លោក អោ អាន អតីតតួអង្គស្នូលនៃសំណុំរឿង០០៤វគ្គ២ ស្លាប់ក្នុងវ័យ៨៧ឆ្នាំ
លោក អោ អាន អតីតកម្មាភិបាលខ្មែរក្រហម បានស្លាប់កាលពីរសៀលថ្ងៃសុក្រទី៦វិច្ឆិកាក្នុងអាយុ៨៧ឆ្នាំ នៅខេត្តបាត់ដំបង។ រហូតមកទល់ខែសីហាឆ្នាំ២០២០ អោ អាន ជាតួអង្គស្នូលនៃសំណុំរឿង០០៤វគ្គ២ ប៉ុន្តែតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សម្រេចផាត់ចេញសំណុំរឿងរបស់គាត់ដោយមិនបញ្ជូនទៅកាត់ទោស។
ចុះផ្សាយនៅថ្ងៃ៖
ស្តាប់ - ០២:០៨
លោក អោ អាន ដែលមានស្រុកកំណើតនៅ ភូមិតាំងស្វាយ ឃុំពាម ស្រុកកំពង់ត្រឡាច ខេត្តកំពង់ឆ្នាំង គឺជាអតីតកម្មាភិបាលខ្មែរក្រហមម្នាក់ដែលត្រូវបានសាលាក្តីខ្មែរក្រហមបើកការស៊ើបអង្កេតអស់រយៈពេល១៣ឆ្នាំ។
នៅថ្ងៃទី១០ខែសីហាឆ្នាំ២០២០ អង្គជំនុំជម្រះ តុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបញ្ចប់សំណុំរឿង ប្រឆាំង អោ អាន នៅចំពោះមុខ អង្គជំនុំជម្រះវិសាមញ្ញ។ អង្គជំនុំជម្រះតុលាការកំពូល បានពិចារណាឃើញថា៖ «បើទោះបីជាមានការឯកភាពគ្នាពាក់ព័ន្ធនឹងចំនួនជនរងគ្រោះជាច្រើន នៅក្នុងភូមិភាគកណ្តាល» នៃកម្ពុជាប្រជាធិបតេយ្យក៏ដោយ «ក៏ពុំមានការឯកភាពគ្នាឡើយ បន្ទាប់ពីរយៈពេ ល១៣ឆ្នាំនៃកិច្ចស៊ើបសួរ ដែលថា អោ អាន ស្ថិត ក្នុងយុត្តាធិការរបស់ អ.វ.ត.ក ឬយ៉ាងណា»។
អង្គជំនុំជម្រះតុលាការកំពូលបានសម្រេចថា៖ «ក្នុងករណីដែលពុំមានដីកាបញ្ជូនរឿងទៅជំនុំជម្រះដែលជាក់លាក់ និងអាច អនុវត្តបាននោះ ដូចនេះរឿងក្តីប្រឆាំងនឹង អោ អាន ត្រូវបញ្ចប់នៅចំពោះមុខ អ.វ.ត.ក»។ ទាំងនេះគឺជាការគូសបញ្ជាក់របស់លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម។
អ្នកនាំពាក្យដដែលបានបញ្ជាក់ថា នៅថ្ងៃទី១៤ ខែសីហា ឆ្នាំ២០២០ សហចៅក្រមស៊ើបអង្កេតបានចេញដីកាបង្គាប់រួមគ្នា ឲ្យបោះត្រា និងបញ្ចូលសំណុំរឿង ០០៤/២ ទៅក្នុងបណ្ណសារ បន្ទាប់ពីអង្គជំនុំជម្រះតុលាការកំពូលបានចេញសេចក្តីសម្រេច បញ្ចប់សំណុំរឿងនេះកាលពីថ្ងៃទី ១០ ខែសីហា ឆ្នាំ២០២០ រួចមក។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម ដែលបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃអាទិត្យទី០៨វិច្ឆិកានេះថា ការស្លាប់របស់ លោក អោ អាន មិនស្ថិតក្នុងដែនយុត្តាធិការរបស់សាលាក្តីខ្មែរឡើយ។ សូមរំឮកថា ក្រោយរបបខ្មែរក្រហមបិទបញ្ចប់នៅឆ្នាំ១៩៧៩ អតីតមេដឹកនាំជាន់ខ្ពស់ខ្មែរក្រហមបានស្លាប់ជាបន្តបន្ទាប់គ្នា ក្នុងនោះរួមមាន៖ លោក អៀង សារី និងប្រពន្ធគាត់ អៀង ធីឬទ្ធិ ស្លាប់មុនការកាត់ទោស។ ចំណែកលោក នួន ជា និង កាំង ហ្គិចអ៊ាវ ហៅឌុច ស្លាប់នៅពេលកាត់ទោសរួច។ រហូតមកទល់ពេលនេះគឺនៅសល់តែ លោក ខៀវ សំផន ម្នាក់ទេ ដែលនៅរស់ ខណៈតុលាការបានកាត់ទោសអស់មួយជីវិតរួចហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ