UNDP៖អត្រាភាពក្រីក្រនៅកម្ពុជានឹងកើនឡើងទ្វេដង ខណៈកំណើនសេដ្ឋកិច្ចធ្លាក់ចុះក្រោមសូន្យដោយសារកូវីដ១៩
នៅក្នុងរបាយការណ៍ថ្មីចេញផ្សាយនៅថ្ងៃទី០៨តុលា អង្គការកម្មវិធីអភិវឌ្ឍន៍សហប្រជាជាតិនៅកម្ពុជា ឬហៅកាត់ថា UNDP រកឃើញថា វិបត្តិកូវីដ១៩ នឹងជំរុញកំណើនអត្រាភាពក្រីក្រនៅកម្ពុជា កើនឡើងដល់ជិត១៨ភាគរយ ពោលគឺកើនឡើងជិតទ្វេដង ពីអត្រាភាពក្រីក្រនៅកម្ពុជាពេលមុនដែលមានក្រោម១០ភាគរយ។ បន្ថែមពីលើកំណើនអត្រាភាពក្រីក្រ កូវីដ១៩ ក៏ធ្វើឲ្យអត្រាអត់ការងារធ្វើនៅកម្ពុជាអាចកើនឡើងដល់ជិត៥ភាគរយផងដែរ។
ចុះផ្សាយនៅថ្ងៃ៖
ការវាយតម្លៃផលប៉ះពាល់នៃកូវីដ១៩មកលើប្រជាជននៅប្រទេសកម្ពុជា ដោយកម្មវិធីអភិវឌ្ឍន៍សហប្រជាជាតិនៅកម្ពុជាហៅកាត់ថាUNDPនេះគឺប្រើប្រាស់គំរូចំនួន៣ គឺគំរូលំនឹងស្ថេរភាពទូទៅ (CGE) គំរូម៉ាទ្រីសគណនេយ្យសង្គម (SAM) និងគំរូវិភាគពាណិជ្ជកម្មសកល (GTAP) ដើម្បីវាស់ស្ទង់ផលប៉ះពាល់និងសេណារីយ៉ូដែលអាចកាត់បន្ថយហានិភ័យបណ្តាលមកពីជំងឺកូវីដ១៩។
នៅក្រោមសេណារីយ៉ូនេះ អត្រាភាពក្រីក្រនៅកម្ពុជា អាចកើនឡើងជិតទ្វេដងរហូតដល់ ១៧,៦ ភាគរយខណៈអត្រាអត់ការងារធ្វើអាចកើនឡើងដល់៤,៨ ភាគរយ។ ជាមួយគ្នានោះ ការជំរុញកំណើនផលិតផលសរុបក្នុងស្រុក(ផសស)ដែលរំពឹងថាមានខ្ទង់ ៣.៥ ភាគរយ នឹងធ្លាក់ចុះដល់-៣,៣ ភាគរយដោយសារតែភាពអត់ការងារធ្វើ។
ផ្អែកតាមការព្យាករណ៍នេះ UNDP ព្រមានថា ប្រជាជនកម្ពុជា ៥៧០.០០០ នាក់នឹងធ្លាក់ចូលក្នុងបន្ទាត់នៃភាពភាពក្រីក្រសារជាថ្មី។ បើតាមUNDP ការវាយតម្លៃបែបនេះគឺត្រូវបានធ្វើការពិគ្រោះយោបល់យ៉ាងប្រុងប្រយ័ត្នជាមួយក្រសួងសេដ្ឋកិច្ចកម្ពុជា និងភាគីពាក់ព័ន្ធផងដែរ។
ដើម្បីឆ្លើយតបចំពោះបញ្ហាប្រឈមនេះ អ្នកតំណាងរបស់UNDP លើកឡើងថា មានតែការវិនិយោគលើកិច្ចគាំពារសង្គមទេដែលត្រូវបានគេមើលឃើញថាជាការប្រសើរបំផុត ដើម្បីជំរុញកំណើនសេដ្ឋកិច្ចឡើងវិញ និងកាត់បន្ថយភាពក្រីក្រ។
បើតាម UNDP ខ្លួនក៏បានគាំទ្រដល់ការដាក់ឱ្យប្រើប្រាស់កម្មវិធីផ្ទេរសាច់ប្រាក់ដល់ពលរដ្ឋក្រីក្រក្រោម កម្មវិធីរបស់រដ្ឋាភិបាលសម្រាប់កូវីដ១៩ដល់ចុងឆ្នាំនេះដល់ប្រជាជនប្រមាណ ៣.០០០ គ្រួសារផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ