កូវីដ១៩៖បង្ខំឲ្យគណបក្សប្រជាជនផ្អាករៀបចំអបអរទិវា៧មករាជាលើកដំបូងក្នុងរយៈ៤២ឆ្នាំមកនេះ
ការឆ្លងរាលដាលនៃជំងឺកូវីដ១៩ នៅក្នុងពិភពលោក បង្ខំឲ្យគណបក្សប្រជាជនកម្ពុជា ផ្អាករៀបចំកម្មវិធីសំខាន់ប្រចាំឆ្នាំចំនួន២។ នេះបើតាមសេចក្ដីជូនដំណឹងរបស់គណបក្សប្រជាជនកម្ពុជានៅថ្ងៃទី៦តុលានេះ។ អ្វីជាការកត់សម្គាល់ ក្នុងចំណោមកម្មវិធីសំខាន់ចំនួនពីរនោះ គណបក្សប្រជាជនផ្អាករៀបចំអបអរទិវា៧មករា ជាលើកដំបូងក្នុងរយៈ៤២ឆ្នាំមកនេះ។
ចុះផ្សាយនៅថ្ងៃ៖
ស្តាប់ - ០២:៣០
ទិវាជ័យជម្នះ៧មករាដែលគណបក្សប្រជាជនកម្ពុជាចាត់ទុកជាព្រឹត្តការណ៍ប្រវត្តិសាស្ត្រដ៏សំខាន់ប្រចាំឆ្នាំត្រូវបានផ្អាករៀបចំជាលើកដំបូងនៅថ្ងៃទី៧មករាឆ្នាំ២០២១ខាងមុខ ដោយសារតែការរាតត្បាតនៃជំងឺកូវីដ១៩។ នេះក៏ដោយគណបក្សប្រជាជនកម្ពុជាមើលឃើញថា នៅពាសពេញពិភពកំពុងរាតត្បាតដោយជំងឺកូវីដ១៩ ដែលតម្រូវឲ្យកម្ពុជាត្រូវតែបន្តប្រុងប្រយ័ត្នក្នុងកម្រិតខ្ពស់ជាប់ជានិច្ច។ ជំនួសឲ្យការរៀបចំនៅនឹងកន្លែងសាខាគណបក្សប្រជាជននៅបណ្ដាលខេត្តតម្រូវឲ្យរៀបចំLOGO ឬបដាពាក្យស្លោកអបអរថ្ងៃ៧មករា ដូចដែលធ្លាប់ធ្វើនាពេលកន្លងមក។
មែនទែនទៅនេះមិនមានជាលើកទី១ទេ ដែលរដ្ឋាភិបាលដឹកនាំដោយគណបក្សប្រជាជនកម្ពុជា សម្រេចផ្អាកឬលុបចោលកម្មវិធីជួបជុំសំខាន់ៗនិងលើពេលនៃពិធីបុណ្យជាតិដើម្បីបង្ការកូវីដ១៩ ដូចជាៈពិធីបុណ្យចូលឆ្នាំខ្មែរ និងពិធីបុណ្យអុំទូកជាដើម។
បន្ទាប់ពីសម្រេចផ្អាករៀបចំទិវាជ័យជម្នះ៧មករា គណបក្សប្រជាជនកម្ពុជាក៏សម្រេចផ្អាករៀបចំសន្និបាតគណៈកម្មាធិការកណ្ដាល នៅដំណាច់ឆ្នាំ២០២០នេះដែរ។ ជំនួសឲ្យការជួបជុំគណៈអចិន្ទ្រៃយ៍នៃគណៈកម្មាធិការកណ្ដាល នឹងរៀបចំឯកសាររបាយការណ៍ផ្ញើជូនសាខាគណបក្សអនុវត្តភារកិច្ចបន្តទៀត ស្ដីពីសភាពការណ៍ទូទៅ និងការងារគណបក្សប្រចាំឆ្នាំ២០២០និងទិសដៅភារកិច្ចឆ្នាំ២០២១។
សូមជម្រាបជូនថា នៅក្នុងសន្និបាតគណៈកម្មាធិការកណ្តាលលើកទី៤២អាណត្តិទី៥កាលពីខែកុម្ភៈឆ្នាំ២០២០ មានការចូលរួមពី សមាជិកគណៈកម្មាធិការកណ្ដាល សមាជិកាព្រឹទ្ធសភា រដ្ឋសភា រដ្ឋាភិបាល ព្រមទាំងថ្នាក់ដឹកនាំ ក្រសួងស្ថាប័ន រាជធានីខេត្ត ក្រុង ស្រុក ខណ្ឌ និងក្រុមការងារគណបក្សចុះមូលដ្ឋានសរុប៣៥២០រូប។ នៅក្នុងសន្និបាតកាលណោះ គណបក្សប្រជាជនកម្ពុជា ប្ដេជ្ញាប្រឆាំងដាច់ខាតមិនឲ្យចលនាបដិវត្តន៍ពណ៌កើតឡើងវិញបានឡើយ តាមរយៈការអនុវត្តវិធានការច្បាប់ដ៏ម៉ឺងម៉ាត់ចំពោះបុគ្គលណាដែលបានប្រព្រឹត្តល្មើសច្បាប់។
អង្គសន្និបាតក៏ប្ដេជ្ញាដោះស្រាយបញ្ហាព្រំដែនឲ្យបានចប់សព្វគ្រប់ ដើម្បីកសាងខ្សែបន្ទាត់ព្រំដែនប្រកបដោយមិត្តភាព សន្តិភាព ស្ថេរភាព និងកិច្ចសហប្រតិបត្តិការយូរអង្វែងជាមួយប្រទេសជិតខាង។ ក៏មានផងដែរសេចក្ដីសម្រេចរបស់អង្គសន្និបាតគណបក្សប្រជាជនកម្ពុជាពង្រឹងគោលនយោបាយជួយប្រជាកសិករដើម្បីរក្សាស្ថេរភាពតម្លៃកសិផលនិងពង្រីកទីផ្សារកសិផលជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ