ក្រុមអង្គការសង្គមស៊ីវិល៨០ ថ្លែងការណ៍ជាថ្មីឲ្យរដ្ឋាភិបាលបញ្ឈប់អំពើហិង្សា និងការចាប់ខ្លួនអ្នកតវ៉ាដោយសន្ដិវិធី
ជាថ្មីម្តងទៀត ក្រុមអង្គការសង្គមស៊ីវិលប្រមាណ៨០អង្គការ សមាគម នៅថ្ងៃអង្គារនេះ បានចេញសេចក្តីថ្លែងការណ៍រួមគ្នាមួយ ទាមទារឲ្យរដ្ឋាភិបាលកម្ពុជាបញ្ឈប់ការប្រើអំពើហិង្សា និងការចាប់ខ្លួនអ្នកតវ៉ាដោយសន្តិវិធី ព្រមទាំងស្នើឲ្យដោះលែងអ្នកជាប់ពន្ធនាគារ និងទំលាក់ចោលបទចោទដោយសារតែការបញ្ចេញមតិ។ ការថ្លែងរបស់ក្រុមអង្គការសង្គមស៊ីវិលដូច្នេះ ធ្វើឡើងបន្ទាប់ពីមានការបង្ក្រាប និងចាប់ខ្លួនអ្នកតវ៉ា ដែលជាយុវជន និងសាច់ញាតិសកម្មជនជាបន្តបន្ទាប់កាលពីពេលកន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:២៧
ក្រុមអង្គការសង្គមស៊ីវិលប្រមាណជា៨០អង្គការ បានសម្តែងការសោកស្តាយ ចំពោះអាជ្ញាធរ ដែលបានប្រើប្រាស់អំពើហិង្សាទៅលើអ្នកតវ៉ាដោយសន្តិវិធី និងការចាប់ខ្លួនសកម្មជនជាង១០នាក់ កាលពីពេលថ្មីៗនេះ។
យោងតាមសេចក្តីថ្លែងការណ៍ កាលពីប៉ុន្មានសប្ដាហ៍មុន អាជ្ញាធរបានប្រើប្រាស់ការបង្រ្កាបបែបហិង្សាជាបន្តបន្ទាប់ទៅលើការតវ៉ាដោយសន្ដិវិធី ដែលបានចាប់ផ្ដើមកើតឡើងបន្ទាប់ពីការចាប់ខ្លួន និងការឃុំខ្លួន លោក រ៉ុង ឈុន មេដឹកនាំសហជីព ដាក់ពន្ធនាគារ កាលពីដើមខែសីហានេះ។ ចាប់តាំងពីការចាប់ខ្លួនលោក រ៉ុង ឈុន មនុស្សចំនួន៦នាក់ទៀត ត្រូវបានចាប់ខ្លួន និងបញ្ជូនទៅឃុំខ្លួនក្នុងពន្ធនាគារបណ្ដោះអាសន្នរង់ចាំសវនាការ បន្ទាប់ពីអ្នកទាំងនោះតស៊ូមតិទាមទារឲ្យដោះលែងលោក រ៉ុង ឈុន វិញ។ អាជ្ញាធរក៏បានប្រើប្រាស់អំពើហិង្សា និងចាប់ខ្លួនសាច់ញាតិរបស់អតីតសមាជិកគណបក្សជំទាស់ ដែលត្រូវបានរំលាយផងដែរ ខណៈដែលពួកគាត់ភាគច្រើនជាស្រ្តី កំពុងតវ៉ាប្រឆាំងនឹងការចាប់ខ្លួនសមាជិកក្រុមគ្រួសាររបស់ពួកគាត់។ នេះបើតាមសេចក្តីថ្លែងការណ៍។
ក្រុមអង្គការសង្គមស៊ីវិល បានចាត់ទុកការអំពាវនាវឲ្យសមាជិកគ្រួសាររបស់អ្នកតវ៉ាមានសេរីភាពពីពន្ធនាគារមកវិញ ការសម្ដែងមតិជំទាស់ទៅនឹងការចាប់ខ្លួនមិត្តភក្ដិ ការឈរគៀកស្មាគ្នាជាមួយមនុស្សនៅក្នុងសហគមន៍របស់ពួកគេ និងការទាមទាររកយុត្តិធម៌មិនមែនជាបទល្មើសនោះទេ។
ក្រុមសង្គមស៊ីវិលបន្តថា អំឡុងពេលតវ៉ាដោយអហិង្សា យុវតី ឈឿន ដារ៉ាវី ដែលធ្វើការងារយុត្តិធម៌សង្គម និងបរិស្ថាន ត្រូវបានបោចសក់អូសចូលក្នុងរថយន្ត បន្ទាប់ពីកងសន្ដិសុខខណ្ឌបានដកហូតយកកាបូបលុយរបស់នាងយ៉ាងកម្រោល។ ក្រោយមកសកម្មជនបរិស្ថាន លោក ហ៊ុន វណ្ណៈ ត្រូវបានចាប់ខ្លួនដោយអាជ្ញាធរស្លៀកពាក់ស៊ីវិល ខណៈដែលលោកកំពុងផ្សាយផ្ទាល់ តាមហ្វេសប៊ុក បណ្ដើរ និងដើរទៅផ្ទះបណ្ដើរ បន្ទាប់ពីចូលរួមការតវ៉ា។ ករណីចាប់ខ្លួនលោក សួង សុភ័ណ្ឌ ប្រធានគណបក្សខ្មែរឈ្នះ ដោយសារសំណុំរឿងព្រំដែនក៏ត្រូវបានរាប់បញ្ជូលក្នុងសេចក្តីថ្លែងការណ៍នេះដែរ។
ទោះយ៉ាងណាមន្ត្រីរដ្ឋាភិបាលក៏ដូចជាអាជ្ញាធរដែនដី តែងបានបញ្ជាក់ហើយបញ្ជាក់ទៀតថា ការតវ៉ា និង ការចេញសេចក្តីថ្លែងការណ៍ទាំងអស់នេះ គឺមិនមានប្រយោជន៍អ្វីនោះទេ ពោលគឺគ្មានឥទ្ធិពលណាមួយមកលើតុលាការកម្ពុជា ដើម្បីដោះលែងលោករ៉ុង ឈុន និងសកម្មជនដទៃទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ