ក្រសួងទេសចរណ៍៖ពលរដ្ឋដែលដើរលេងកម្សាន្ត មិនទាន់អនុវត្តគម្លាតសុវត្ថិភាពបានពេញលេញនៅឡើយទេ
ថ្ងៃទី១៧ ខែសីហា ដែលជាថ្ងៃទី១នៃវិស្សមកាលឈប់សម្រាកពេញមួយសប្តាហ៍នេះ ក្រសួងទេសចរណ៍បានបង្ហាញឱ្យដឹងថា ប្រជាពលរដ្ឋជាង២៣ម៉ឺននាក់បានធ្វើដំណើរទៅលេងកម្សាន្តនៅតាមរមនីយដ្ឋាននានាទូទាំងប្រទេសកម្ពុជា។ រមនីយដ្ឋានជាច្រើនបានអនុវត្តនៅវិធានការសុវត្ថិភាពរបស់ក្រសួងសុខាភិបាលកម្ពុជា ប៉ុន្តែក្រសួងទេសចរណ៍ក៏បានកត់សម្គាល់ផងដែរថា ប្រជាពលរដ្ឋមួយចំនួនមិនទាន់បានអនុវត្តគម្លាតសុវត្ថិភាពបានពេញលេញតាមការណែនាំរបស់ក្រសួងសុខាភិបាលកម្ពុជានៅឡើយទេ។
ចុះផ្សាយនៅថ្ងៃ៖
ស្តាប់ - ០២:១៨
ក្រសួងទេសចរណ៍បានអះអាងនៅព្រឹកថ្ងៃអង្គារនេះថា ការរក្សាគម្លាតសុវត្ថិភាពរបស់ប្រជាពលរដ្ឋដែលដើរលេងកម្សាន្តនៅមិនទាន់អនុវត្តបានពេញលេញនៅឡើយទេ ជាពិសេស គឺការអង្គុយទទួលទានអាហារជុំគ្នាច្រើនជាក្រុមក្រុមគ្រួសារ ឬក្រុមរបស់ពួកគេតែមួយ។ ចំណែក រមណីយដ្ឋានខ្លះមានសភាពហួសចំណុះផ្ទុកធម្មតាដោយសារភ្ញៀវទេសចរមកលេងច្រើនក្នុងពេលតែមួយ ខណៈដែលអ្នកគ្រប់គ្រងគោលដៅទេសចរណ៍ និងមន្ត្រីជំនាញនឹងបន្តខិតខំណែនាំបន្ថែមទៀតឲ្យមានការចែករំលែក និងបង្វែរទស្សនកិច្ច ដើម្បីសម្រួលកុំឱ្យមានការផ្ទុកលើសពី ៥០%។
បើទោះបីការអនុវត្តរក្សាគម្លាតសុវត្ថិភាពរបស់ពលរដ្ឋខ្លះនៅមានកម្រិត ប៉ុន្តែក្រសួងទេសចរណ៍ក៏បានសង្កេតឃើញថា ពលរដ្ឋខ្លះមានការយល់ដឹងប្រសើរអំពីការអនុវត្តតាមការណែនាំរបស់ក្រសួងសុខាភិបាល និងវិធានសុវត្ថិភាពទេសចរណ៍អំពីជំងឺកូវីដ១៩ ។ រដ្ឋបាលខេត្តនីមួយៗក៏បានណែនាំ និងជំរុញការអនុវត្តវិធានសុវត្ថិភាពទេសចរណ៍យ៉ាងសកម្មផងដែរ។ ក្រសួងទេសចរណ៍អះអាថា គោលដៅទេសចរណ៍នានាក៏បានខិតខំអនុវត្តវិធានសុវត្ថិភាពទេសចរណ៍ ជាពិសេសការស្កេនកម្ដៅ បាញ់អាល់កុល កត់ឈ្មោះភ្ញៀវ និងការជំរុញឲ្យភ្ញៀវទេសចរពាក់ម៉ាស់ ឬក្រមាឲ្យបានជាប់ជាប្រចាំ ហើយរមណីយដ្ឋានខ្លះក៏បានដាក់រថយន្តពេទ្យប្រចាំការថែមទៀត ដើម្បីត្រៀមជួយសង្គ្រោះជាយថាហេតុ។
សូមជម្រាបជូនថា នៅថ្ងៃទី១ នៃវិស្សមកាលមួយសប្តាហ៍នេះ មានប្រជាពលរដ្ឋជាង២៣ម៉ឺន៣ពាន់នាក់(២៣៣,៣២៩នាក់)បានធ្វើដំណើរទៅលេងកម្សាន្តនៅតាមបណ្តាខេត្តនានានៅក្នុងប្រទេសកម្ពុជា។ តាមក្រសួងទេសចរណ៍ ខេត្តដែលសម្បូរភ្ញៀវទេសចរទៅកម្សាន្តច្រើនជាងគេរួមមាន ខេត្តកំពតមានជាង៣ម៉ឺននាក់(៣០,៨០៤នាក់) ខេត្តសៀមរាបមានជាង២ម៉ឺន៨ពាន់នាក់(២៨,១៤០នាក់) ខេត្តព្រះសីហនុជាង១ម៉ឺន៨ពាន់នាក់(១៨,៦០៤នាក់) ខេត្តកែបជាង១ម៉ឺន៨ពាន់នាក់(១៨,៥៥៧នាក់) ខេត្តបាត់ដំបងមានជាង១ម៉ឺន៤ពាន់នាក់(១៤,៦២៧នាក់) រាជធានីភ្នំពេញមានជាង១ម៉ឺន៤ពាន់នាក់(១៤,២៥៤នាក់) ខេត្តព្រះវិហារជាង១ម៉ឺននាក់(១០,៤៧០នាក់) ខេត្តមណ្ឌលគិរីជាង៨ពាន់នាក់(៨,៨២៨នាក់) និង ខេត្តខេត្តរតនគិរីជាង៨ពាន់នាក់(៨,២០៨នាក់)។
ក្រសួងទេសចរណ៍បានគូសបញ្ជាក់ថា សម្រាប់វិស្សមកាលនេះ រាជធានី និងខេត្តមួយចំនួនបានរៀបចំអភិវឌ្ឍជាផលិតផលទេសចរណ៍ថ្មីៗ ដើម្បីទាក់ទាញភ្ញៀវទេសចរ ដូចជាសួនទឹកកម្សាន្ត(Garden City) នៅរាជធានីភ្នំពេញ រមណីយដ្ឋានព្រីនមាន័រ (Prince Manor) នៅស្រុកកៀនស្វាយ ខេត្តកណ្ដាល រមនីយដ្ឋានផ្ទះផ្កា នៅក្នុងខេត្តបាត់ដំបង បឹងលំកុដ នៅក្នុងខេត្តរតនគិរី រមណីយដ្ឋានកែច្នៃសមុទ្រឈើ នៅក្នុងខេត្តមណ្ឌលគិរី និង រមណីយដ្ឋានទេសចរណ៍ថ្មីៗនៅកោះរ៉ុងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ