ថ្ងៃបុណ្យភ្ជុំបិណ្ឌ៖ អ្នកនយោបាយផ្ញើសារជូនពរពលរដ្ឋកម្ពុជារៀងៗខ្លួន ខណៈអ្នកវិភាគសុំអោយមានឯកភាពជាតិ
ថ្ងៃទី ១៧ កញ្ញានេះ គឺជាថ្ងៃបុណ្យភ្ជុំបិណ្ឌ ឬភ្ជុំធំ ដែលប្រជាពលរដ្ឋកម្ពុជាកំពុងប្រារព្ធធ្វើឡើងទាំងនៅក្នុងនិងក្រៅប្រទេស។ នៅថ្ងៃនេះ ប្រមុខរដ្ឋាភិបាលកម្ពុជា និងអតីតប្រធានគណបក្សប្រឆាំងបានផ្ញើសារជូនពរដល់ប្រជាពលរដ្ឋកម្ពុជារៀងៗខ្លួន ខណៈអ្នកវិភាគសង្គមនយោបាយវិញ បានអំពាវនាវអោយអ្នកនយោបាយមានឯកភាពជាតិនៅក្នុងស្មារតីនៃបុណ្យភ្ជុំបិណ្ឌ។
ចុះផ្សាយនៅថ្ងៃ៖
ស្តាប់ - ០២:៥៣
«ដោយសារប្រទេសយើងមានសុខសន្តិភាពពេញលេញ ទើបយើងមានឱកាសប្រារព្ធពិធីបុណ្យតូចធំជាច្រើនដោយគ្មានការភ័យខ្លាច»។ នេះគឺជាសាររបស់លោកនាយករដ្ឋមន្ត្រី ហ៊ុន សែន ដែលបានសរសេរនៅលើគណនីយហ្វេសប៊ុករបស់លោកកាលពីថ្ងៃទី ១៦ កញ្ញា។ ក្រៅពីបានសួរសុខទុក្ខជនរួមជាតិរបស់ខ្លួនហើយ លោកនាយករដ្ឋមន្ត្រី ហ៊ុន សែន ឆ្លៀតនៅក្នុងឱកាសនេះ អំពាវនាវអោយប្រជាពលរដ្ឋមានការប្រុងប្រយ័ត្នខ្ពស់ ចំពោះបញ្ហាអគ្គិភ័យ ដែលអាចបណ្តាលមកពីការដុតធូប ទៀន នៅតាមទីកន្លែងសក្ការៈបូជាផ្សេងៗ។ ទន្ទឹមនឹងនេះ លោកនាយករដ្ឋមន្ត្រីក៏បានក្រើនរំលឹកអោយប្រជាពលរដ្ឋយកចិត្តទុកដាក់ថែរក្សាការពារសុខភាព កុំអោយឆ្លងជំងឺកូវីដ-១៩ (Covid-19) ផងដែរ។ សម្រាប់លោកនាយករដ្ឋមន្ត្រី ហ៊ុន សែន នៅថ្ងៃបុណ្យភ្ជុំបិណ្ឌនេះ លោករួមជាមួយភរិយា ព្រមទាំងក្រុមគ្រួសារសាច់ញាតិ និងមន្ត្រីអ្នកមុខអ្នកការជាច្រើនរូបទៀត បានអញ្ជើញទៅចូលរួមពិធីបុណ្យភ្ជុំបិណ្ឌ ជាមួយពុទ្ធបរិស័ទនៅក្នុងវត្តហរិរក្សជិនី (វត្តវាំងចាស់) ស្ថិតនៅឃុំវាំងចាស់ ក្នុងស្រុកឧដុង្គ ខេត្តកំពង់ស្ពឺ។ វត្តវាំងចាស់ គឺជាវត្តមួយដែលលោកនាយករដ្ឋមន្ត្រីនិងភរិយា ពុំដែលខកខានទៅមួយឆ្នាំណាសោះឡើយ។
ពីចំណែកលោក កឹម សុខា អតីតប្រធានគណបក្សប្រឆាំងវិញ នៅថ្ងៃបុណ្យភ្ជុំបិណ្ឌ ថ្ងៃ ១៥រោច ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ១៧ ខែកញ្ញា ឆ្នាំ២០២០នេះ លោកក៏បានអញ្ជើញទៅបុណ្យភ្ជុំបិណ្ឌ នៅក្នុងវត្តស្វាយទោង ស្ថិតក្នុងខេត្តកំពង់ចាមផងដែរ។ តាមរយៈទំព័រហ្វេសប៊ុករបស់ខ្លួន លោក កឹម សុខា បានបួងសួងដល់គុណបុណ្យព្រះរតនត្រ័យ បារមីវត្ថុស័ក្តិសិទ្ធិ អោយជួយប្រោះព្រំប្រទេសកម្ពុជា និងប្រជាពលរដ្ឋខ្មែរ ជួបតែសេចក្តីសុខ សេចក្តីចម្រើន ជាពិសេសសូមឲ្យចៀសផុតពីគ្រោះមហន្តរាយទាំងឡាយ។ ដោយឡែកពីក្រៅប្រទេសឯណោះវិញ លោក សម រង្ស៊ី អតីតប្រធានគណបក្សប្រឆាំង ទោះបីជាមិនបានចូលរួមពិធីបុណ្យភ្ជុំបិណ្ឌនៅក្នុងប្រទេសកម្ពុជាក្តី ប៉ុន្តែលោកក៏បានចូលរួមកាន់បិណ្ឌនៅក្នុងវត្តធម្មរង្សី ក្បែរទីក្រុងប៉ារីសប្រទេសបារាំង កាលពីថ្ងៃ ១៣ កញ្ញា ផងដែរ។ ថ្លែងទៅកាន់ពុទ្ធបរិស័ទខ្មែរ ក្នុងឱកាសបុណ្យកាន់បិណ្ឌនោះ លោក សម រង្ស៊ី បានលើកឡើងថា ពិធីបុណ្យភ្ជុំបិណ្ឌ គឺជាការរំលឹកនឹកគុណដល់បុព្វបុរស ជីដូនជីតា និងជាពិសេសរំលឹកគុណដល់វីរៈបុរសខ្មែរ ដែលបានលះបង់ជីវិតដើម្បីការពារប្រទេសកម្ពុជា។ សម្រាប់អតីតប្រធានគណបក្សប្រឆាំងរូបនេះ លោកបានអំពាវនាវអោយកូនខ្មែរ យកគំរូតាមវីរៈបុរសខ្មែរដែលហ៊ានលះបង់អាយុជីវិត ដើម្បីការពារប្រទេសជាតិអោយគង់វង្សតទៅមុខទៀត។ ដោយឡែកអ្នកវិភាគនយោបាយជើងចាស់ លោកបណ្ឌិត ឡៅ ម៉ុងហៃ ឯណោះវិញ ក៏បានសរសេរនៅលើទំព័រហ្វេសប៊ុករបស់លោកដែរថា ភ្ជុំបិណ្ឌ គួរដោតទង់ជាតិនិងទង់ព្រះពុទ្ធសាសនាគ្រប់ផ្ទះ ដើម្បីបង្ហាញសេចក្តីស្នេហាជាតិនិងឯកភាពជាតិ ក្រោមព្រះឆ័ត្រនិងក្រោមព្រះពុទ្ធសាសនា ដែលជាគោលបំណងរបស់ព្រះបាទ អង្គ ឌួង ដែលបានរៀបចំឲ្យធ្វើបុណ្យពុទ្ធសាសនាដ៏ធំពិសេសខុសផ្លែកពីនៅប្រទេសកាន់ព្រះពុទ្ធសាសនាឯទៀតៗ។ ឆ្លៀងនៅក្នុងឱកាសនេះ អ្នកវិភាគនយោបាយជើងចាស់រូបនេះ ក៏បានអំពាវនាវអោយអ្នកនយោបាយមានឯកភាពជាតិ នៅក្នុងស្មារតីនៃបុណ្យភ្ជុំបិណ្ឌ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ