ស្ថានទូតបារាំងនៅកម្ពុជានឹងបើកជូនសាធារណជនចូលទស្សនាក្នុងឱកាសទិវាបេតិកភណ្ឌនាថ្ងៃសៅរ៍ខាងមុខ
ស្ថានទូតបារាំងប្រចាំនៅកម្ពុជា នឹងបើកជូនសាធារណជនចូលទស្សនាក្នុងឱកាសទិវាបេតិកភណ្ឌ នៅថ្ងៃសៅរ៍ ទី១០ ខែតុលា ឆ្នាំ២០២០ ខាងមុខនេះ ដោយសេរីចាប់ពីម៉ោង៨៖០០ព្រឹក ដល់ម៉ោង៣៖៣០រសៀល។ តាមសេចក្តីប្រកាសរបស់ស្ថានទូតបារាំង ព្រឹត្តិការណ៍បេតិកភណ្ឌនៅឆ្នាំនេះគឺផ្តោតទៅលើប្រធានបទ «ស្ថាបត្យកម្ម និងបេតិកភណ្ឌ» ដោយទិវាខាងលើនេះ គឺជាឱកាសទស្សនាឧទ្យានដ៏ស្រស់បំព្រង និងស្ថាបត្យកម្មស្ថានទូតបារាំង ហើយក៏ជាឱកាសទស្សនាពិព័រណ៍របស់សភាពាណិជ្ជកម្ម និងឧស្សាហកម្មបារាំង-កម្ពុជា ដែលផ្តោតលើការជួសជុលអគារបេតិកភណ្ឌនៅកម្ពុជាផងដែរ។ ស្ថានទូបារាំងបញ្ជាក់ថា ដោយសារហេតុផលផ្នែកសុខភាព អ្នកទស្សនានឹងត្រូវវាស់ស្ទង់កម្តៅ និងត្រូវលាងសម្អាតដៃនៅច្រកចូលស្ថានទូត។ អ្នកទស្សនាក៏ត្រូវពាក់ម៉ាសក្នុងអំឡុងនៃការទស្សនាផងដែរ។ ការទស្សនាធ្វើឡើងនៅក្នុងឧទ្យាន មួយក្រុមម្តងៗ ដោយចៀសវាងការប្រមូលផ្តុំគ្នា។ ក្នុងករណីអ្នកទស្សនាមានគ្រុនក្តៅ ក្អក ពិបាកដកដង្ហើម ឬមានសីតុណ្ហភាពលើសពី៣៧,៥អង្សារសេ នឹងមិនត្រូវអនុញ្ញាតឱ្យចូលក្នុងបរិវេណស្ថានទូតនោះទេ។ ជាងនេះទៅទៀត ចំណីអាហារ ភេសជ្ជៈ (លើកលែងទឹក) និងកាបូបធំៗ នឹងមិនអនុញ្ញាតឱ្យយកចូលនោះទេ។ ជនពិការមិនអាចចូលទៅក្នុងឧទ្យានបាននោះទេ។ នេះបើតាមការប្រកាសរបស់ស្ថានទូត៕
ចុះផ្សាយនៅថ្ងៃ៖
