លោកហ៊ុន សែន ផ្លាស់ប្តូរចិត្តមិនស្នើសុំការពន្យាពេលការវិលត្រឡប់មកវិញរបស់កងទ័ពមួកខៀវកម្ពុជា
តាមរយៈទំព័រហ្វេសប៊ុក នៅព្រឹកថ្ងៃចន្ទនេះ លោកនាយករដ្ឋមន្រ្តីហ៊ុន សែន បានប្រកាសឱ្យដឹងថា នឹងមិនស្នើសុំអង្គការសហប្រជាជាតិ ដើម្បីពន្យាពេលការវិលត្រឡប់របស់កងទ័ពមួកខៀវកម្ពុជា និងការបញ្ជូនកងទ័ពមួកខៀវទៅជំនួសនោះទេ។ ការផ្លាស់ប្តូរចិត្តនេះ ធ្វើឡើងបន្ទាប់ពីរូបលោកកាលពីម្សិលមិញ បានស្នើទៅប្រមុខអង្គការសហប្រជាជាតិឱ្យពន្យាពេលការផ្លាស់ប្ដូរវេនកងទ័ពមួកខៀវកម្ពុជាមួយរយៈ ដើម្បីទប់ស្កាត់ការចម្លងជំងឺកូវីដ១៩ពីក្រៅប្រទេសចូលមកក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:១០
មូលហេតុដែលលោកប្រមុខរដ្ឋាភិបាលកម្ពុជាសម្រេចផ្លាស់ប្តូរចិត្តនេះ គឺដោយសារតែអង្គការសហប្រជាជាតិបានរៀបចំនូវពេលវេលាជាក់លាក់នៃការវិលត្រឡប់ និងការផ្លាស់ប្តូរកងទ័ពមួកខៀវកម្ពុជា។ បើតាមអង្គការសហប្រជាជាតិ គឺកងទ័ពមួកខៀវកម្ពុជានឹងវិលត្រឡប់មកប្រទេសម៉ាលីនៅក្នុងខែកញ្ញា ឆ្នាំ២០២០ ពីប្រទេសស៊ូដង់ខាងត្បូងនៅក្នុងខែតុលា ប្រទេសអាហ្រ្វិកកណ្តាលនៅក្នុងវិច្ឆិកា និង មកពីប្រទេសលីបង់នៅក្នុងខែមករា ឆ្នាំ២០២១ខាងមុខ។ លោកនាយករដ្ឋមន្រ្តីហ៊ុន សែន បានអះអាងថា ការរៀបចំពេលវេលារបស់អង្គការសហប្រជាជាតិនេះ គឺផ្តល់ឱ្យអាជ្ញាធរកម្ពុជាអាចរៀបចំការធ្វើចត្តាឡីស័កបានងាយស្រួល ដើម្បីទប់ស្កាត់ការនាំចូលកូវីត១៩មកក្នងប្រទេសកម្ពុជា។
ជាមួយនឹងការរៀបចំជាក់លាក់របស់អង្គការសហប្រជាជាតិនេះ លោកនាយករដ្ឋមន្រ្តីហ៊ុន សែន បានអំពាវនាវឱ្យកងទ័ពមួកខៀវកម្ពុជាដែលកំពុងស្ថិតនៅប្រទេសទាំង៤ខាងលើរៀបចំខ្លួន ដើម្បីវិលត្រឡប់មកប្រទេសកម្ពុជា។ ចំណែក កងទ័ពមួកខៀវកម្ពុជាដែលនឹងត្រូវទៅជំនួស គឺត្រូវរៀបចំខ្លួនចេញដំណើរតាមការចាត់ចែងរបស់ក្រសួងការពារជាតិ និងអង្គការសហប្រជាជាតិ។ បើតាមលោកនាយករដ្ឋមន្រ្តីហ៊ុន សែន កងទ័ពមួកខៀវរបស់កម្ពុជាជាង៤០០នាក់ នឹងត្រូវដល់ពេលផ្លាស់ប្ដូរវេនគ្នាតាមការចាត់ចែងរបស់អង្គការសហប្រជាជាតិនាពេលខាងមុខនេះ។
គួរបញ្ជាក់ថា នៅក្នុងបេសសកម្មនៅក្រៅប្រទេស កងទ័ពមួកខៀវកម្ពុជាម្នាក់បានស្លាប់ដោយសារតែជំងឺកូវីដ១៩ និងមួយចំនួនទៀតបានឆ្លងជំងឺរាតត្បាតនេះនៅក្នុងប្រទេសកំពុងបេសសកម្ម និង ពេលមកប្រទេសកម្ពុជាវិញ។ បច្ចុប្បន្ន កងទ័ពមួកខៀវកម្ពុជា៧៨៧នាក់ កំពុងបំពេញបេសកម្មនៅប្រទេសចំនួន៨គឺ ប្រទេសស៊ូដង់ ស៊ូដង់ខាងត្បូង លីបង់ ស៊ីប ស៊ីរី ឆាដ ម៉ាលី និង អាហ្វ្រិកកណ្តាល។
លោកនាយករដ្ឋមន្រ្តីហ៊ុន សែន បានគូសបញ្ជាក់ថា បើទោះបីកម្ពុជាជាប្រទេសក្រីក្រ និងកំពុងប្រឈមជាមួយជំងឺកូវីដ១៩ បន្ថែមពីលើប្រទេសដែលកងទ័ពមួកខៀវកម្ពុជាត្រូវទៅកំពុងមានការវាយលុកដោយកូវីដ ១៩ ក៏ដោយ ក៏រដ្ឋាភិបាលកម្ពុជា និងកងទ័ពកម្ពុជាមិនបោះបង់ចោលភារកិច្ចក្នុងការចូលរួមថែរក្សាសន្តិភាពនៅតាមប្រទេសនានាក្រោមឆ័ត្ររបស់របស់អង្គការសហប្រជាជាតិនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ