បក្សប្រឆាំងហៅការស្នើសុំសិទ្ធិធ្វើនយោបាយរបស់លោកស្រីលី ស្រីវីណាថាដោយសារការកៀបសង្កត់ពីបក្សកាន់អំណាច
លោកស្រីលី ស្រីវីណា អតីតអ្នកតំណាងរាស្រ្តរបស់អតីតបក្សសង្រ្គោះជាតិបានស្នើសុំសិទ្ធិធ្វើនយោបាយឡើងវិញពីរដ្ឋាភិបាលកម្ពុជា។ ការស្នើសុំនេះ ធ្វើឡើងបន្ទាប់ពីមន្ទីរពេទ្យរបស់លោកស្រីត្រូវបានក្រសួងសុខាភិបាលបង្គាប់ឱ្យបិទទ្វារ។ កាលពីថ្ងៃព្រហស្បតិ៍ លោកស្រីត្រូវបានព្រះមហាក្សត្រប្រទានសិទ្ធិធ្វើនយោបាយឡើងវិញ និង ត្រូវបានអនុញ្ញាតឱ្យធ្វើជាសមាជិករបស់បក្សប្រជាជនកម្ពុជា។ អតីតបក្សប្រឆាំងបានហៅទង្វើរបស់លោកស្រីលី ស្រីវីណានេះថា ធ្វើឡើងក្រោមការកៀបសង្កត់របស់បក្សកាន់អំណាច។ ប៉ុន្តែ បក្សកាន់អំណាចបានទាត់ចោល។
ចុះផ្សាយនៅថ្ងៃ៖
ស្តាប់ - ០២:១៥
លោកអ៊ុំ សំអាន មន្ត្រីជាន់ខ្ពស់នៃអតីតគណបក្សសង្រ្គោះជាតិបានអះអាងប្រាប់វិទ្យុបារាំងអន្តរជាតិនៅព្រឹកថ្ងៃសុក្រនេះថា ការសម្រេចចិត្តរបស់លោកស្រីលី ស្រីវីណា ក្នុងការស្នើសុំសិទ្ធិធ្វើនយោបាយ និងចូលរួមជីវភាពនយោបាយជាមួយគណបក្សប្រជាជនកម្ពុជានេះ គឺធ្វើឡើងដោយបង្ខំចិត្តក្រោមការកៀបសង្កត់ពីគណបក្សកាន់អំណាច។ នេះ គឺដោយសារតែលោកអ៊ំ សំអាន យល់ថា លោកស្រីលី ស្រីវីណា ធ្វើគ្រប់បែបយ៉ាង ដើម្បីការពារមន្ទីរសម្រាកព្យាបាលជំងឺរបស់លោកស្រីដែលត្រូវបានក្រសួងសុខាភិបាលកម្ពុជាបង្គាប់ឱ្យបិទ។
មន្ទីរសម្រាកព្យាបាលរបស់លោកស្រីលី ស្រីវីណា ត្រូវបានក្រសួងសុខាភិបាលកម្ពុជាបង្គាប់ឱ្យបិទទ្វារកាលពីថ្ងៃទី២ ខែវិច្ឆិកា បន្ទាប់ពីមេធាវីម្នាក់បានស្លាប់ក្រោមការព្យាបាលនៅទីនោះ។ រំលងបានប៉ុន្មានថ្ងៃ គឺនៅថ្ងៃទី០៩ វិច្ឆិកា លោកស្រីលី ស្រីវីណា បានស្នើសុំសិទ្ធិធ្វើនយោបាយឡើងវិញតាមរយៈក្រសួងមហាផ្ទៃ និងបានស្នើសុំលោកនាយករដ្ឋមន្រ្តីហ៊ុន សែន ចូលរួមជីវភាពនយោបាយជាមួយបក្សកាន់អំណាច។ នៅថ្ងៃទី១២ ខែវិច្ឆិកា តាមរយៈការស្នើសុំរបស់នាយករដ្ឋមន្រ្តី ព្រះមហាក្សត្រកម្ពុជាបានសម្រេចផ្តល់សិទ្ធិធ្វើនយោបាយឡើងវិញដល់លោកស្រីលី ស្រីវីណា ហើយនៅថ្ងៃដដែលនេះ លោកស្រីក៏ត្រូវបានលោកហ៊ុន សែន អនុញ្ញាតឱ្យចូលជាសមាជិកគណបក្សប្រជាជនកម្ពុជាផងដែរ។
សម្រាប់លោកអ៊ុំ សំអាន ក្នុងស្ថានភាពបែបនេះ លោកស្រីលី ស្រីវីណា គ្មានជម្រើសណាផ្សេងនោះទេ។ លោកគូសបញ្ជាក់ថា លោកស្រីបង្ខំធ្វើដូច្នេះ ដើម្បីអាចបន្តអាជីវកម្មរបស់លោកស្រីតទៅទៀត បញ្ចៀសការប្រឈមមុខនឹងផ្លូវច្បាប់ និង សង្ឃឹមថា មន្ទីរសម្រាកព្យាបាលរបស់លោកស្រីនឹងអាចបើកដំណើរការឡើងវិញឆាប់ៗនាពេលខាងមុខនេះ។
ប៉ុន្តែ លោកសុខ ឥសាន អ្នកនាំពាក្យគណបក្សប្រជាជនកម្ពុជាបានច្រានចោលការចោទប្រកាន់របស់លោកអ៊ុំ សំអាននេះ។ លោកសុខ ឥសាន បានអះអាងថា ការស្នើសុំសិទ្ធិធ្វើនយោបាយ និងការសុំចូលរួមជីវភាពនយោបាយជាមួយបក្សកាន់អំណាច គឺជាការស្ម័គ្រចិត្តបស់លោកស្រី លី ស្រីវីណា មិនមែនមានការបង្ខិតបង្ខំ ឬ គំរាមកំហែង កៀបសង្កត់ពីគណបក្សកាន់អំណាចនោះទេ។
សូមបញ្ជាក់ថា លោកស្រីលី ស្រីវីណា គឺជាមន្រ្តីអតីតបក្សប្រឆាំងទី១៤ហើយដែលបានស្នើសុំសិទ្ធិធ្វើនយោបាយឡើងវិញនៅក្នុងចំណោមមន្រ្តី១១៨នាក់។ លោកស្រី និងមន្រ្តីទាំងអស់នេះ ត្រូវបានតុលាការកំពូលកម្ពុជា សម្រេចផ្អាកសិទ្ធិធ្វើនយោបាយរយៈពេល៥ឆ្នាំ ដោយសារតែជាប់ពាក់ព័ន្ធនឹងការចង់ផ្តួលរំលំរដ្ឋាភិបាលកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ