ក្រុមយុវជនស្វែងរកការអន្តរាគមន៍ពីអង្គការសហប្រជាជាតិ ដើម្បីឱ្យដោះលែងលោករ៉ុង ឈុន
នៅព្រឹកថ្ងៃចន្ទនេះ ក្រុមយុវជន និងសាច់ញាតិលោករ៉ុង ឈុន បានទៅជួបជុំគ្នានៅមុខការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា។ ការជួបជុំគ្នានេះ គឺដើម្បីដាក់ញត្តិស្នើសុំឱ្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សជួយអន្តរាគមន៍ទៅកាន់រដ្ឋាភិបាលកម្ពុជាឱ្យដោះលែងលោករ៉ុង ឈុន។ លោករ៉ុង ឈុន ត្រូវបានអាជ្ញាធរកម្ពុជាចាប់ និងឃុំខ្លួននៅក្នុងពន្ធនាគារ បន្ទាប់ពីនិយាយរឿងពាក់ព័ន្ធនឹងបញ្ហាព្រំដែនកម្ពុជា-វៀតណាម។
ចុះផ្សាយនៅថ្ងៃ៖
ស្តាប់ - ០២:១១
បន្ទាប់ពីតវ៉ាបរាជ័យនាពេលកន្លងមក នៅពេលនេះ ក្រុមយុវជននិង សាច់ញាតិលោករ៉ុង ឈុន បានងាកមកស្វែងរកការជួយអន្តរាគមន៍ពីសំណាក់អង្គការសហប្រជាជាតិវិញម្តង។ ពួកគេបានទៅប្រមូលផ្តុំគ្នានៅពីមុខការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជានៅព្រឹកថ្ងៃចន្ទនេះ ដើម្បីដាក់ញត្តិស្នើសុំឱ្យការិយាល័យឧត្តមស្នងការអង្គការសហប្រជាជាតិនេះជួយអន្តរាគមន៍ទៅកាន់រដ្ឋាភិបាលកម្ពុជាឱ្យដោះលែងលោករ៉ុង ឈុនឱ្យមានសេរីភាពឡើងវិញ។ សម្រាប់ពួកគេ លោករ៉ុង ឈុន មិនមានទោសពៃអ្វីនោះទេ។
ក្រៅពីស្នើសុំលើករណីលោករ៉ុង ឈុននេះ តំណាងក្រុមយុវជននិង សាច់ញាតិលោករ៉ុង ឈុនបានអះអាងថា ពួកគេក៏ស្នើសុំឱ្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាជួយរំឮកប្រាប់រដ្ឋាភិបាលឱ្យគោរពសិទ្ធិមនុស្ស និង ងាកមករកមាគ៌ាប្រជាធិបតេយ្យឡើងវិញ។
តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា បានទទួលយកញត្តិរបស់ពួកគេ និង បានអះអាងថា កំពុងតាមដានយ៉ាងយកចិត្តទុកដាក់លើករណីលោករ៉ុង ឈុន។ បើតាមតំណាងក្រុមយុវជននិង សាច់ញាតិលោករ៉ុង ឈុន តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាប្រាប់ពួកគេថា នឹងជួយអន្តរាគមន៍លើបញ្ហាលោករ៉ុង ឈុននេះ។
លោកជិន ម៉ាលីន អ្នកនាំពាក្យក្រសួងយុត្តិធម៌ និងអនុប្រធានគណៈកម្មាធិការសិទ្ធិមនុស្សកម្ពុជាបានអះអាងថា ការដាក់ញត្តិរបស់ក្រុមយុវជន និងសាច់ញាតិលោករ៉ុង ឈុននេះ គឺជាសិទ្ធិសេរីភាពរបស់ពួកគេ។ ប៉ុន្តែលោកថា គ្មានស្ថាប័នអន្តរជាតិណាមួយអាចមកអន្តរាគមន៍ ឬ ជ្រៀតជ្រែកកិច្ចការរបស់តុលាការកម្ពុជាបានឡើយ។ លោកគូសបញ្ជាក់ថា ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាមិនត្រូវបានផ្តល់អាណត្តិដោយអង្គការសហប្រជាជាតិ ដើម្បីជ្រៀតជ្រែកកិច្ចការផ្ទៃក្នុងរបស់ប្រទេសណាមួយទេ។
លោករ៉ុង ឈុន ប្រធានសហភាពសហជីពកម្ពុជាត្រូវបានសាលាដំបូងរាជធានីភ្នំពេញឃុំខ្លួនជាបណ្តោះអាសន្ននៅពន្ធនាគារព្រៃស ដោយចោទប្រកាន់ពីបទចោទញុះញង់ឱ្យមានការប្រព្រឹត្តបទឧក្រិដ្ឋជាអាទិ៍។ ពាក់ព័ន្ធនឹងសំណុំរឿងលោក រ៉ុង ឈុន នេះគឺមានសកម្មជនជាង១០នាក់ត្រូវបានចាប់ខ្លួន និងរងអំពើហិង្សាជាបន្តបន្ទាប់ ខណៈពួកគេនាំគ្នាតវ៉ាករណីចាប់ខ្លួនអ្នករិះគន់បញ្ហាព្រំដែនរូបនេះ។ ក្នុងនោះមានមនុស្ស៦នាក់ត្រូវបានឃុំខ្លួនជាបណ្តោះអាសន្ននៅពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ