តុលាការក្រុងភ្នំពេញបង្គាប់ឱ្យក្រុមកម្មករក្រុមហ៊ុនស៊ិនទ្រីបញ្ឈប់ការធ្វើកូដកម្ម និងចូលធ្វើការវិញឱ្យបានមុនថ្ងៃ១៦តុលា
តុលាការសាលាដំបូងរាជធានីភ្នំពេញបានបង្គាប់ឱ្យក្រុមកម្មករនៃក្រុមហ៊ុនស៊ិនទ្រីទាំងអស់ដែលធ្វើកូដកម្ម ត្រូវបញ្ឈប់សកម្មភាពតវ៉ា និង ត្រូវចូលធ្វើការវិញឱ្យបានមុនថ្ងៃទី១៦ ខែតុលាខាងមុខនេះ។ ការបង្គាប់នេះធ្វើឡើងតាមរយៈដីកាសម្រេចចាត់ចែងបណ្តោះអាសន្នរបស់សាលាដំបូងរាជធានីភ្នំពេញនៅថ្ងៃទី១៣ ខែតុលា។ ដីកាសម្រេចនេះ ធ្វើឡើងបន្ទាប់ពីកុ្រមហ៊ុនស៊ិនទ្រីបានស្នើទាមទារឱ្យកម្មករបញ្ឈប់ការធ្វើកូដកម្ម និងចូលធ្វើការងារវិញកាលពីថ្ងៃទី១២ ខែតុលា។
ចុះផ្សាយនៅថ្ងៃ៖
ស្តាប់ - ០២:០៦
តាមរយៈដីកាសម្រេចចាត់ចែងបណ្តោះអាសន្ននៅថ្ងៃទី១៣ ខែតុលា សាលាដំបូងរាជធានីភ្នំពេញ បានកំណត់ថា ការធ្វើកូដកម្មរបស់កម្មករនិយោជិតទាំងអស់របស់ក្រុមហ៊ុនស៊ីនទ្រីខេមបូឌា គឺជាកូដកម្មខុសច្បាប់។ ដូច្នេះហើយ តុលាការបានបង្គាប់ឱ្យកម្មករនិយោជិតទាំងអស់របស់ក្រុមហ៊ុនស៊ីនទ្រីខេមបូឌាបញ្ឈប់ការធ្វើកូដកម្មនេះ និងត្រូវចូលបំពេញការងារវិញតាមវេន ពេលវេលា និងតួនាទីរបស់ខ្លួនឱ្យបានមុនថ្ងៃទី១៦ ខែតុលា ឆ្នាំ២០២០។ តុលាការក៏បានព្រមានថា ក្នុងករណីដែលកម្មករនិយោជិតទាំងអស់នេះ មិនព្រមចូលធ្វើការវិញហួសការកំណត់នេះ គឺចាត់ទុកថាមានកំហុងធ្ងន់។
ការសម្រេចរបស់តុលាការនេះ ធ្វើឡើងបន្ទាប់ពីក្រុមហ៊ុនស៊ីនទ្រីខេមបូឌាបានប្តឹងទាមទារទៅតុលាការក្រុងភ្នំពេញកាលពីថ្ងៃទី១២ ខែតុលា។ លោកកៅ សុខវ៉ាត ប្រធានសហជីពកម្មករនិយោជិតវិស័យទេសចរណ៍នៃក្រុមហ៊ុនស៊ីនទ្រីខេមបូឌា បានអះអាងថា ដីកាសម្រេចចាត់ចែងបណ្តោះអាសន្នរបស់តុលាការក្រុងភ្នំពេញមិនមានសម្ពាធណាមួយលើក្រុមកម្មករក្រុមហ៊ុនស៊ិនទ្រីននោះទេ។ លោកគូសបញ្ជាក់ថា ក្រុមកម្មករទាំងអស់នេះ អាចនឹងចូលធ្វើការងារវិញក្នុងពេលឆាប់ៗនេះ នៅពេលដែលពួកគេទទួលបានដំណោះស្រាយដែលអាចទទួលយកបានពីសំណាក់ក្រុមហ៊ុនស៊ិនទ្រី និងសាលារាជធានីភ្នំពេញ។
សូមបញ្ជាក់ថា កម្មករប្រមូលសំរាមក្រុមហ៊ុនស៊ីនទ្រីប្រមាណជាង១២០០នាក់ បានផ្ទុះការតវ៉ា កាលពីថ្ងៃទី ០២ តុលា បន្ទាប់ពីពួកគេបារម្ភបាត់បង់ការងារ និងអត្ថប្រយោជន៍មួយចំនួនក្រោយពីទទួលបានដំណឹងថា រដ្ឋាភិបាលកំពុងធ្វើកំណែទម្រង់លើការគ្រប់គ្រងនិងប្រមូលសំរាមនៅក្នុងរាជធានីភ្នំពេញ។ ក្នុងនោះ មានក្រុមហ៊ុនមួយចំនួននឹងដេញថ្លៃយកសេវាប្រមូលសំរាមនេះពីក្រុមហ៊ុនស៊ីនទ្រី។ ក្រុមកម្មករស៊ិនទ្រីបានទាមទារចំនួន៥ចំណុចគឺប្រាក់បំណាច់អតីតភាព ប្រាក់សំណងជំងឺចិត្ត ប្រាក់ជួសការជូនដំណឹង ប្រាក់ខែចុងក្រោយ និងប្រាក់ឈប់សម្រាកប្រចាំឆ្នាំដែលនៅសេសសល់។
លោកម៉េត មាសភក្តី អ្នកនាំពាក្យសាលារាជធានីភ្នំពេញមិនទាន់អាចបញ្ជាក់ឱ្យដឹងជាមុនបានឡើយថា នឹងមានដំណោះស្រាយបែបណាចំពោះក្រុមកម្មករក្រុមហ៊ុនស៊ិនទ្រីទាំងអស់នេះ។ ប៉ុន្តែ លោកបានលើកឡើងថា ការតវ៉ារបស់ពួកគេនេះ គឺមិនត្រូវកាលៈទេសៈនោះទេ ដោយហេតុថា នៅពេលនេះរាជធានីភ្នំពេញកំពុងមានការជន់លិចផ្នែកខ្លះដែលត្រូវដោះស្រាយបន្ទាន់ តែបែរមានបញ្ហាសំរាមនេះបន្ថែមទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ