កូវីដ ១៩៖ មន្ទីរពេទ្យកុមារអង្គរ កំពុងប្រឹងប្រែងរកជំនួយក្នុងស្រុក ៦សែនដុល្លារ សម្រាប់ដំណើរការឲ្យចប់ឆ្នាំ ២០២០
ប្រឈមនឹងវិបត្តិនៃជំងឺកូវីដ ១៩ ដែលធ្វើឲ្យការទទួលជំនួយពីក្រៅប្រទេស ធ្លាក់ចុះ មន្ទីរពេទ្យកុមារអង្គរ ដែលជាមន្ទីរពេទ្យ ពិនិត្យ ព្យាបាលជំងឺកុមារដោយឥតគិតថ្លៃ តាំងពីឆ្នាំ ១៩៩៩ បាននឹងកំពុងព្យាយាមកៀងគរជំនួយក្នុងស្រុក ដើម្បីទ្រទ្រង់ដល់ដំណើរការរបស់មន្ទីរពេទ្យ រហូតដល់ចប់ឆ្នាំ ២០២០នេះ។ មន្ទីរពេទ្យកុមារអង្គរ បានសម្រេចរៀបចំពិធីបុណ្យផ្កាប្រាក់មហាសាមគ្គី នៅថ្ងៃទី ៣០ខែសីហា ក្នុងវត្តរាជបូណ៌ ក្រុងសៀមរាប ដោយរំពឹងថា នឹងទទួលបានជំនួយក្នុងស្រុកចំនួន ៦សែនដុល្លារ សម្រាប់ដំណើរការទៅមុខ ក្នុងការឆ្លើយតបនឹងភាពខ្វះខាត នៅពេលបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០២:១៦
ពិធីបុណ្យផ្កាប្រាក់មហាសាមគ្គី ឆ្នាំ ទី ៧ របស់មន្ទីរពេទ្យកុមារអង្គរ (Angkor Hospital for Children) ដែលគ្រោងធ្វើនៅថ្ងៃទី ៣០ខែសីហា រំពឹងថា នឹងអាចរៃអង្គាសថវិកា ដើម្បីយកទៅប្រើប្រាស់ ក្នុងការផ្តល់សេវាសុខភាពជួយសង្គ្រោះជីវិតកុមារកម្ពុជា ដោយឥតគិតកម្រៃ ប្រកបដោយគុណភាពខ្ពស់ និងក្តីមេត្តា យ៉ាងតិចណាស់ ៤០០នាក់ ក្នុងមួយថ្ងៃៗ។
តំណាងមន្ទីរពេទ្យកុមារអង្គរ បានឲ្យដឹងថា វិបត្តិកូវីដ ១៩ បានញុំាងឲ្យមន្ទីរពេទ្យត្រូវកាត់បន្ថយគម្រោងថវិកាប្រចាំឆ្នាំ ពី ៦លាន៥សែនដុល្លារ មកនៅត្រឹមតែ ៥លាន៩សែនដុល្លារ ក្នុងឆ្នាំ ២០២០នេះ។ យ៉ាងណាមិញ លោកទេព ណាវី នាយកប្រតិបត្តិមន្ទីរពេទ្យកុមារអង្គរ បានឲ្យដឹងថា នៅមានសប្បុរសជន ឬ អង្គភាពមូលនិធិក្រៅប្រទេសមួយចំនួន បានបន្តប្តេជ្ញាផ្តល់ជំនួយ ៣លាន៣សែនដុល្លារ ដើម្បីជួយដល់មន្ទីរពេទ្យ សម្រាប់ឆ្នាំ ២០២០នេះ។
ដូច្នេះថវិកានៅសេសសល់ គឺតម្រូវឲ្យមន្ទីរពេទ្យ ត្រូវព្យាយាមកៀងគរពីជំនួយក្នុងស្រុក។ បើតាមលោក ទេព ណាវី មន្ទីរពេទ្យ បានព្យាយាមស្វែងរកថវិកាប្រមាណ ៦សែនដុល្លារពីសប្បុរសជនក្នុងស្រុក ខណៈថវិកាដែលខ្វះខាតផ្សេងទៀត មន្ទីរពេទ្យ នឹងព្យាយាមរកពីខាងក្រៅបន្តទៀត។
គួរជម្រាបជូនថា មន្ទីរពេទ្យកុមារអង្គរ ជាអង្គភាពមិនស្វែងរកប្រាក់ចំនេញ ដែលមានបេសកកម្មលើកកម្ពស់សុខុមាលភាពកុមារកម្ពុជាគ្រប់រូប។ មិនត្រឹមតែផ្តល់សេវាសុខាភិបាលដល់កុមារ តាំងពីជាង ២០ឆ្នាំមកទេ តែមន្ទីរពេទ្យកុមារអង្ករ ក៏ជាមជ្ឈមណ្ឌលបណ្តុះបណ្តាលវេជ្ជសាស្ត្រ របស់សិស្ស និស្សិត និងមន្ត្រីសុខាភិបាលផ្សេងទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ