ឈប់សម្រាក៥ថ្ងៃ៖ ទេសចរសរុប១.៤លានដើរកម្សាន្តទូទាំងប្រទេស ខណៈសំរាមជាបញ្ហាស្មុគស្មាញ
ការឈប់សម្រាក៥ថ្ងៃសងថ្ងៃចូលឆ្នាំ ចាប់ពីថ្ងៃទី១៧ ដល់ថ្ងៃទី២១ ខែសីហា កន្លងទៅ មានភ្ញៀវទេសចរក្នុងស្រុកបានដើរលេងកម្សាន្តទូទាំងប្រទេសសរុបជាង ១.៤លាននាក់។ នេះបើតាមរបាយការណ៍របស់ក្រសួងទេសចរណ៍ចេញផ្សាយនៅថ្ងៃនេះ។ អ្នកជំនាញទេសចរណ៍វិញ ចង់ឲ្យមានការសហការគ្នារវាងរដ្ឋ និងឯកជន ដើម្បីឲ្យមាននិរន្តរភាពលើវិស័យនេះ ក្រោយពីផុតថ្ងៃឈប់សម្រាកសងចូលឆ្នាំទៅ។
ចុះផ្សាយនៅថ្ងៃ៖
យោងតាមរបាយការណ៍បឋមរបស់មន្ទីរទេសចរណ៍រាជធានីខេត្ត ភ្ញៀវទេសចរ ដែលបានធ្វើដំណើរកម្សាន្តនៅតាមគោលដៅទេសចរណ៍នានាទូទាំងមានចំនួនប្រមាណ ១លាន៤៥ម៉ឺននាក់ ដែលក្នងនោះមានភ្ញៀវជាតិចំនួនប្រមាណ ១ ៤៤៥ ២៣៨នាក់ និងភ្ញៀវអន្តរជាតិមានចំនួនប្រមាណ ១៤ ១៤៨នាក់។ តាមរយៈទិន្នន័យពីក្រសួងទេសចរណ៍ដដែលឲ្យដឹងថា ខេត្តដែលទទួលភ្ញៀវទេសចរច្រើនជាងគេរួមមាន ខេត្តសៀមរាប កំពត កែប បាត់ដំបង និងក្រុងព្រះសីហនុ។
លោក ហូ វណ្ឌី សហប្រធានក្រុមការងារវិស័យទេសចរណ៏ផ្នែកឯកជនបានអះអាងប្រាប់វិទ្យុបារាំងអន្តរជាតិនៅថ្ងៃទី២២ ខែសីហា នេះថា តួលេខអ្នកទេសចរនាពេលនេះ គឺមិនច្រើននោះទេ បើធៀបនឹងចំនួនភ្ញៀវទេសចរឆ្នាំកន្លងទៅតាមរដូវកាល។ លោក ហូ វណ្ឌី បានឲ្យដឹងថាភ្ញៀវទេសចរបំលាស់ទីក្នុងមួយឆ្នាំមានប្រមាណ១០លាននាក់។
បើតាមក្រសួងទេសចរណ៍ ក្នុងរយៈពេល៥ថ្ងៃមកនេះ មិនមានបញ្ហាធំដុំណាមួយកើតឡើងទេ។ ប៉ុន្តែសំរាម នៅតែជាបញ្ហាស្មុគស្មាញនៅឡើយដោយនៅតាមគោលដៅមួយចំនួន ភ្ញៀវទេសចរមានការទុកដាក់សំរាមមិនបានត្រឹមត្រូវ។ ចំណែកឯការពាក់ម៉ាស់របស់ភ្ញៀវនៅមិនទាន់មានភាពពេញលេញ ហើយការរក្សាគំលាតសុវត្ថិភាពនៅពុំទាន់អនុវត្តបានល្អប្រសើរ ជាពិសេសនៅតាមគោលដៅទេសចរណ៍ដែលមានលក្ខណៈប្រមូលផ្តុំច្រើន។ នេះបើតាមក្រសួងទេសចរណ៍។
រដ្ឋមន្ត្រីក្រសួងទេសចរណ៍ លោក ថោង ខុនធ្លាប់បានអះអាងប្រាប់វិទ្យុបារាំងអន្តរជាតិ កាលពីថ្ងៃទី១៧ ខែសីហា ថា បន្ទាប់ពីថ្ងៃឈប់សម្រាកសងចូលឆ្នាំនេះទៅ ប្រជាពលរដ្ឋកម្ពុជានឹងធ្វើដំណើរកម្សាន្តធម្មតា ហើយក្រោយពីរដូវភ្លៀងនោះភ្ញៀវទេសចរក្នុងស្រុកនឹងមានការកើនឡើងកាន់តែច្រើន។ លោកបន្ថែមថា ប្រសិនបើកូវីដ១៩ កាត់បន្ថយការបារម្ភ នោះក្រសួងអាចនឹងរៀបចំព្រឹត្តិការណ៍បានខ្លះៗ ដើម្បីទាក់ទាញទេសចរក្នុងស្រុក។
លោក ហូ វណ្ឌី សហប្រធានក្រុមការងារវិស័យទេសចរណ៏ផ្នែកឯកជន បានអះអាងថា ការធ្វើឲ្យមាននិរន្តរភាពនៅក្នុងវិស័យទេសចរណ៍ ត្រូវតែមានការរួមសហការគ្នារវាង រដ្ឋ និងឯកជន។ លោកបន្ថែមថាអាជ្ញាធរនៅក្នុងតំបន់ត្រូវកែច្នៃតំបន់ ដែលមិនទាន់ទាក់ទាញខ្លាំងនាពេលនេះឲ្យមានភាពទាក់ទាញខ្លាំងនាពេលខាងមុខ ហើយសំរាមក៏ជាបញ្ហាមួយដែលអាជ្ញាធរត្រូវតែដោះស្រាយ ដោយសហការជាមួយឯកជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ