ក្រុមការងារអន្តរក្រសួងចុះស្រាវជ្រាវបញ្ហាដីធ្លីនៅខេត្តមណ្ឌលគិរីមុនគេ
បញ្ហាអាកាសធាតុភ្លៀងជាប់មិនរាំងក្នុងខេត្តមណ្ឌលគិរី បានបង្ខំឲ្យក្រុមការងារចុះឆ្វៀលដីរបស់រដ្ឋាភិបាលត្រឡប់មកភ្នំពេញវិញ។ លោក សេង ឡូត អ្នកនាំពាក្យក្រសួងរៀបចំដែនដីនគររូបនីយកម្ម និងសំណង់បានឲ្យដឹងថា ឆ្លើយតបនឹងបទបញ្ជារបស់ប្រមុខរដ្ឋាភិបាលកាលពីខែមុន ក្រុមការងារអន្តរក្រសួងចុះវាស់វែងកំណត់ដីរដ្ឋនៅខេត្តមណ្ឌលគិរីមុនគេ។ ខេត្តមណ្ឌលគិរីជាទីតាំងមួយដែលមន្ត្រីរដ្ឋាភិបាល និងសង្គមស៊ីវិលទទួលស្គាល់ដូចគ្នា ត្រូវបានអ្នកធំៗកំពុងប្រជែងគ្នាទៅចាប់ដីនៅទីនោះ។
ចុះផ្សាយនៅថ្ងៃ៖
ស្តាប់ - ០២:២៣
ផ្ដើមចេញពីខេត្តមណ្ឌលគិរីរដ្ឋមន្ត្រីក្រសួងដែនដី កសិកម្ម និងបរិស្ថានបានដឹកដៃគ្នាចុះទៅទីនោះ កាលពីថ្ងៃទី២៨ខែកក្កដា ដើម្បីទៅមើលបញ្ហាដីធ្លីជាក់ស្ដែង មុនបញ្ជូនក្រុមការងារអន្តរក្រសួងចុះទៅស្រាវជ្រាវបន្ត តែដោយបញ្ហាអាកាសធាតុភ្លៀងជាប់មិនរាំងក្នុងខេត្តមណ្ឌលគិរី បានបង្ខំឲ្យក្រុមការងារចុះឆ្វៀលដីរបស់រដ្ឋាភិបាលត្រឡប់មកភ្នំពេញវិញ។ ក្រៅតែពីខេត្តមណ្ឌលគិរី ខេត្តកោះកុងជាគោលដៅបន្ទាប់ ខណៈខេត្តដទៃក្រុមការងារអន្តរក្រសួងក៏កំពុងចុះស្រាវជ្រាវដែរ។ នេះបើតាមឲ្យដឹងរបស់លោក សេង ឡូត អ្នកនាំពាក្យក្រសួងដែនដីនៅថ្ងៃអង្គារ៍នេះ។
ពាក់ព័ន្ធទំនាស់ដីធ្លីនៅខេត្តមណ្ឌលគិរី ដែលភាគច្រើនសុទ្ធតែមន្ត្រីធំៗប្រជែងគ្នាចុះទៅចាប់ដីនោះ លោក ស្វាយ សំអ៊ាង អភិបាលខេត្តមណ្ឌលគីរី បានឲ្យដឹងកាលពីពេលថ្មីៗនេះថា អាជ្ញាធរខេត្តបានដកហូតដី ដែលត្រូវបានកាន់កាប់ខុសច្បាប់ចំនួន២ពាន់ហិកតា មកជាសម្បត្តិរដ្ឋវិញ។ ទោះយ៉ាងណា លោកអភិបាលខេត្តមណ្ឌលគីរី ស្វាយ សំអ៊ាង បានអះអាងថា អាជ្ញាធរលោក បានចាត់វិធានការដោយស្មើភាពគ្នា ចំពោះអ្នកដែលរំលោភយកដីរដ្ឋ មិនគិតថាជាអ្នកតូច ឬអ្នកធំនោះទេ។
កន្លងមករដ្ឋមន្ត្រីក្រសួងកសិកម្មធ្លាប់បានប្រាប់វិទ្យុបារាំង ដោយលើកយកទីតាំងមួយ នៅខេត្តមណ្ឌលគិរី គឺពលរដ្ឋបានចុះកាន់កាប់ដីដោយខ្លួនឯងនៅតំបន់ស្រល់ ដោយមានការជម្រុញឈ្មួញ។ តំបន់ស្រល់ជាទីតាំងពីមួយដែលព្រះមហាក្សត្រកម្ពុជា ធ្លាប់យាងទៅដាំដើមស្រល់កាលពីអតីតកាល។
គួរជម្រាបជូនថា ក្នុងខេត្តមណ្ឌលគិរី ដីតំបន់អភិរក្ស តំបន់សត្វព្រៃ និងតំបន់ការពារផ្សេងៗគ្រប់គ្រងរួមគ្នាដោយក្រសួងកសិកម្ម និងបរិស្ថានមានចំនួនជាង១លានហិកតា។ ក្នុងនោះដីព្រៃឈើ មានទំហំជាង២៥ម៉ឺនហិកតា គ្រប់គ្រងដោយក្រសួងកសិកម្ម ដោយក្នុងនោះក្រសួងបានបែងចែកជាដីសម្បទានសេដ្ឋកិច្ចមានចំនួន២៥គម្រោង លើផ្ទៃដីតាមកិច្ចសន្យាទំហំជាង១៥ម៉ឺនហិកតា។ ចំណែកដីដែក្រសួងបរិស្ថានកំពុងគ្រប់គ្រង និងអភិរក្សទាំងអស់ចំនួន ៦៩ កន្លែង និងមានទំហំសរុប ៧,៣ លានហិកតា នៅក្នុង ២០ខេត្ត។
សូមជម្រាបជូនថា កាលពីខែមុនប្រមុខរដ្ឋាភិបាលបានចេញបទបញ្ជាផ្ទាល់មាត់ដល់ទៅ២ដង ទៅក្រសួងបរិស្ថាន ដែនដី កសិកម្ម និងអាជ្ញាធរត្រូវធ្វើការឲ្យបានហ្មត់ចត់ ចំពោះដំណើរការកាត់ឆ្វៀលដីជូនប្រជាពលរដ្ឋ ដែលកំពុងរស់នៅអាស្រ័យផលក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ