ក្រសួងអប់រំអនុញ្ញាតឲ្យគ្រឹះស្ថានសិក្សាទាំងអស់ បើកដំណើរការឡើងវិញ ជាដំណាក់ការទី៣
សាលារៀនសាធារណៈទាំងអស់ នឹងបើកដំណើរការឡើងវិញ ចាប់ពីថ្ងៃទី២ ខែវិច្ឆិកា នេះ ហើយការបើកដំណើរការឡើងវិញនេះ ជាដំណាក់កាលទី៣ បន្ទាប់ពីក្រសួងអប់រំសង្កេតឃើញថា គ្រឹះស្ថានសិក្សាបានអនុវត្តបានល្អ ក្នុងបរិការណ៍នៃជំងឺកូវីដ១៩ កាលពីដំណាក់កាលទី១ និងទី២។ នេះបើតាមសេចក្តីណែនាំ របស់ក្រសួងអប់រំ នៅថ្ងៃទី២៧ តុលា នេះ។
ចុះផ្សាយនៅថ្ងៃ៖
ស្តាប់ - ០២:០៧
សាលារៀនសាធារណៈគ្រប់កម្រិតនៅទូទាំងប្រទេស នឹងបើកដំណើរការឡើងវិញ ជាដំណាក់កាលទី៣ នៅថ្ងៃទី២វិច្ឆិកា ខាងមុខនេះ បន្ទាប់ពីការផ្អាកដំណើរការជិត៧ខែ ដោយសារការផ្ទុះឡើងនៃជំងឺឆ្លងកូវីដ១៩ លើពិភពលោក។ ការបើកដំណើរការនេះ នឹងតម្រូវឲ្យសាលារៀនសាធារណៈទាំងអស់ អនុវត្តតាមគោលការណ៍ប្រតិបត្តិស្តង់ដា ដូចកាលដំណាក់កាលទី១ និងទី២ កន្លងមកដែរ។
បើតាមខ្លឹមសារសេចក្តីណែនាំ ការដំណើរការគ្រឹះស្ថានសិក្សាសាធារណៈនេះ គឺអនុញ្ញាតឲ្យមានការសិក្សាចំនួន៥ ថ្ងៃក្នុងមួយសប្តាហ៍ និងកំណត់ចំនួនមិនលើស២៥នាក់ក្នុងមួយថ្នាក់ សម្រាប់ថ្នាក់មត្តេយ្យសិក្សា និងបឋមសិក្សាគ្រប់កម្រិត។ រីឯគ្រឹះស្ថានមធ្យមសិក្សា ត្រូវអនុវត្តការសិក្សា ត្រឹម៣ថ្ងៃប៉ុណ្ណោះក្នុងមួយសប្តាហ៍ និងកំណត់ចំនួនសិស្សមិនឲ្យលើសពី៣០ នាក់ សម្រាប់កម្រិតសិក្សាថ្នាក់ទី ៧ ទី៨ ទី១០ និងទី១១។
ដោយឡែកសិស្សានុសិស្សថ្នាក់ទី៩ និងទី១២ ដែលត្រៀមប្រលងថ្នាក់ជាតិនាពេលខាងមុខ នឹងត្រូវបន្តអនុវត្តដូចក្នុងដំណាក់កាលទី២។ ដំណាក់កាលទី២ ដែលតម្រូវឲ្យអនុវត្តការរៀនពេញលេញ និងចំណុះសិស្សត្រឹម១៥ ទៅ២០នាក់ក្នុងមួយថ្នាក់។
គូសបញ្ជាក់ថា ក្រសួងអប់រំបានសម្រេចផ្អាកដំណើរការគ្រឹះស្ថានសិក្សាទាំងសាធារណៈនិងឯកជន កាលពីថ្ងៃទី១៦ មីនា ឆ្នាំ២០២០ បន្ទាប់ពីកម្ពុជារកឃើញករណីផ្ទុកកូវីដ១៩ ជាបន្តបន្ទាប់ និងបានប្តូរការសិក្សាឲ្យសិស្សានុសិស្សរៀនតាមប្រព័ន្ធអនឡាយ។
ក៏ប៉ុន្តែបន្ទាប់ពីស្ថានការណ៏កូវីដ១៩ មានភាពធូរស្រាល ក្រសួងអប់រំក៏បានអនុញ្ញាតឲ្យដំណើរការសាលារៀនឡើងវិញជា ៣ ដំណាក់កាល ក្នុងក្របខណ្ឌនៃគោលការណ៍ប្រតិបត្តិស្តង់ដារ និងការរក្សាគន្លាតបុគ្គល ដោយដំណាក់កាលទី១ បានអនុញ្ញាតឲ្យសាលារៀនឯកជន មានស្តង់ដារខ្ពស់ចំនួន ២០ ដំណើរការ ឯដំណាក់កាលទី២ អនុញ្ញាតិឲ្យសិស្សថ្នាក់ទី៩ និងទី១២ ចូលសិក្សា និងដំណាក់កាលទី៣នេះ គឺអនុញ្ញាតឲ្យសិស្សគ្រប់កម្រិតថ្នាក់ចូលសិក្សា ដើម្បីអនុវត្តបន្តនូវឆមាសទី២ ដល់ដំណាច់ខែធ្នូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ