ក្រសួងសុខាភិបាលរកឃើញករណីកូវីដ១៩លើមន្ដ្រី៣រូប ពាក់ព័ន្ធនឹងប្រតិភូហុងគ្រី
ក្រសួងសុខាភិបាលកម្ពុជា នៅព្រលប់ថ្ងៃចន្ទទី៩វិច្ឆិកា បានប្រកាសពីការរកឃើញករណីវិជ្ជមានកូវីដ១៩ ចំនួន៣ករណីថ្មីបន្ថែមទៀត។ ករណីទាំង៣ចុងក្រោយនេះ រកឃើញលើមន្ដ្រីកម្ពុជា ដែលបានប្រាស្រ័យទាក់ទងជាមួយប្រតិភូរដ្ឋមន្ដ្រីហុងគ្រីដែលមកបំពេញទស្សនកិច្ចនៅកម្ពុជាកាលពីថ្ងៃទី០៣វិច្ឆិកាសប្ដាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ករណីកូវីដ១៩ដែលរកឃើញថ្មីទាំង៣ករណី កើតលើមន្ដ្រីរបស់កម្ពុជាចំនួនពីររូប៖ ទី១គឺលោក សួស យ៉ារ៉ា តំណាងរាស្ត្រ និងទី២ គឺលោក ស ចិត្រា ដែលជាអគ្គលេខាធិការរងនៃក្រសួងកសិកម្ម រុក្ខាប្រមាញ់និងនេសាទ។ ចំណែក១ករណីទៀត កើតលើបុរសជនជាតិហុងគ្រីមួយរូប ដែលជាអគ្គរដ្ឋទូតហុងគ្រីសម្រាប់កម្ពុជានិងវៀតណាម។
បើតាមក្រសួងសុខាភិបាល អ្នកជំងឺដែលរកឃើញថ្មីនេះ ត្រូវបានដាក់ឲ្យសម្រាកនៅមន្ទីរពេទ្យមិត្តភាពខ្មែរសូវៀតរួចរាល់ហើយ។ ក្រសួងដដែលបញ្ជាក់ថា នៅក្នុងព្រឹត្តិការណ៍៣វិច្ឆិកា ក្រសួងបានរកឃើញករណីវិជ្ជមានកូវីដ១៩ចំនួន៤ករណី ក្នុងពេលដែលការយកសំណាកអ្នកប៉ះពាល់ទៅធ្វើតេស្តលើកទី២កំពុងតែរង់ចាំលទ្ធផល។
សូមបញ្ជាក់ថា ពាក់ព័ន្ធនឹងដំណើរទស្សនកិច្ចរបស់ប្រមុខការទូតហុងគ្រីដែលមានជំងឺកូវីដ១៩នេះ កម្ពុជាបានដាក់មនុស្សរាប់រយនាក់ឲ្យនៅដាច់ដោយឡែក ដោយសារតែបានប្រាស្រ័យដោយផ្ទាល់ និងមិនផ្ទាល់ជាមួយប្រតិភូប្រទេសហុងគ្រីដែលមកបំពេញទស្សកិច្ចនៅកម្ពុជា កាលពីថ្ងៃទី០៣វិច្ឆិកា។
ជាការកត់សម្គាល់ មុនករណីថ្មីទាំង៣នេះ កម្ពុជាបានរកឃើញអង្គរក្សខ្មែរម្នាក់ដែលការពារឲ្យប្រតិភូហុងគ្រី មានផ្ទុកកូវីដ១៩។ លោកនាយករដ្ឋមន្ដ្រី ហ៊ុន សែន បានបង្ហាញពីក្ដីបារម្ភចំពោះករណីនេះ និងទទូចឲ្យពលរដ្ឋទាំងអស់ប្រុងប្រយ័ត្ន ដើម្បីធានាថា មិនមានការឆ្លងកូវីដ១៩ក្នុងសហគមន៍។ ដោយក្ដីបារម្ភដែរ អាជ្ញាធរពាក់ព័ន្ធនៅកម្ពុជានាថ្ងៃអាទិត្យទី០៨វិច្ឆិកា បានបញ្ជាឲ្យបិទ KTV ក្លឹបកម្សាន្ត រោងភាពយន្ត និងសារមន្ទីរនៅទូទាំងប្រទេស ដើម្បីបង្ការកូវីដ១៩។ ការបិទដំណើរការក៏មានផងដែរសម្រាប់សាលារៀននៅទីក្រុងភ្នំពេញនិងទីរួមខេត្តកណ្ដាលក្នុងរយៈពេល២សប្ដាហ៍។ ចំណែកកន្លែងហាត់កីឡាដែលមានលក្ខណៈប្រមូលផ្ដុំក៏ដូចគ្នា ជាពិសេសពហុកីឡដ្ឋានជាតិអូឡាំពិក ចាប់ពីថ្ងៃជូនដំណឹងនាពេលនេះ រហូតដល់មានការជូនដំណឹងជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ