អ្នកនាំពាក្យ៖ព្រឹទ្ធសភានឹងដកអភ័យឯកសិទ្ធិ បើសិនសមត្ថកិច្ចរកឃើញថាលោកណយ ស្រូនបានប្រព្រឹត្តខុសច្បាប់
អ្នកនាំពាក្យព្រឹទ្ធសភាកម្ពុជា លោកម៉ម ប៊ុននាង នៅព្រឹកថ្ងៃពុធនេះ បានអះអាងប្រាប់វិទ្យុបារាំងអន្តរជាតិថា ករណីលោកណយ ស្រូន គឺមិនត្រូវបានបញ្ចប់ដោយការសុំអភ័យទោសនោះទេពាក់ព័ន្ធនឹងការចូលទៅកាន់កាប់ដីរបស់រដ្ឋនៅក្នុងខេត្តមណ្ឌលគិរី។មណ្ឌលគិរី។ បើតាមលោកម៉ម ប៊ុននាង ព្រឹទ្ធសភានឹងបើកកិច្ចប្រជុំពិភាក្សាដកអភ័យឯកសិទ្ធិរបស់លោកភា្លម បើសិនអាជ្ញាធរមានធរមានសមត្ថកិច្ចរកឃើញពីទោសកំហុងកំហុសរបស់លោក។លោក។ ការគូសបញ្ជាក់នេះ ធ្វើឡើងក្រោយពីករណីនេះត្រូវបានអ្នកនយោបាយ សង្គមស៊ីវិល និងពលរដ្ឋទូទៅបានបញ្ចេញប្រតិកម្មរិះគន់យ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០២:៣៥
លោកពេជ្រ ស្រស់ ប្រធានគណបក្សយុវជនកម្ពុជានៅថ្ងៃពុធនេះ បានរិះគន់យ៉ាងខ្លាំងទៅលើវិធានការរបស់ព្រឹទ្ធសភាកម្ពុជាចំពោះករណីលោកណយ ស្រូន ដែលជាសមាជិកព្រឹទ្ធសភា។ លោកបានគូសបញ្ជាក់ថា វិធានការរបស់ព្រឹទ្ធសភានេះ គឺនឹងនាំមាននិទណ្ឌភាព និងភាពមិនស្មើគ្នាក្នុងការទទួលខុសត្រូវចំពោះមុខច្បាប់រវាងអ្នកធំ និងអ្នកតូចនៅក្នុងប្រទេសកម្ពុជា។ មិនតែប៉ុណ្ណោះ នឹងនាំឱ្យមានការឈឺចាប់ដល់អ្នកដែលមិនមានអំណាច ដូចយ៉ាងប្រជាពលរដ្ឋសាមញ្ញជាដើម។ សម្រាប់លោកពេជ្រ ស្រស់ ការគ្រាន់តែសុំទោសហើយអាចរួចផុតពីការទទួលខុសត្រូវចំពោះមុខច្បាប់ គឺជាគំរូ និងវប្បធម៌អាក្រក់ ហើយជះឥទ្ធិពលមិនល្អលើឥទ្ធិពលច្បាប់ និងធ្វើឱ្យអ្នកអនុវត្តច្បាប់ស្អុយឈ្មោះ។
ចំណែក លោកស្រីចក់ សុភាព ដែលជានាយិកាមជ្ឈមណ្ឌលសិទ្ធិមនុស្សកម្ពុជាវិញបានអះអាងថា រដ្ឋាភិបាលកម្ពុជា គួរតែបញ្ចប់នូវវប្បធម៌និទណ្ឌភាព។ លោកស្រីកត់សម្គាល់ថា វិធានការកន្លងមក គឺរដ្ឋាភិបាលប្រើតែវិន័យរដ្ឋបាល ហើយភាគច្រើន គឺដក ឬផ្ទេរតំណែងមន្ត្រីជាប់ពិរុទ្ធ តែពេលខ្លះ ការផ្ទេរតំណែងនេះទៀតសោត គឺអាចទៅទទួលតំណែងល្អជាងមុនថែមទៀត។ សម្រាប់លោកស្រីចក់ សុភាព នេះមិនមែនជាការអនុវត្តគោលការណ៍នីតិរដ្ឋទេ តែជាការចូលរួមចំណែកលើកទឹកចិត្តដល់ជនដទៃឱ្យប្រព្រឹត្តតាមដែរ ដែលនេះនឹងប៉ះពាល់ដល់កិច្ចប្រឹងប្រែងរបស់រដ្ឋាភិបាលដែលចង់ឱ្យមានកំណែទម្រង់ល្អប្រសើរនោះ។
ប្រតិកម្មរិះគន់ពីអ្នកនយោបាយ និងអង្គការសង្គមស៊ីវិលនេះ ធ្វើឡើងបន្ទាប់ពីអ្នកនាំពាក្យព្រឹទ្ធសភាពកម្ពុជាកាលពីថ្ងៃអង្គារ បានបញ្ចេញឱ្យដឹងពីករណីលោកណយ ស្រូន បានរៀបចំឯកសារកាន់កាប់ដីទំហំ៥៣១ហិកតានៅក្នុងឃុំសែនមនោរម្យ ស្រុកអូររាំង ខេត្តមណ្ឌលគិរី។ លោកណយ ស្រូន ត្រូវបានថ្នាក់ដឹកនាំកំពូលព្រឹទ្ធសភាហៅមកណែនាំ និងអប់រំហើយលោកបានសុំការអភ័ទោស និងទទួលយកការណែនាំទាំងអស់នេះ។
អ្នកនាំពាក្យព្រឹទ្ធសភាកម្ពុជា លោកម៉ម ប៊ុននាង បានអះអាងថា នេះ គឺគ្រាន់តែជាវិធានការដំបូងបំផុតរបស់ព្រឹទ្ធសភាតែប៉ុណ្ណោះ ហើយវិធានការនេះមិនមែនជាការបិទផ្លូវចំពោះការឈានទៅអនុវត្តច្បាប់លើសមាជិកព្រឹទ្ធសភារូបនេះនោះឡើយ។ បើតាមលោកម៉ម ប៊ុននាង ព្រឹទ្ធសភាកម្ពុជាបានទុកករណីលោកណយ ស្រូននេះឱ្យអាជ្ញាធរអនុវត្តច្បាប់ស្រាវជ្រាវ និងស៊ើបអង្កេតពីការប្រព្រឹត្ត ឬមិនប្រព្រឹត្តខុសច្បាប់របស់លោក។ ប៉ុន្តែ លោកបានគូសបញ្ជាក់ថា ប្រសិនបើអាជ្ញាធរមានសមត្ថកិច្ចរកឃើញពីការប្រព្រឹត្តខុសច្បាប់របស់លោក ហើយស្នើមកព្រឹទ្ធសភានោះ ព្រឹទ្ធសភានឹងបើកកិច្ចប្រជុំ ដើម្បីពិនិត្យ និងដកអភ័យឯកសិទ្ធិ ដើម្បីប្រគល់លោកណយ ស្រូន ទៅឱ្យសមត្ថកិច្ច និងតុលាការអនុវត្តតាមទៅច្បាប់របស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ