ក្រសួងយុត្តិធម៌ និងសាលាក្រុង ព្រមានចាត់វិធានការលើអ្នកតវ៉ានៅមុខតុលាការ
រដ្ឋបាលរាជធានីភ្នំពេញ និងក្រសួងយុត្តិធម៌ នៅថ្ងៃចន្ទទី៣ខែសីហានេះ បានចេញសេចក្តីប្រកាសដោយឡែកពីគ្នា ដើម្បីផ្ញើសារទៅកាន់ក្រុមអ្នកតវ៉ានានា នៅខាងមុខសាលាដំបូងរាជធានីភ្នំពេញថាសកម្មភាពរបស់ពួកគេគឺជាសកម្មភាពខុសច្បាប់។ ការចេញសេចក្តីប្រកាសព្រមៗគ្នារបស់អាជ្ញាធរ២ស្ថាប័ននេះ ធ្វើឡើងបន្ទាប់ពីមានការតវ៉ាពីអ្នកគាំទ្រលោក រ៉ុង ឈុន និងក្រុមគ្រួសារសកម្មជនគណបក្សប្រឆាំង ទាមទារឲ្យតុលាការដោះលែង លោក រ៉ុង ឈុន និងសកម្មជនដែលតុលាការធ្វើការចោទប្រកាន់រួចហើយ។
ចុះផ្សាយនៅថ្ងៃ៖
ស្តាប់ - ០២:២៦
ក្រសួងយុត្តិធម៌បានលើកឡើងថា សកម្មភាពក្នុងការប្រមូលផ្តុំមនុស្សនៅខាងមុខសាលាដំបូងរាជធានីភ្នំពេញ ដែលទាមទារឲ្យតុលាការដោះលែងជនត្រូវចោទ ឈ្មោះ រ៉ុង ឈុន ពុំមែនជាទង្វើត្រឹមត្រូវតាមច្បាប់នោះទេ ប៉ុន្តែជាទង្វើដាក់សម្ពាធលើស្ថាប័នតុលាការ ដែលអាចប្រឈម នឹងការចោទប្រកាន់អំពីបទល្មើសព្រហ្មទណ្ឌ តាមមាត្រា៥២២នៃក្រមព្រហ្មទណ្ឌកម្ពុជា។ ក្រសួងយុត្តិធម៌បានអំពាវនាវកុំឲ្យអ្នតវ៉ា ធ្វើសកម្មភាពខុសច្បាប់ខាងលើ ដោយបញ្ជាក់ថាលោក រ៉ុង ឈុន មានសិទ្ធិពេញលេញស្របតាមច្បាប់ និងរដ្ឋធម្មនុញ្ញក្នុងការការពារភាពស្អាតស្អំតាមរយៈមេធាវី។
ជាមួយគ្នានេះ លិខិតរបស់រដ្ឋបាលរាជធានីភ្នំពេញវិញ ក៏បាននិយាយដែរដោយលើកឡើងពីច្បាប់ស្តីពីការធ្វើបាតុកម្មដោយសន្តិវិធី និងវិធានការណែនាំនានា ស្តីពីការទប់ស្កាត់ការរីករាលដាលនៃការឆ្លងវីរុសកូវីដ១៩ ដោយតម្រូវឲ្យ ក្រុមបុគ្គលណា ដែលមានបំណងធ្វើបាតុកម្មដោយសន្តិវិធី នៅកន្លែងសាធារណៈណាមួយ ត្រូវជូនដំណឹងជាលាយលក្ខណ៍អក្សរទៅអាជ្ញាធរដែនដី មានសមត្ថកិច្ចគ្រប់គ្រងទីកន្លែងនោះ។អាជ្ញាធរក្រុង ក៏ព្រមានដែរថា នឹងចាត់វិធានការតាមផ្លូវច្បាប់ រាល់ការជួបជុំ ប្រមូលផ្តុំ ដែលគ្មានការជូនដំណឹងជាលាយលក្ខណ៍អក្សរទៅរដ្ឋបាលសាលាក្រុង។
ដោយឡែក លោក អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ ថ្លែងថាលិខិតទាំងពីររបស់អាជ្ញាធរ គឺអាចធ្វើឲ្យប៉ះពាល់ដល់សិទ្ធិសេរីភាពមួយចំនួន របស់ពលរដ្ឋ បើផ្អែកទៅលើកតិកាសញ្ញាអន្តរជាតិស្តីពីសិទ្ធិពលរដ្ឋ សិទ្ធិនយោបាយ និងរដ្ឋធម្មនុញ្ញ រួមនឹងសេចក្តីថ្លែងការណ៍ជាសកលស្តីពីសិទ្ធិមនុស្ស។ លោកថាច្បាប់បាតុកម្មខ្មែរ ក៏ត្រូវមានការសម្របសម្រួលពីសមត្ថកិច្ចដែរ ក្នុងករណីការធ្វើបាតុកម្មដោយសន្តិវិធី ហើយមិនបានជូនដំណឹង។
សូមរំលឹកថា ការចាប់ខ្លួនលោក រ៉ុង ឈុន ជុំវិញសំណុំរឿងព្រំដែនកម្ពុជា-វៀតណាម កាលពីចុងសប្តាហ៍មុន បង្កជាការតវ៉ាពីអ្នកគាំទ្រលោក យ៉ាងសកម្ម ដែលបញ្ហានេះ បង្ហាញពីការប្រឆាំងនឹងចំណាត់ការរបស់តុលាការកាន់តែខ្លាំងទៅៗ ដើម្បីឲ្យដោះលែង លោក រ៉ុង ឈុន ខណៈក្រុមគ្រួសារសកម្មជនបក្សប្រឆាំងជាច្រើននាក់បានធ្វើការតវ៉ាដូចគ្នានេះស្ទើររៀងរាល់ថ្ងៃនៅមុខតុលាការក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ