ខួប២៩ឆ្នាំនៃកិច្ចព្រមព្រៀងទីក្រុងប៉ារីស៖ អតីតបក្សប្រឆាំងលើកយកបញ្ហាវត្តមានយោធាចិនមករំលេច
អតីតគណបក្សសង្គ្រោះជាតិ នៅថ្ងៃទី២២ ខែតុលានេះ បានសរសេរសារមួយច្បាប់ទៅកាន់ប្រទេសហត្ថលេខីនៃកិច្ចព្រមព្រៀងទីក្រុងប៉ារីស ឆ្នាំ១៩៩១ ដើម្បីស្នើសុំឲ្យប្រទេសហត្ថលេខីទាំងអស់ច្រានចោលវត្តមានយោធាចិន នៅលើទឹកដីកម្ពុជា និងស្នើឲ្យមានការកោះប្រជុំជាបន្ទាន់ ដើម្បីពង្រឹងឲ្យបានខ្ជាប់ខ្ជួន នូវស្មារតីនៃកិច្ចព្រមព្រៀងនេះ។ សារសុំកិច្ចអន្តរាគមន៍ពីប្រទេសហត្ថលេខីនេះ ធ្វើឡើងស្របពេលដែលកិច្ចព្រមព្រៀងសន្តិភាពទីក្រុងប៉ារីសថ្ងៃ២៣តុលា បានឈានចូលខួប២៩ឆ្នាំ នៅថ្ងៃសុក្រស្អែក។
ចុះផ្សាយនៅថ្ងៃ៖
ស្តាប់ - ០២:៥០
នៅក្នុងរបៀបវារៈនៃសារនយោបាយនេះ អតីតគណបក្សសង្គ្រោះជាតិ បានលើកយកបញ្ហាយោធាចិនមកបង្ហាញ នៅក្នុងឱកាសនៃខួប២៩ឆ្នាំ នៃកិច្ចព្រមព្រៀងសន្តិភាពទីក្រុងប៉ារីសសម្រាប់កម្ពុជា។ អតីតបក្សប្រឆាំងដែលជាគូប្រជែងដ៏ធំរបស់រដ្ឋាភិបាលកម្ពុជាបច្ចុប្បន្ន បានចង្អុលប្រាប់ទៅប្រទេសហត្ថលេខីថា កិច្ចសន្យាដែលលោកនាយករដ្ឋមន្ត្រី ហ៊ុន សែន បានចុះហត្ថលេខាជាមួយរដ្ឋាភិបាលចិន គឺជាកិច្ចព្រមព្រៀងដែលខុសច្បាប់ រំលោភលើកិច្ចព្រមព្រៀងសន្តិភាពទីក្រុងប៉ារីស និងរដ្ឋធម្មនុញ្ញកម្ពុជា។
ក្រោមប្រធានបទ«ជួយសង្គ្រោះកម្ពុជានាពេលនេះ ឬត្រូវបាត់បង់កម្ពុជាជារៀងរហូត» អតីគណបក្សសង្គ្រោះជាតិ បានរៀបរាប់ពីកិច្ចព្រមព្រៀងផ្តាច់មុខរបស់កម្ពុជា ដើម្បីអនុញ្ញាតឲ្យយោធាចិនប្រើប្រាស់មូលដ្ឋានកងទ័ពជើងទឹករាម ក្នុងខេត្តព្រះសីហនុ សម្រាប់ធ្វើជាមូលដ្ឋានយោធាចិន។ ការវាយកម្ទេចអគារមួយ ដែលអាមេរិកបានជួយសាងសង់នៅមូលដ្ឋានទ័ពជើងទឹករាម ការព្រួយបារម្ភពីការសាងសង់កំពង់ផែ ព្រលានយន្តហោះ និងឧទ្យានកំសាន្តនៅខេត្តកោះកុង ការពង្រឹងឥទ្ធិពលរបស់ចិនតាមរយៈការប្រើប្រាស់ប្រទេសកម្ពុជាជាភូមិសាស្ត្រនយោបាយ និងការដាក់ទណ្ឌកម្មរបស់សហរដ្ឋអាមេរិកទៅលើក្រុមហ៊ុនចិន Union Development Group (UDG)។ល។ ទាំងអស់នេះសុទ្ធតែបានលើកឡើងនៅក្នុងខ្លឹមសារនៃលិខិតរបស់អតីតគណបក្សសង្គ្រោះជាតិ។
ខ្លឹមសារដែលបានលើកឡើងតាមរយៈសាររបស់អតីតគណបក្សប្រឆាំងពេលនេះ គឺមិនមែនជារឿងថ្មីនោះទេ។ មន្ត្រីជាន់ខ្ពស់ស៊ីវិល និងយោធារបស់គណបក្សកាន់អំណាច រហូតដល់ថ្នាក់ដឹកនាំជាន់ខ្ពស់ តែងបដិសេធជាច្រើនដងមកហើយ ថាមិនមានមូលដ្ឋានយោធាចិននៅប្រទេសកម្ពុជានោះទេ ព្រោះថាវាផ្ទុយនឹងរដ្ឋធម្មនុញ្ញកម្ពុជា ដែលប្រកាន់ជំហរអព្យាក្រឹត្យ ហើយប្រឈមនឹងការតវ៉ារបស់សមាជិកអាស៊ានផ្សេងទៀត ប្រសិនបើមានដូច្នោះមែន។
ទោះយ៉ាងណា បញ្ហានេះក៏ត្រូវបានលើកឡើងបន្ថែមតាមសារតេឡេក្រាម ដោយលោក សុខ ឥសាន អ្នកនាំពាក្យគណបក្សប្រជាជននៅថ្ងៃនេះដែរថា ការចោទប្រកាន់ថាមានមូលដ្ឋានយោធាចិននៅក្នុងទឹកដីកម្ពុជាគឺគ្រាន់តែជាការសង្ស័យតាមការផ្សាយរបស់កាសែតបរទេសប៉ុណ្ណោះ តែគ្មានការពិតឡើយ។
សូមបញ្ជាក់ថា ប្រធានស្តីទីអតីតគណបក្សសង្គ្រោះជាតិ លោក សម រង្ស៊ីបានប្រកាសតាមហ្វេសប៊ុករបស់លោក នៅដើមសប្តាហ៍នេះថា ប្រជាជនខ្មែរនៅទូទាំងពិភពលោកនឹងធ្វើបាតុកម្មប្រឆាំងវត្តមានយោធាចិននៅកម្ពុជានៅថ្ងៃខួប២៩ឆ្នាំនៃកិច្ចព្រមព្រៀងសន្តិភាពទីក្រុងប៉ារីសតែម្តង។ ក៏ប៉ុន្តែ លោកនាយករដ្ឋមន្ត្រី ហ៊ុន សែន នៅក្នុងពិធីសួរសុខទុក្ខ និងចែកអំណោយដល់ពលរដ្ឋរងគ្រោះដោយទឹកជំនន់នៅខេត្តបន្ទាយមានជ័យកាលពីម្សិលមិញបានព្រមាន មិនឲ្យមានភាពរញ៉េរញ៉ៃ ខណៈដែលកម្ពុជាកំពុងជាប់ដៃប្រយុទ្ធនឹងគ្រោះទឹកជំនន់ផង និងកូវីដផងនាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ