លោក ហង់ ជួនណារ៉ុន៖ ចេញមកបង្រៀនសិស្សលើមុខវិជ្ជាគណិតជាបំណងប្រាថ្នារបស់ខ្ញុំជាយូរមកហើយ
ចុះផ្សាយនៅថ្ងៃ៖
ស្តាប់ - ១០:២៦
ចាប់តាំងពីឡើងកាន់ដំណែងជារដ្ឋមន្ដ្រីអប់រំនៅឆ្នាំ២០១៣ លោក ហង់ ជួនណារ៉ុន បានមូរដៃអាវប្រឡូកក្នុងការងារកែទម្រង់វិស័យអប់រំយ៉ាងជោគជាំ រហូតទទួលបានការកោតសរសើរនិងលើកទឹកចិត្តពីគ្រប់មជ្ឈដ្ឋាន។ ថ្មីៗនេះ លោករដ្ឋមន្ដ្រីបានសាងភាពភ្ញាក់ផ្អើលមួយទៀត តាមរយៈការចេញមកបង្រៀនមុខវិជ្ជាគណិតដល់សិស្សថ្នាក់ទី១២។ នៅក្នុងជំនួបជាមួយ អេង គីមហុង លោក ហង់ ជួនណារ៉ុន គូសបញ្ជាក់ថា ការងារបង្រៀនសិស្សនេះ មិនមែនកើតឡើងដោយចៃដន្យទេ។ វាជាបំណងរបស់លោក ដែលប៉ងបង្រៀនសិស្សលើមុខវិជ្ជាគណិតជាយូរមកហើយ រាប់ចាប់តាំងពីលោកឡើងមកអង្គុយកៅអីរដ្ឋមន្ត្រីអប់រំនៅក្នុងឆ្នាំ២០១៣មកម្ល៉េះ។
«សូមជម្រាបសួរលោកគ្រូ អ្នកគ្រូ ជាទីគោរព! ប្អូនៗសិស្សានុសិស្សជាទីមេត្រី! ថ្ងៃនេះយើងជួបគ្នាម្ដងទៀតហើយ ដែលមេរៀនទី២របស់យើងនៅពេលនេះ គឺផ្ដោតទៅលើលីមីត្រនៃអនុគមន៍ត្រីកោណមាត្រ។ នៅក្នុងមេរៀននេះ មានពីរចំណុចសំខាន់ គឺទី១ប្អូនត្រូវចេះមេរៀនត្រីកោណមាត្រ និងលីមីត្រ ហើយមេរៀននេះតែងតែចេញប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនៅរៀងរាល់ឆ្នាំ។» នេះជាកិច្ចអន្តរាគមន៍បើកឆាកបង្រៀនមុខវិជ្ជាគិណិតវិទ្យារបស់លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា តាមរយៈវីដេអូថតនៅការិយាល័យរបស់លោកផ្ទាល់តែម្ដង នៅក្រសួងអប់រំ។ សកម្មភាពនៃការបង្រៀនរបស់លោករដ្ឋមន្ត្រីត្រូវបានផ្សព្វផ្សាយនៅទំព័រហ្វេសប៊ុកក្រសួងអប់រំដែលមានរយៈពេលជាងមួយម៉ោង។
នៅក្នុងការិយាល័យផ្ទាល់ខ្លួន ដែលហ៊ុំព័ទ្ធទៅដោយសៀវភៅនិងឯកសាររាប់មិនអស់ លោកហង់ ជួនណារ៉ុន ឆ្លៀតផ្ដល់បទសម្ភាសដល់អ្នកយកព័ត៌មានរបស់វិទ្យុបារាំងអន្តរជាតិ RFIថា ៧ឆ្នាំក្នុងបេសកកម្មកំណែទម្រង់វិស័យអប់រំនៅកម្ពុជា លោក ហង់ ជួនណារ៉ុន មើលឃើញថា អត្រាសិស្សប្រឡងជាប់មុខវិជ្ជាគណិតមានចំនួនតិចតួចនៅឡើយ ដោយរាប់ចាប់តាំងពីឆ្នាំ២០១៣មកដល់ឆ្នាំ២០១៩ អត្រាសិស្សប្រឡងជាប់មុខវិជ្ជាគណិតមានចំនួនតែ២០ភាគរយប៉ុណ្ណោះ។ ដូច្នេះហើយទើបលោកជ្រើសយកមុខវិជ្ជាគណិតវិទ្យាថ្នាក់ទី១២ មកបង្រៀនសិស្ស។«អត្រាប្រឡងជាប់នៅកម្រិតទាបបែបនេះព្រោះមុខវិជ្ជាគណិតពិបាកក្នុងការរៀន។ ដូច្នេះដើម្បីអាចរៀនគណិតវិទ្យាឲ្យពូកែនិងធ្វើលំហាត់ពេលប្រឡងបាក់ឌុបឲ្យបានចប់ គឺទាមទារឲ្យសិស្សត្រូវរៀនមូលដ្ឋានគ្រឹះតាំងពីថ្នាក់ទី៧មក។»
មូលដ្ឋានគ្រឹះរឹងមាំនៃមុខវិជ្ជាគណិតជាស្ពានចម្លងសិស្សសម្រេចបំណងរៀនផ្នែកវិស្វករ និងផ្នែកសេដ្ឋកិច្ចខណៈធនធានមនុស្សដែលមានជំនាញលើផ្នែកនេះនៅមានកម្រិតនៅឡើយសម្រាប់កម្ពុជា។ ហើយមែនទែនទៅ ការចេញមកបង្រៀនសិស្សលើមុខវិជ្ជាគណិតនាកាលៈទេសៈកូវីដ១៩នេះ សម្រាប់លោក ហង់ ជួនណារ៉ុន មិនមែនជារឿងចៃដន្យឡើយ ពោលគឺលោកតាំងចិត្តបង្រៀនសិស្សក្នុងនាមជាគ្រូស្ម័គ្រចិត្តតាំងតែពីចាប់ផ្ដើមចូលប្រឡូកក្នុងវិស័យអប់រំក្នុងនាមជារដ្ឋមន្ដ្រីក្នុងឆ្នាំ២០១៣មកម្ល៉េះ។ «ចំពេលកូវីដនេះ ការងារខ្ញុំឯទៀតបានកាត់បន្ថយ! ដូច្នេះខ្ញុំមានពេលច្រើនដល់ទៅ៣ខែឯណោះ ដើម្បីសង្ខេបមុខវិជ្ជាគណិតវិទ្យារហូតដល់ទៅ១៥មេរៀន សម្រាប់ធ្វើបទបង្ហាញដូចយើងគ្រប់គ្នាបានឃើញអ៊ីចឹង! ហើយបទបង្ហាញរបស់ខ្ញុំទាំងប៉ុន្មាន គឺសុទ្ធតែត្រៀមចេញសម្រាប់ពេលប្រឡង់បាក់ឌុបនៅចុងឆ្នាំនេះ»។
គណិតវិទ្យា គឺជាមុខវិជ្ជាសំណព្វចិត្ត ដែលលោក ហង់ ជួនណារ៉ុន ចូលចិត្តរៀនតាំងពីឆ្នាំ៣០មុនរហូតមកទល់ពេលបច្ចុប្បន្ន។ ត្រឡប់ទៅអតីតកាលបន្តិចចន្លោះឆ្នាំ១៩៨០ដល់១៩៨១ ដោយសារតែជាសិស្សពូកែគណិត យុវជន ហង់ ជួនណារ៉ុន ដែលកំពុងរៀននៅថ្នាក់ទី៩ សម្រេចចិត្តរៀនផ្លោះចូលថ្នាក់ទី១២តែម្ដងដើម្បីប្រឡងយកសញ្ញាបត្រមធ្យមសិក្សាទុតិយភូមិ។ គឺតាមរយៈមុខវិជ្ជាគណិតនេះដែរ ដែលបានត្រួសត្រាយផ្លូវឲ្យលោក ហង់ ជួនណារ៉ុន ក្លាយខ្លួនជាអ្នកសេដ្ឋកិច្ច ហើយធ្លាប់បំរើការងារនៅក្រសួងសេដ្ឋកិច្ចថែមទៀត មុនពេលក្លាយខ្លួនជារដ្ឋមន្ត្រីអប់រំនាឆ្នាំ២០១៣រហូតមកទល់បច្ចុប្បន្ន។ «ខ្ញុំនៅចាំអ្វីដែលធ្លាប់រៀនកន្លងមក ហើយពេលចេញមកបង្រៀននេះ ខ្ញុំគ្រាន់តែរំឭកវាបន្តិច គឺចាំតែម្ដង ដោយសារជាមុខវិជ្ជាខ្ញុំចូលចិត្ត។»
កូវីដ១៩ ជាការពិត គឺជាវិបត្តិដ៏ធំនៅចំពោះមុខវិស័យអប់រំរបស់កម្ពុជា។ ប៉ុន្តែលោករដ្ឋមន្ដ្រី ហង់ ជួនណារ៉ុន មានការតាំងចិត្តយ៉ាងមុតមាំក្នុងការប្រែក្លាយវិបត្តិនេះទៅជាឱកាស ដោយបញ្ជ្រាបការប្រើប្រាស់បច្ចេកវិទ្យាទៅកាន់លោកគ្រូអ្នកគ្រូ។ «នៅតាមសាលារៀន យើងនឹងស្នើឲ្យបង្កើតបន្ទប់ឌីជីថលមួយដើម្បីដាក់ឯកសារនិងវីដេអូសម្រាប់សិស្សដែលគ្មានអ៊ីនធើណេតមករៀននៅទីនោះបាន។ ចំណែកលោកគ្រូអ្នកគ្រូវិញ! យើងនឹងបង្រៀនគាត់ឲ្យចេះប្រើបច្ចេកវិទ្យា ក្នុងការបង្រៀនតាមអនឡាញ ហើយខ្ញុំក៏សុំកោតសសើរដែរ ព្រោះខ្ញុំចុះទៅតាមសាលាមួយចំនួនឃើញថា គ្រូមួយចំនួនមិនធ្លាប់ប្រើប្រាស់បច្ចេកវិទ្យាពីមុនមកផង តែគាត់អាចបង្រៀនសិស្សតាមរយៈហ្វេសប៊ុកឡាយបាន។ ដូច្នេះយើងគិតមើលទៅ បើគ្មានកូវីដ១៩ទេ គ្មានសម្ពាធណាមួយបង្ខំឲ្យយើងប្រឹងប្រែងទាំងអស់គ្នា ក្នុងការប្រើប្រាស់បច្ចេកទេសឡើយ។ ហើយម្យ៉ាងទៀត ការប្រើប្រាស់បច្ចេកវិទ្យា សម្រាប់គ្រូនៅពេលនេះ ធ្វើឡើងមុន១០ឆ្នាំមុនពេលកំណត់។»
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ