របាយការណ៍៖ ទឹកជំនន់បណ្តាលអោយមនុស្ស១៣នាក់ស្លាប់ ខណៈប្រជាជនជិត២០ម៉ឺននាក់បានរងផលប៉ះពាល់
គិតត្រឹមរសៀលថ្ងៃទី១៥ តុលានេះ ជំនន់ទឹកភ្លៀងនៅក្នុងប្រទេសកម្ពុជា បានបង្កអោយលិចលង់ចំនួន១៩ រាជធានី-ខេត្ត និងប៉ះពាល់ដល់ប្រជាពលរដ្ឋប្រមាណជាង២០ម៉ឺននាក់។ ជំនន់ទឹកភ្លៀងក្នុងរយៈពេលជិតមួយសប្តាហ៍មកនេះ ក៏បានបណ្តាលអោយមនុស្សចំនួន១៣នាក់ស្លាប់ និងប៉ះពាល់ដល់ផ្ទះរបស់ប្រជាពលរដ្ឋចំនួនជាង៤ម៉ឺនខ្នង។ ដោយឡែកសម្រាប់រាជធានីភ្នំពេញ គិតត្រឹមរសៀលថ្ងៃទី ១៥ តុលានេះ ទឹកជំនន់បានបណ្តាលអោយលិចលង់សង្កាត់ចំនួន៦ ស្ថិតនៅក្នុងខណ្ឌដង្កោ ខណៈប្រជាជនជិត៣ពាន់នាក់ ត្រូវបានជម្លៀសចេញ។
ចុះផ្សាយនៅថ្ងៃ៖
ស្តាប់ - ០២:៣៣
យ៉ាងហោចណាស់មានរាជធានី-ខេត្តចំនួន១៩នៃប្រទេសកម្ពុជា បានរងផលប៉ះពាល់ដោយសារជំនន់ទឹកភ្លៀង ហើយខេត្តពោធិ៍សាត់ ប៉ៃលិន បន្ទាយមានជ័យ និងរាជធានីភ្នំពេញ បានរងផលប៉ះពាល់ធ្ងន់ធ្ងរជាងគេ។ នេះបើយោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ គិតចាប់ពីថ្ងៃទី ០១ កញ្ញា ដល់ព្រឹកថ្ងៃទី១៥ ខែតុលានេះ។
របាយការណ៍ដដែលបន្តថា ជំនន់ទឹកភ្លៀងនៅឆ្នាំ២០២០នេះ បានធ្វើអោយប៉ះពាល់ដល់រាជធានី-ខេត្តចំនួន១៩ ស្មើនឹង៦៩ ក្រុង ស្រុក ខណ្ឌ និងឃុំចំនួន២៥៨ឃុំសង្កាត់នៅទូទាំងប្រទេស។ ក្នុងនោះប្រជាជនរងគ្រោះមានចំនួន៤៨,៣១៧គ្រួសារ ស្មើប្រមាណ១៩៣,២៦៨នាក់ ហើយប្រជាជន៣,០៩៤គ្រួសារស្មើប្រមាណ១២,៣៧៦នាក់ ត្រូវបានជម្លៀសទៅកាន់ទីទួលមានសុវត្ថិភាព។ ហើយខេត្តដែលកំពុងរងផលប៉ះពាល់ពីទឹកជំនន់នេះ រួមមាន ខេត្តពោធិ៍សាត់ ប៉ៃលិន បន្ទាយមានជ័យ ភ្នំពេញ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងខេត្តកំពង់ធំជាដើម។ ទឹកជំនន់ដែលបង្កឡើងដោយទឹកភ្លៀងនៅកម្ពុជាពេលនេះ បានបណ្តាលអោយប្រជាជនចំនួន១៣នាក់ស្លាប់ក្នុងនោះមានក្មេងចំនួន៥នាក់។ ចំនួនអ្នកស្លាប់បានកើនឡើងម្នាក់ បើប្រៀបធៀបនឹងរបាយការណ៍កាលពីថ្ងៃទី ១៤ តុលា ដែលមានត្រឹមតែ១២នាក់។
ដោយឡែកសម្រាប់រាជធានីភ្នំពេញ គិតត្រឹមព្រឹកថ្ងៃទី ១៥ តុលានេះ អាជ្ញាធរបាននិងកំពុងជម្លៀសប្រជាជនប្រមាណជិត៣ពាន់នាក់ចេញពីបុរីចំនួនពីរ ស្ថិតនៅក្នុងខណ្ឌដង្កោ ខណៈទឹកជំនន់ដែលបង្កឡើងដោយទឹកភ្លៀងនិងជំនន់ស្ទឹងព្រែកត្នោតនេះបានហក់ឡើងខ្ពស់ ដែលបង្កអោយលិចលង់ដល់សង្កាត់ចំនួន៦ គឺសង្កាត់ស្ពានថ្ម សង្កាត់ទៀន សង្កាត់គងនយ សង្កាត់រលួស សង្កាត់សាក់សំពៅ និងចុងក្រោយនេះ គឺសង្កាត់ព្រែកកំពិស។ ភ្លាមៗនេះ អភិបាលរាជធានីភ្នំពេញលោក ឃួង ស្រេង បានចុះទៅបញ្ជាដោយផ្ទាល់អោយបិទការធ្វើចរាចរណ៍ជាបណ្តោះអាសន្ននៅកំណាត់ផ្លូវចំការដូងលេខ២១៧ ស្ថិតនៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ និងកំពុងត្រៀមជម្លៀសមនុស្សបន្ថែមទៀត។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមព្រឹកថ្ងៃទី ១៥ តុលានេះ ទឹកជំនន់ក៏បានបណ្តាលអោយប៉ះពាល់ដល់លំនៅដ្ឋានរបស់ប្រជាពលរដ្ឋចំនួន៤៧,៩២៣ខ្នង (ខូចខាត ៥០ខ្នង) សាលារៀនចំនួន៤២៥កន្លែង ស្រូវប្រមាណ១៣១,៣២៩ហិកតា (ខូចខាតប្រមាណ៦,៦៥៧ហិកតា) ខូចខាតដល់ផ្លូវជាតិ ផ្លូវខេត្ត និងផ្លូវគ្រួសក្រហមប្រមាណ២០២គីឡូម៉ែត្រ ស្ពានចំនួន២៤កន្លែង និងប៉ះពាល់ដល់ប្រឡាយមេ ប្រឡាយរង និងប្រឡាយស្រោចស្រព ប្រមាណ៣៥២.៤ គីឡូម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ