សង្គមស៊ីវិលស្នើឲ្យរដ្ឋាភិបាលពន្លឿនការអនុម័តច្បាប់ស្តីពីសិទ្ធិទទួលបានព័ត៌មានត្រឹមឆ្នាំនេះ
សង្គមស៊ីវិលនិងស្ថាប័នព័ត៌មានចំនួន៤ បានចេញសេចក្តីថ្លែងការណ៍រួមមួយស្នើសុំដល់រដ្ឋាភិបាលឲ្យមានការពន្លឿននូវការអនុម័តច្បាប់ស្តីពីសិទ្ធិទទួលព័ត៌មាន ដែលបានរៀបចំតាក់តែងតាំងពីឆ្នាំ២០១៥។ ការអំពាវនាវឲ្យមានការអនុម័តឆាប់ៗនេះ គឺដើម្បីលើកកម្ពស់ឲ្យមានការចូលរួមពីសាធារណជនក្នុងការធានាបានតម្លាភាពនិងប្រសិទ្ធិភាព។
ចុះផ្សាយនៅថ្ងៃ៖
ស្តាប់ - ០២:១១
អង្គការសង្គមស៊ីវិលនិងស្ថាប័នព័ត៌មានមានដូចជា អង្គការតម្លាភាពកម្ពុជា វិទ្យាស្ថានតស៊ូមតិនិងគោលនយោបាយ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ និងសម្ព័ន្ធអ្នកសារព័ត៌មានកម្ពុជា(CamboJA) បានចេញមកស្នើឲ្យមានការអនុម័តច្បាប់ស្តីពីសិទ្ធិទទួលព័ត៌មានឲ្យបាននៅក្នុងឆ្នាំនេះ។ ការស្នើសុំនេះគឺបន្ទាប់ពីពួកគេមើលឃើញថា សេចក្តីព្រាងច្បាប់មួយនេះហាក់មានសភាពយឺតយ៉ាវ ពោលគឺមិនទាន់មានការឆ្លងសេចក្តីសម្រេចទៅដល់គណៈរដ្ឋមន្រ្តីឬស្ថាប័នច្បាប់ជាន់ខ្ពស់ដូចជាសភានៅឡើយ។
បើតាមលោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា (CamboJA) បានលើកឡើងថា ការអនុម័តច្បាប់ស្តីពីសិទ្ធិទទួលព័ត៌មានជារឿងមួយដ៏សំខាន់ ដោយម្យ៉ាងទៀតច្បាប់នេះនឹងមានសមត្ថភាពជួយជំរុញឲ្យមានការចូលរួមពីសំណាក់ប្រជាពលរដ្ឋជុំវិញបញ្ហាសង្គម។
ដោយឡែក ទន្ទឹមនឹងការពន្លឿនច្បាប់ស្តីពីសិទ្ធិទទួលព័ត៌មានឲ្យមានការអនុម័តបានឆាប់រហ័ស សង្គមស៊ីវិលព្រមទាំងស្ថាប័នព័ត៌មានក៏បានជំរុញឲ្យមានការយកចិត្តទុកដាក់ខ្ពស់ចំពោះចំណុចខ្វះខាតនៅក្នុងសេចក្តីព្រាងច្បាប់នាពេលបច្ចុប្បន្ន ដោយជាពិសេសគឺត្រង់ចំណុចជំពូកទី៣ ដែលចែងអំពីនីតិវិធីស្នើសុំនិងផ្តល់ព័ត៌មាន និងជំពូកទី៤ចែងអំពីព័ត៌មានសម្ងាត់។ បើតាមលោក ណុប វី ដដែល នីតិវិធីស្នើសុំនិងផ្តល់ព័ត៌មានគួរណាបន្ថយពេលវេលាពី១៥ថ្ងៃមកត្រឹម៥ថ្ងៃក្នុងការឆ្លើយតប។ រីឯព័ត៌មានសម្ងាត់ គួរណាកំណត់និយមន័យ និងរបៀបបែងចែកខ្លឹមសារព័ត៌មានសម្ងាត់ឲ្យបានច្បាស់លាស់ និងលម្អិត ដោយកុំឲ្យមានភាពទូលំទូលាយជ្រុល។
គួរបញ្ជាក់ថាសេចក្តីព្រាងច្បាប់ស្តីពីសិទ្ធិទទួលព័ត៌មានបានអនុញ្ញាតឲ្យតាក់តែងនៅឆ្នាំ២០១៣ ដោយមានក្រសួងព័ត៌មានជាអ្នកទទួលបន្ទុក។ ច្បាប់ស្តីពីសិទ្ធិទទួលព័ត៌មានដែលមាន៩ជំពូក និង៣៨មាត្រានេះមានគោលបំណងធានាឲ្យសាធារណជនគ្រប់រូបនូវសិទ្ធិសេរីភាពក្នុងការទទួលព័ត៌មានពីសាធារណៈដោយស្របទៅតាមរដ្ឋធម្មនុញ្ញកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ