ក្រុមអង្គការសង្គមស៊ីវិលជំរុញឱ្យក្រសួងមហាផ្ទៃពន្លឿនការធ្វើវិសោធនកម្មច្បាប់NGOsឱ្យបានលឿន
នៅព្រឹកថ្ងៃអង្គារនេះ ក្រុមអង្គការសង្គមស៊ីវិលនៅកម្ពុជាបានរៀបចំសិក្ខាសាលាថ្នាក់ជាតិស្តីពីសំណើអនុសាសន៍ ដើម្បីធ្វើវិសោធនកម្មច្បាប់ស្តីពីសមាគម និងអង្គការមិនមែនរដ្ឋាភិបាលនៅសណ្ឋាគារសាន់វេយ៍ រាជធានីភ្នំពេញ។ សិក្ខាសាលានេះ ធ្វើឡើងបន្ទាប់ពីក្រុមអង្គការសង្គមស៊ីវិលបានបញ្ចប់ការផ្តល់យោបល់ដល់ក្រសួងមហាផ្ទៃ ដើម្បីជំរុញឱ្យធ្វើវិសោធនកម្មច្បាប់មួយនេះ។ មកដល់ពេលនេះ ក្រសួងមហាផ្ទៃមិនទាន់សម្រេចយ៉ាងណានៅឡើយទេ។ ប៉ុន្តែ ក្រុមអង្គការសង្គមស៊ីវិលបានជំរុញឱ្យក្រសួងមហាផ្ទៃពន្លឿនតាក់តែងសេចក្តីព្រាងវិសោធនកម្មច្បាប់នេះ។
ចុះផ្សាយនៅថ្ងៃ៖
ស្តាប់ - ០២:៣២
លោកយង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍ និងសន្តិភាព បានអះអាងឱ្យដឹងថា មកដល់ពេលនេះ ក្រុមអង្គការសង្គមស៊ីវិលមិនទាន់ទទួលបានការឆ្លើយតបណាមួយទៅនឹងសំណើរសុំធ្វើវិសោធនកម្មច្បាប់ស្តីពីសមាគម និង អង្គការមិនមែនរដ្ឋាភិបាលពីសំណាក់ក្រុមការងាររាជរដ្ឋាភិបាលឡើយ ដោយគ្រាន់តែបញ្ជាក់ថា នឹងដាក់អនុសាសន៍របស់ក្រុមអង្គការសង្គមស៊ីវិលជូនរាជរដ្ឋាភិបាល ដើម្បីធ្វើការសម្រេច។ ក្រុមអង្គការសង្គមស៊ីវិលបានបិទបញ្ចប់ការពិគ្រោះ និងផ្តល់យោបល់ និងដាក់អនុសាសន៍ដល់ក្រសួងមហាផ្ទៃកាលពីថ្ងៃទី០៧ ខែកក្កដាកន្លងទៅ ក្នុងគោលបំណងជម្រុញឱ្យក្រសួងមហាផ្ទៃធ្វើវិសោធនកម្មច្បាប់សមាគម និងអង្គការមិនមែនរដ្ឋាភិបាល។
លោកប៊ុន ហ៊ុន រដ្ឋលេខាធិការក្រសួងមហាផ្ទៃដែលទទួលខុសត្រូវជួបប្រជុំពិភាក្សាជាមួយក្រុមអង្គការសង្គមស៊ីវិលពាក់ព័ន្ធនឹងបញ្ហាវិសោធនកម្មច្បាប់នេះ មិនទាន់អាចទាក់ទងសុំការអត្ថាធិប្បាយបាននៅឡើយទេនៅព្រឹកថ្ងៃអង្គារនេះ។ យ៉ាងណាក៏ដោយ ក្រុមអង្គការសង្គមស៊ីវិលអះអាងថា នឹងបន្តតាមដាន និងជំរុញឱ្យមានការពន្លឿនការតាក់តែងសេចក្តីព្រាង និងការធ្វើវិសោធនកម្មច្បាប់នេះឱ្យបានឆាប់បំផុត។ ម្យ៉ាងទៀត នឹងបន្តសហការក្នុងការជជែកលើខ្លឹមសារនៃសេចក្តីព្រាងវិសោធនកម្មច្បាប់មួយនេះ។
ក្រុមអង្គការសង្គមស៊ីវិលនៅកម្ពុជាប្រមាណ៥០០ បានស្នើសុំឱ្យក្រសួងមហាផ្ទៃធ្វើវិសោធនកម្មច្បាប់សមាគម និងអង្គការមិនមែនរដ្ឋាភិបាលលើមាត្រាចំនួន១៤ គឺមាត្រា១,៧,៨,៩,១០,១១,២០,២៤, ២៥, ២៦,៣០,៣១,៣២ និងមាត្រា៣៥។ តាមក្រុមអង្គការសង្គមស៊ីវិល មាត្រាទាំង១៤នេះ គឺមានឧបសគ្គនៅក្នុងការចុះបញ្ជី ការចូលរួមនៅក្នុងការអភិវឌ្ឍផ្សេងៗ កិច្ចសហការរវាងអង្គការសង្គមស៊ីវិល ហើយមាត្រាខ្លះបានផ្តល់ឱកាសឱ្យមន្ត្រីរដ្ឋាភិបាលបកស្រាយកាលៈទេសៈ ឬស្ថានភាពនយោបាយ។ លើសពីនេះទៅទៀត ពួកគេថា ការតម្រូវឱ្យដាក់របាយការណ៍ និងការជូនដំណឹងពីការផ្លាស់ប្តូរលក្ខន្តិកៈ ទីស្នាក់ការ ឬពត៌មានគណនី គឺបានបង្កឱ្យមានភាពមិនច្បាស់លាស់នៃស្វ័យភាពរបស់សមាគម និងអង្គការមិនមែនរដ្ឋាភិបាល ថាតើពួកគេជាស្ថាប័នចំណុះឱ្យស្ថាប័នរដ្ឋ ឬជាស្ថាប័នឯករាជ្យដែលដៃគូជាមួយរដ្ឋាភិបាលកម្ពុជា។
សម្រាប់លោកយង់ គឹមអេង ច្បាប់ស្តីពីសមាគម និងអង្គការមិនមែនរដ្ឋាភិបាល គឺជាច្រកទា្វរនៃសេរីភាពរបស់សង្គមស៊ីវិល ក្នុងការចូលរួមចំណែកអភិវឌ្ឍប្រទេសជាតិ និងក្លាយជាដៃគូពិតប្រាកដជាមួយរដ្ឋាភិបាល។ លោកបានគូសបញ្ជាក់ថា ច្រកទ្វារមួយនេះ បើកចំហធំឬតូចអាស្រ័យលើកិច្ចខិតខំប្រឹងប្រែងរួមគ្នារវាងអង្គការសង្គមស៊ីវិល ក៏ដូចជាដៃគូអភិវឌ្ឍន៍ និងម្ចាស់ជំនួយនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ