីឆ្នាំ២០១៦មែន ប៉ុន្តែរដ្ឋាភិបាលកម្ពុជាមិនដែលបង្ហាញសេចក្តីព្រាងច្បាប់នេះជាសាធារណៈ ឬ ការប្រឹក្សាយោបល់ពីអង្គការសង្គមស៊ីវិល និងអ្នកជំនាញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ