ថ្ងៃរំឭកកិច្ចព្រមព្រៀងក្រុងប៉ារីស២៣តុលា៖ អាជ្ញាធរបំបែកការជួបជុំរបស់ពលរដ្ឋខ្មែរនៅមុខស្ថានទូតចិន
អាជ្ញាធរក្រុងភ្នំពេញ បានបំបែកការជួបជុំរបស់ប្រជាពលរដ្ឋខ្មែរជិត២០នាក់ដែលព្យាយាមដាក់ញត្តិនៅស្ថានទូតចិនប្រចាំនៅកម្ពុជា គឺជាអ្វីដែលអ្នកតវ៉ាថ្លែងថាដើម្បីប្រឆាំងនឹងវត្តមានកងទ័ពចិននៅកម្ពុជា។ បន្ទាប់ពីបំបែកការជួបជុំនៅមុខស្ថានទូតចិន ពលរដ្ឋភាគច្រើនដែលឡើងមកពីបណ្តាខេត្តនានា និងជាសកម្មជននយោបាយផង បាននាំគ្នាទៅតវ៉ានៅមុខស្ថានទូតអាមេរិកដែលធ្វើឲ្យអ្នកចូលរួមកើនឡើងដល់ជិត១០០នាក់ ខណៈកម្លាំងសមត្ថកិច្ចដែលដាក់ពង្រាយតិចជាងនៅស្ថានទូតចិន។
ចុះផ្សាយនៅថ្ងៃ៖
ស្តាប់ - ០២:២៧
ការជួបជុំរំលឹកកិច្ចព្រមព្រៀងសន្តិភាពក្រុងប៉ារីសនៅថ្ងៃ២៣តុលានេះ គឺបានប្រព្រឹត្តិទៅនៅច្រើនទីកន្លែងផ្សេងៗគ្នា ក្នុងទីក្រុងភ្នំពេញ ខណៈអាជ្ញាធរបានដាក់ពង្រាយកម្លាំងប្រដាប់អាវុធការពារយ៉ាងតឹងរឹងនៅមុខស្ថានទូតចិន។
នៅមុខស្ថានចិនប្រជាពលរដ្ឋខ្មែរជិត២០នាក់ ដែលព្យាយាមដាក់ញត្តិដើម្បីរំឭកឲ្យចិនគោរពកិច្ចព្រមព្រៀងសន្តិភាពទីក្រុងប៉ារីស ដើម្បីអ្វីដែលពួកគេថ្លែងថា ប្រឆាំងនឹងវត្តមានកងទ័ពចិននៅកម្ពុជានោះ ត្រូវបានអាជ្ញាធរបំបែកដែលនាំឲ្យមានការឃាត់ខ្លួនរយៈពេលខ្លីលើអ្នកតវ៉ាចំនួន៣នាក់។
បន្ទាប់ពីបរាជ័យការជួបជុំនៅមុខស្ថានចិន ប្រជាពលរដ្ឋដែលភាគច្រើនឡើងមកពីខេត្ត បាននាំគ្នាទៅជួបជុំនៅមុខស្ថានទូតអាមេរិកនៅជិតវត្តភ្នំ។ នៅទីមុខស្ថានទូតអាមេរិក អ្នកតវ៉ាបានកើនឡើងដល់ជិត១០០នាក់ ខណៈចំនួនសមត្ថកិច្ចដែលដាក់ពង្រាយនៅទីនេះតិចជាងសមត្ថកិច្ចដែលបានដាក់ពង្រាយនៅមុខស្ថានចិន។ ការជួបប្រជុំរបស់ពលរដ្ឋទាំងនេះគឺភាគច្រើនជាសកម្មជននយោបាយ។ នេះបើតាមការកត់សំគាល់របស់មន្ត្រីសិទ្ធិមនុស្ស។
មុនមួយថ្ងៃនៃការជួបជុំនេះ លោកនាយករដ្ឋមន្ត្រី ហ៊ុន សែន បានព្រមានថានឹងចាត់វិធានការចំពោះក្រុមអ្នកប្រមូលផ្តុំធ្វើបាតុកម្ម ដើម្បីរំឭកកិច្ចព្រមព្រៀងសន្តិភាពទីក្រុងប៉ារីសនេះ ដោយសំអាងថា កម្ពុជាកំពុងមានទុក្ខដោយសារគ្រោះទឹកជំនន់និងជំងឺកូវីដ១៩។
ដោយឡែក សម្រាប់សង្គមស៊ីវិលវិញ ការប្រារព្ធទិវាសន្តិភាពក្រុងប៉ារីសនេះ ត្រូវបានរៀបចំឡើងនៅក្នុងភោជនីយដ្ឋានមួយកន្លែងក្នុងខណ្ឌច្បារអំពៅ ដោយមានអ្នកចូលរួមជិត៨០០នាក់ ដែលមកពីខាងអ្នកប្រកបរបរសេដ្ឋកិច្ចក្រៅប្រព័ន្ធ យុវជន តំណាងកសិករ និងតំណាងពលករចំណាកស្រុកជាដើម។ គោលបំណងសំខាន់នៃក្រុមនេះ គឺស្នើឲ្យរដ្ឋាភិបាលដាក់ថ្ងៃទី២៣តុលាជាថ្ងៃឈប់សម្រាកប្រចាំឆ្នាំឡើងវិញ។នេះបើតាមមន្ត្រីសង្គមស៊ីវិល។
ក្រៅពីពលរដ្ឋនៅក្នុងស្រុក ពលរដ្ឋខ្មែរនៅក្រៅប្រទេសវិញក៏ប្រកាសធ្វើបាតុកម្មនៅថ្ងៃទី២៣តុលានេះដែរ ដូចជានៅប្រទេសបារាំង ប៊ែលហ្សិក ជប៉ុន កូរ៉េខាងត្បូង អូស្ត្រាលី ណូវែលហ្សេឡង់ សហរដ្ឋអាមេរិក និងប្រទេសកាណាដា ជាដើម។ បាតុករដែលភាគជាសកម្មជនបក្សប្រឆាំងនៅក្រៅប្រទេសនោះ ពួកគេដាក់ញត្តិប្រឆាំងនឹងអ្វីដែលគេចោទថា មានវត្តមានកងទ័ពចិននៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ