ក្រសួងការងារគ្រោងបញ្ជូនវិសោធនកម្មច្បាប់ស្តីពីការងារទៅអន្តរក្រសួង ទោះសហជីពពហិការ
ក្រសួងការងារនិងបណ្តុះបណ្តាលវិជ្ជាជីវៈ គ្រោងនឹងបញ្ជូនសេចក្តីព្រាងច្បាប់ ស្តីពីវិសោធនកម្មច្បាប់ការងារ ឆ្លងកិច្ចប្រជុំអន្តរក្រសួងនៅពេលខាងមុខនេះ បន្ទាប់ពីក្រសួងបានបញ្ចប់កិច្ចពិភាក្សាក្រុមការងារត្រីភាគីបូកកាលពីដើមសប្តាហ៍នេះ។ កិច្ចប្រជុំត្រីភាគីបូក ដែលភាគីសហជីពឯករាជ្យចំនួន៦ បានបដិសេធមិនចូលរួម ដោយសារពួកគេយល់ថា ជាការខាតបង់ប្រយោជន៍សម្រាប់កម្មករ។
ចុះផ្សាយនៅថ្ងៃ៖
ក្រសួងការងារនិងបណ្តុះបណ្តាលវិជ្ជាជីវៈ បានប្រកាសថា ខ្លួននឹងបន្តនីតិវិធីជាធរមាន ដោយបញ្ចូនសេចក្តីព្រាងច្បាប់ស្តីពីការងារនេះ ឆ្លងកិច្ចប្រជុំអន្តរក្រសួង ក្នុងគោលបំណងទទួលបានការអនុម័តច្បាប់នេះឱ្យបានឆាប់ ដើម្បីឆ្លើយតបតាមតម្រូវការរបស់ភាគីពាក់ព័ន្ធ។
គួរជំរាបជូនថា ក្រុមការងារយន្ដការត្រីភាគីបូក ដែលដឹកនាំដោយរដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ កាលពីថ្ងៃទី ១៥ កញ្ញា បានបញ្ចប់ការពិភាក្សាគ្នាទៅលើការធ្វើវិសោធនកម្មច្បាប់ស្តីពីការងារមួយជំហានទៀតហើយ បើទោះណាជាកិច្ចប្រជុំនេះ ត្រូវបានពហិកាពីក្រុមមេដឹកនាំសហជីពឯករាជ្យធំៗចំនួន៦ក្តី។
បើតាមលោក អ៊ិត សំហេង ការធ្វើវិសោធនកម្មច្បាប់ស្តីពីការងារត្រង់មាត្រា១៤៤ ស្តីពីការកែសម្រួលអត្រាប្រាក់ឈ្នួលការងារពេលយប់ពី១៣០% មកនៅត្រឹម១០០% វិញនោះ គឺដើម្បីបង្កើតនិងបង្កើនឱកាសការងារកាន់តែសម្បូរណ៍បែបជូនដល់ប្រជាពលរដ្ឋខ្មែរ និងចូលរួមចំណែកអភិវឌ្ឍសេដ្ឋកិច្ចកម្ពុជាតែប៉ុណ្ណោះ។ ការធ្វើវិសោធនកម្មនេះ វាមិនប៉ះពាល់ដល់ផលប្រយោជន៍របស់កម្មករនិយោជិត ដែលកំពុងបម្រើការងារជាការងារពេលយប់ម្តងម្កាលឬឆ្លាស់វេនគ្នានោះទេ ដោយហេតុថាចំណុចនេះអនុវត្តចំពោះតែកម្មករនិយោជិតដែលបំពេញការងារពេលយប់ជាប្រចាំតែប៉ុណ្ណោះ។ រីឯការលុបការឈប់នៅថ្ងៃបន្ទាប់សម្រាប់ថ្ងៃឈប់សម្រាកបុណ្យចំថ្ងៃអាទិត្យ ក៏មិនផ្ទុយនឹងអនុសញ្ញាអន្តរជាតិខាងការងារនោះដែរ។ បើតាមលោក អ៊ិត សំហេង ការធ្វើវិសោធនកម្មនេះ មានគោលបំណងជំរុញផលិតភាពការងារនិងលើកកម្ពស់ការប្រកួតប្រជែងរបស់កម្ពុជា ក្នុងការសម្រួលដល់ការធ្វើវិនិយោគនិងការអភិវឌ្ឍប្រទេសជាតិ ខណៈកម្ពុជានៅតែជាប្រទេសមួយដែលមានម៉ោងការងារតិចជាងបណ្តាប្រទេសនៅក្នុងតំបន់។
ប៉ុន្តែយ៉ាងណាក្តី តាមរយៈសេចក្តីថ្លែងការណ៍ កាលពីថ្ងៃទី ១៥ កញ្ញា សហជីពធំៗចំនួន៦ បានលើកឡើងថា កិច្ចប្រជុំក្រុមការងារត្រីភាគីបូក សម្រាប់ពិភាក្សាការងារធ្វើវិសោធនកម្មច្បាប់ស្តីពីការងារ ដើម្បីឈានទៅរកការធ្វើវិសោធនកម្មមាត្រា ១៤៤ និងមាត្រា ១៦២ នឹងនាំអោយខាតបង់ផលប្រយោជន៍ផ្នែកសេដ្ឋកិច្ចដល់កម្មករនិយោជិតដែលស្ថិតនៅក្រោមវិសាលភាពច្បាប់ស្តីពីការងារកម្ពុជា។ តំណាងសហជីពកម្ពុជាបានអំពាវនាវដើម្បីស្នើសុំឱ្យក្រសួងការងារបដិសេធការធ្វើវិសោធនកម្មច្បាប់ការងារ ដូចដែលភាគីសហជីពបានស្នើសុំនៅក្នុងដំណាក់កាលទី១ និងទី២ផងដែរ។
យ៉ាងណាក៏ដោយ អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈលោក ហេង សួរ បានថ្លែងប្រាប់វិទ្យុបារាំងអន្ដរជាតិ RFI នៅថ្ងៃអាទិត្យនេះថា ក្រោយការធ្វើវិសោធនកម្មច្បាប់នេះទៅ កម្ពុជាអាចនឹងមានការវិនិយោគឧស្សាហកម្មបែបថ្មី ដែលមានការងាថ្មីច្រើនជាងមុនចំនួន១០%។ ហើយប្រជាពលរដ្ឋកម្ពុជា ក៏មានជម្រើសម៉ោងការងារច្រើនជាងមុន ដែលធ្វើឲ្យចំនួនអ្នកមានការងារធ្វើក្នុងគ្រួសារនីមួយៗ អាចកើនលើសពី ១នាក់ ហើយគ្រួសារនីមួយៗអាចមានជីវភាពធូរធារជាងមុន។ បើតាមលោក ហេង សួរ បានចាត់ទុកការធ្វើពហិការរបស់សហជីពធំៗទាំង៦ថា គ្រាន់តែជាសម្លេងភាគតិចប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ