គ្រុនឈីកផ្ទុះឡើងនៅកម្ពុជា ក្រសួងសុខាភិបាលអំពាវនាវឲ្យចូលរួមទប់ស្កាត់
ជំងឺគ្រុនឈីក បានចាប់ផ្តើមកើតមានឡើងនៅក្នុងខែកក្កដា ឆ្នាំ២០២០ ដែលគិតមកដល់ពេលនេះមានមនុស្ស ១ ០២០នាក់ បានកើតជំងឺនេះ ក្នុងខេត្តចំនួន១២របស់កម្ពុជា។ នេះបើតាមក្រសួងសុខាភិបាលនៅថ្ងៃទី១ ខែសីហានេះ។ រដ្ឋមន្ត្រីក្រសួងនៃនេះ អំពាវនាវឲ្យមានការចូលរួមពីអាជ្ញាធរ និងប្រជាពលរដ្ឋ ដើម្បីការពារជំងឺគ្រុនឈីក(ជំងឺឈីកគន់ហ្គន់យ៉ា)។
ចុះផ្សាយនៅថ្ងៃ៖
ស្តាប់ - ០២:១១
ករណីសង្ស័យគ្រុនឈីកចាប់ពីថ្ងៃទី១៩ រហូតដល់ថ្ងៃទី៣១ ខែកក្កដា មានចំនួន១ ០២០ករណី ក្នុងនោះស្ត្រីមាន៥៦២នាក់ ដែលក្នុងនោះចំនួនករណីជាង៨០% គឺកើតមានក្នុងខេត្តចំនួន៤ ខេត្តសៀមរាប បន្ទាយមានជ័យ ព្រះវិហារ និងកំពង់ចាម។ នេះបើតាមទិន្នន័យរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្ររបស់ក្រសួងសុខាភិបាល នៅថ្ងៃទី០១ ខែសីហានេះ។ ប្រភពដដែលឲ្យដឹងថា ខេត្តផ្សេងទៀតដែលមានជំងឺគ្រុនឈីក ក្នុងចំនួនតិចតួច រួមមាន ឧត្តរមានជ័យ ត្បូងឃ្មុំ តាកែវ កំពត កំពង់សោម ពោធិសាត់ ស្ទឹងត្រែង និងប៉ៃលិន ដែលសរុបទាំងអស់មានចំនួន ១២ខេត្ត។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានលើកឡើងថា ការទប់ស្កាត់ និងការការពារជំងឺគ្រុនឈីកនេះ គឺវាដូចនឹងជំងឺគ្រុនឈាមដែរ ដោយផ្អែកទៅលើការការពារកុំឲ្យមូសខ្លាញីខាំ តាមរយៈការលុបបំបាត់វត្ថុដក់ទឹក ដែលជាជម្រកនៃការកកើតសត្វមូសនេះ។
កាលពីថ្ងៃទី២៣ ខែកក្កដាកន្លងទៅ ក្រសួងសុខាភិបាលបានរាយការណ៍ ជាផ្លូវការពីករណីផ្ទុះឡើងនៃជំងឺគ្រុនឈីក ដែលបានកើតលើប្រជាពលរដ្ឋប្រមាណជាង១០០នាក់ ដែលរស់នៅ ក្នុងសង្កាត់ប៉ោយប៉ែត ខេត្តបន្ទាយមានជ័យ។
នៅថ្ងៃទី០១ ខែសីហា នេះក្រសួងសុខាភិបាលក៏បានដាក់ចេញវិធានការចំនួន៥ចំណុច ក្នុងគោលដៅបង្កើនការចូលរួម និងចលនាកាត់បន្ថយ និងទប់ស្កាត់ការកកើតសត្វមូស ដែលអាចបង្កឲ្យមានជំងឺគ្រុនឈីក។ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលក៏បានអំពាវនាវឲ្យមានការចូលរួមពីគ្រប់ភាគីពាក់ព័ន្ធ ដើម្បីទប់ស្កាត់ការចម្លងជំងឺគ្រុនឈីក នៅតាមសហគមន៍ដែលកំពុងផ្ទុះឡើងនេះ ឲ្យកាន់តែមានប្រសិទ្ធភាព។
សូមរំលឹកថាជំងឺគ្រុនឈីកនេះ បានកើតឡើងដំបូងបំផុតនៅឆ្នាំ១៩៥៣ នៅទ្វីបអាហ្វ្រិក និងធ្លាប់បានរកឃើញដំបូងនៅប្រទេសកម្ពុជានៅឆ្នាំ១៩៦១ និងឆ្នាំ២០១១ ដែលករណីនេះបានកើតឡើងនៅខេត្តបាត់ដំបង សៀមរាប និងព្រះវិហារ ហើយគ្រុនឈីកធ្លាប់មានអត្រាឆ្លងរោគខ្ពស់រហូតដល់៦០ទៅ៧០% ក្នុងប្រទេសកម្ពុជានាទសវត្សរ៍ទី៦០ ហើយមានការរាតត្បាតខ្លាំងនៅឆ្នាំ២០១១-២០១២ នៅតាមខេត្តមួយចំនួនរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ