រដ្ឋាភិបាលកម្ពុជាត្រៀមកញ្ចប់ថវិកាជាង១ពាន់លានដុល្លារសម្រាប់ទប់ទល់នឹងការបាត់បង់ផ្នែកខ្លះនៃប្រព័ន្ធEBA
នៅថ្ងៃទី១២ ខែសីហា សប្តាហ៍ក្រោយនេះ គឺជាកាលកំណត់នៃការដកផ្នែកខ្លះនៃប្រព័ន្ធអនុគ្រោះពន្ធEBAរបស់អឺរ៉ុបចំពោះកម្ពុជា។ រដ្ឋាភិបាលកម្ពុជា និង មជ្ឈដ្ឋានដទៃខ្លះបានសន្មត់ហើយថា ការកំណត់ដកផ្នែកខ្លះនៃប្រព័ន្ធអនុគ្រោះពន្ធEBAនេះ ទំនងជាគ្មានអ្វីប្រែប្រួលនោះឡើយ។ បើទោះជាយ៉ាងណាក៏ដោយ ក្រសួងសេដ្ឋកិច្ច និង ហិរញ្ញវត្ថុបានអះអាងថា រដ្ឋាភិបាលកម្ពុជាបានត្រៀមកញ្ចប់ថវិកាប្រមាណ១ពាន់១៦៤លានដុល្លារអាមេរិករួចរាល់ហើយសម្រាប់ទប់ទល់នឹងការបាត់ផ្នែកខ្លះនៃEBAនេះ និង បញ្ហាផ្សេងទៀតដែលប៉ះពាល់ដោយសារតែជំងឺកូវីដ ១៩។
ចុះផ្សាយនៅថ្ងៃ៖
ស្តាប់ - ០២:៥៥
លោកមាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានអះអាងប្រាប់វិទ្យុបារាំងអន្តរជាតិនៅព្រឹកថ្ងៃសុក្រនេះថា រដ្ឋាភិបាលកម្ពុជាបានត្រៀមកញ្ចប់ថវិកាប្រមាណ១ពាន់១៦៤លានដុល្លារអាមេរិកសម្រាប់ជួយសង្រ្គោះនៅពេលដែលសហភាពអឺរ៉ុបដកផ្នែកខ្លះនៃប្រព័ន្ធអនុគ្រោះពន្ធEBAពីកម្ពុជា។ កញ្ចប់ថវិកានេះ ក៏នឹងប្រើប្រាស់សម្រាប់ដោះស្រាយបញ្ហានានានៅក្នុងប្រទេសកម្ពុជាដោយសារតែជំងឺកូវីដ ១៩ផងដែរ។ ក៏ប៉ុន្តែ ការដោះស្រាយបញ្ហាទាំងពីរដោយរបៀបណាជាមួយកញ្ចប់ថវិកាទាំងនេះ លោកអ្នកពាក្យក្រសួងសេដ្ឋកិច្ច និងហិរញ្ញវត្ថុរូបនេះមិនអាចបញ្ជាក់ឱ្យដឹងច្បាស់នៅឡើយទេ ដោយហេតុថា នៅពេលននេះ គណៈកម្មការទទួលបន្ទុកបញ្ហាទាំងនេះកំពុងសិក្សា និងវាយតម្លៃលម្អិត។
បើទោះបីកាលកំណត់នៅថ្ងៃទី១២ សីហា មិនទាន់ចូលមកដល់ក៏ដោយ ក៏លោកមាស សុខសេនសាន តាមរយៈវិទ្យុបារាំងអន្តរជាតិបានសម្តែងនូវការសោកស្តាយរួចស្រេចទៅហើយបើអឺរ៉ុបដកផ្នែកខ្លះនៃប្រព័ន្ធអនុគ្រោះពន្ធEBAតាមការគ្រោងទុក ក្រោយពីរដ្ឋាភិបាលបានខិតខំសម្របសម្រួលអស់ពីលទ្ធភាពរបស់ខ្លួន។ លោកបានប៉ាន់ប្រមាណថា នៅពេលEBA ត្រូវបានដក នោះរោងចក្រមួយចំនួនអាចនឹងផ្អាកការងារ មួយចំនួននឹងបន្តបង់ពន្ធតាមការសម្រេចរបស់អឺរ៉ុប ហើយមួយចំនួនទៀត អាចនឹងផ្លាស់ប្តូរចង្វាក់ផលិតកម្មរបស់ខ្លួនទៅផលិតអ្វីផ្សេងវិញ។ ប៉ុន្តែសម្រាប់កម្មករ កម្មការិនីដែលអស់ការងារធ្វើ រដ្ឋាភិបាលកម្ពុជានឹងប្រើប្រាស់កញ្ចប់ថវិកា១ពាន់១៦៤លានដុល្លារនេះជួយសង្រ្គោះដល់ពួកគេ។ នេះបើតាមការគូសបញ្ជាក់របស់លោកមាស សុខសេនសាន។
តាមគម្រោង បើក្នុងអំឡុងពេលនេះ សភានិងក្រុមប្រឹក្សាអឺរ៉ុបមិនជំទាស់ទេនោះ គណៈកម្មការអឺរ៉ុបនឹងអនុវត្តដកផ្នែកខ្លះនៃប្រព័ន្ធអនុគ្រោះពន្ធEBA«ជាបណ្ដោះអាសន្ន»ពីកម្ពុជានៅថ្ងៃទី១២ ខែសីហាតាមការសម្រេចកាលពីថ្ងៃទី១២ ខែកុម្ភកន្លងទៅ។ ទំនិញកម្ពុជាចំនួន៤០ប្រភេទ ក្នុងនោះផលិតផលខ្លះក្នុងផ្នែកកាត់ដេរសម្លៀកបំពាក់ និងស្បែកជើង ផលិតផលសម្រាប់ធ្វើដំណើរ និងស្ករ នឹងត្រូវយកពន្ធឡើងវិញនៅពេលនាំចូលទៅកាន់ទីផ្សារអឺរ៉ុប។ ផលិតផលទាំងអស់នេះ នាំចេញពីកម្ពុជាទៅអឺរ៉ុបក្នុងតម្លៃសរុបប្រមាណ១ពាន់លានអឺរ៉ូជារៀងរាល់ឆ្នាំ។ ការសម្រេចរបស់អឺរ៉ុបនេះ គឺឈរលើហេតុផលថា កម្ពុជាបានរំលោភយ៉ាងធ្ងន់ធ្ងរទៅលើមូលដ្ឋានគ្រឹះនៃសិទ្ធិមនុស្ស សិទ្ធិនយោបាយ និងសិទ្ធិការងារ។
កាលពីខែកុម្ភៈ ពោល គឺក្រោយពីគណៈកម្មការអឺរ៉ុបសម្រេចដកការអនុគ្រោះពន្ធ២០ភាគរយពីកម្ពុជាភា្លមៗ លោកនាយករដ្ឋមន្រ្តីហ៊ុន សែន បានប្រកាសប្រកាន់ជំហរដាច់ណាត់មិនធ្វើតាមការចង់បានណាមួយរបស់អឺរ៉ុបឡើយ។ លោកអះអាងថា កម្ពុជាសុខចិត្តបង់ពន្ធប្រមាណ១០០លានដុល្លារអាមេរិកសម្រាប់នាំទំនិញទៅកាន់ទីផ្សារអឺរ៉ុប តែកម្ពុជាមិនយកអធិតេយ្យភាពរបស់ខ្លួនទៅដោះដូរជាដាច់ខាត។ ប៉ុន្តែនៅពេលសួរថា តើរដ្ឋាភិបាលកម្ពុជានឹងជួយក្រុមហ៊ុនឯកជនក្នុងការជួយបង់ពន្ធ១០០លានដុល្លារនេះដែរឬទេ? លោកមាស សុខសេនសាន អ្នកនាំពាក្យក្រសួងសេដ្ឋកិច្ចមិនទាន់អាចបញ្ជាក់បាននៅឡើយទេ ដោយថា គណៈកម្មការកំពុងជជែកពីការដោះស្រាយបញ្ហាប្រឈមទាំងអស់នេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ