ក្រសួងយុត្តិធម៌៖ រយៈពេល១០០ថ្ងៃ សំណុំរឿងដែលកកស្ទះនៅតាមតុលាការ៦៣%ត្រូវបានដោះស្រាយ
យ៉ាងហោចណាស់មានសំណុំរឿងព្រហ្មទណ្ឌចំនួន ៨ ១១៣ ស្មើនឹង៦៣% នៃសំណុំរឿងដែលកកស្ទះនៅក្នុងតុលាការសាលាដំបូងរាជធានីខេត្តនៅទូទាំងប្រទេស ត្រូវបានដោះស្រាយ។ ប៉ុន្តែសេចក្តីប្រកាសរបស់ក្រសួងយុត្តិធម៌ កាលពីថ្ងៃទី ២៨ សីហា នៅមិនទាន់បញ្ជាក់នៅឡើយទេថា តើមានអ្នកជាប់ឃុំចំនួនប៉ុន្មាននាក់ ត្រូវបានដោះលែងនៅឡើយទេ ខណៈមន្ត្រីអង្គការសិទ្ធិមនុស្សលីកាដូ បានស្វាគមន៍លទ្ធផលរយៈពេល១០០ថ្ងៃមកនេះ ប៉ុន្តែបានអំពាវនាវអោយពន្លឿនការដោះស្រាយបន្ថែមទៀត និងប្រកបដោយយុត្តិធម៌។
ចុះផ្សាយនៅថ្ងៃ៖
ស្តាប់ - ០២:៥៤
យោងតាមលទ្ធផលរយៈពេល១០០ថ្ងៃនៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមតុលាការសាលាដំបូងរាជធានីខេត្តនៅទូទាំងប្រទេស យ៉ាងហោចណាស់មានសំណុំរឿងព្រហ្មទណ្ឌចំនួន៨ ១១៣ ស្មើនឹង៦៣% ត្រូវបានដោះស្រាយ។ បើតាមក្រសួងយុត្តិធម៌ដដែល លទ្ធផលនេះ គឺបានមកពីកិច្ចខិតខំប្រឹងប្រែងដោះស្រាយ ជាមួយនឹងបញ្ហាប្រឈមនានានៅតាមបណ្ដាសាលាដំបូងរាជធានី ខេត្ត ដោយក្រុមការងារទាំង៤និងលេខាធិការដ្ឋានរបស់គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត (គ.យ.ក.ស) និងជាពិសេសដោយមានការចូលរួមដ៏សកម្មប្រកបដោយឆន្ទៈ និងស្មារតីទទួលខុសត្រូវខ្ពស់ ពីសំណាក់ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា មន្ត្រី រាជការ នៃអង្គភាពរដ្ឋបាលនៃសាលាជម្រះក្ដីទាំងអស់ រួមទាំងស្ថាប័នពាក់ព័ន្ធនានាផង។ នេះបើយោងតាមសេចក្តីប្រកាសព័ត៌មានរបស់ក្រសួងយុត្តិធម៌ កាលពីថ្ងៃទី ២៨ សីហា។
គួរជំរាបជូនថា ក្រសួងយុត្តិធម៌បានប្រកាសដាក់ចេញយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានីខេត្ត កាលពីថ្ងៃទី ១៨ ខែឧសភា កន្លងទៅ។ យុទ្ធនាការនេះ បានធ្វើឡើងបន្ទាប់ពីមានការចេញផ្សាយរបាយការណ៍រិះគន់ពីសំណាក់អង្គការសង្គមស៊ីវិល ជុំវិញកំណើនអ្នកជាប់ពន្ធនាគារនៅក្នុងប្រទេសកម្ពុជា ចាប់តាំងពីរដ្ឋាភិបាលបានដាក់ចេញនូវយុទ្ធនាការបង្ក្រាបគ្រឿងញៀននៅទូទាំងប្រទេស កាលពីខែមករា ឆ្នាំ ២០១៧មក។ ចាប់តាំងពីខែមករា ឆ្នាំ ២០១៧មក មានមនុស្សប្រមាណជា ៥៥ ៧៧០នាក់ ត្រូវបានចោទប្រកាន់ពាក់ព័ន្ធនឹងបទល្មើសគ្រឿងញៀន និងត្រូវបានឃុំខ្លួននៅក្នុងពន្ធនាគារ និងនៅមជ្ឈមណ្ឌលបន្សាបគ្រឿងញៀន ដែលមានសភាពចង្អៀតណែនខ្លាំង និងគ្មានអនាម័យស្រាប់ទៅហើយនោះ។ បើផ្អែកតាមការអង្កេតមួយដែលធ្វើឡើងដោយអង្គការសិទ្ធិមនុស្សលីកាដូ អ្នកជាប់ឃុំក្នុងពន្ធនាគារនៅកម្ពុជាបានកើនឡើងពីចំនួន២១ ៩០០នាក់ នៅចុងឆ្នាំ ២០១៦ ដល់ចំនួន ៣៨ ៩៩០នាក់ គិតត្រឹមខែមីនា ឆ្នាំ ២០២០ បើទោះបីជាពន្ធនាគារនៅកម្ពុជាត្រូវបានគេប៉ាន់ប្រមាណថា អាចផ្ទុកមនុស្សបានត្រឹមតែ២ ៦៥៩៣នាក់ក្តី។
យ៉ាងណាក៏ដោយ មន្ត្រីអង្គការសិទ្ធិមនុស្សលីកាដូ លោក អុំ សំអាត បានស្វាគមន៍ចំពោះលទ្ធផលរយៈពេល១០០ថ្ងៃនៃយុទ្ធនាការដោះស្រាយការកកស្ទះសំណុំរឿងនៅតាមតុលាការសាលាដំបូងរាជធានី ខេត្តនេះ ដែលជាមធ្យោបាយមួយដើម្បីដោះស្រាយការឃុំខ្លួនមនុស្សនៅក្នុងពន្ធនាគារលើសលុប។ ប៉ុន្តែទន្ទឹមគ្នានេះ លោក អុំ សំអាត បានអំពាវនាវអោយគណៈកម្មការនេះ ពន្លឿនការដោះស្រាយសំណុំរឿងបន្ថែមទៀត និងប្រកបដោយយុត្តិធម៌ ខណៈគណៈកម្មការដឹកនាំយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី ខេត្តរំពឹងទុកដែរថា សាលាដំបូងរាជធានី-ខេត្តនៅទូទាំងប្រទេស នឹងបន្តខិតខំដោះស្រាយការកកស្ទះសំណុំរឿងនៅតាមអង្គភាពអោយបានចប់សព្វគ្រប់ នៅត្រឹមដំណាច់ឆ្នាំ២០២០នេះ ដោយប្រកាន់ខ្ជាប់នូវអភិក្រមការងារបួន នៅក្នុងយុទ្ធនាការនេះ គឺ «លឿន ត្រឹមត្រូវ យុត្តិធម៌ និងមិនពុករលួយ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ