គិតមកដល់ពេលនេះ អាមេរិកបានផ្តល់ជំនួយ១១លានដុល្លារអាមេរិកដល់កម្ពុជា ដើម្បីប្រយុទ្ធប្រឆាំងនឹងជំងឺកូវីដ ១៩
គិតមកដល់ពេលនេះ សហរដ្ឋអាមេរិកបានផ្តល់ជំនួយជាថវិកាចំនួន១១លានដុល្លារអាមេរិកដល់រដ្ឋាភិបាលកម្ពុជា ដើម្បីចូលរួមប្រយុទ្ធប្រឆាំងនឹងជំងឺកូវីដ១៩។ នេះបើតាមការប្រកាសឱ្យដឹងរបស់ស្ថានទូតអាមេរិកប្រចាំនៅកម្ពុជានៅព្រឹកថ្ងៃចន្ទនេះ។ ក្រៅពីកម្ពុជា អាមេរិកក៏បានផ្តល់ជំនួយជាថវិកាដូចគ្នានេះដល់ប្រទេសជាសមាជិកអាស៊ានផ្សេងទៀតផងដែរដោយចាប់ពីជាង១លានដុល្លារដល់ជិត២០លានដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:៣៤
«សហរដ្ឋអាមេរិកបានរួមចំណែកជាជំនួយចំនួន១១ លានដុល្លារសម្រាប់ប្រយុទ្ធប្រឆាំងនឹងមេរោគកូវីដ១៩ នៅប្រទេសកម្ពុជា។ យើងកំពុងតែកៀងគរធនធានចាំបាច់ ហើយធ្វើការជាមួយដៃគូកម្ពុជារបស់យើង ដើម្បីប្រឈមដោះស្រាយវិបត្តិផ្នែកសុខភាពសាកលនេះ»។ នេះ គឺជាការអះអាងឱ្យដឹងរបស់ស្ថានទូតអាមេរិកប្រចាំនៅកម្ពុជានៅលើទំព័រហ្វេសប៊ុករបស់ខ្លួននៅព្រឹកថ្ងៃទី២៧ ខែកក្កដានេះ។ ក្រៅពីប្រទេសកម្ពុជា អាមេរិកក៏បានផ្តល់ជំនួយថវិកាដល់ប្រទេសអាស៊ានដទៃទៀត មានដូចជា ប្រទេសឥណ្ឌូនេស៊ីចំនួន១១លានដុល្លារ ឡាវ ចំនួន៤,៥ លានដុល្លារ ម៉ាឡេស៊ី ចំនួន១,២លានដុល្លារ, មីយ៉ានម៉ា ចំនួន១៦,៥លានដុល្លារ ហ្វីលីពីន១៩,១លានដុល្លារ ថៃចំនួន៨,៥លានដុល្លារ និង វៀតណាម៩,៥លានដុល្លារអាមេរិក។ ចំណែក ប្រទេសទីម័រខាងកើតវិញ អាមេរិកក៏បានផ្តល់ជំនួយចំនួន១,១លានដុល្លារផងដែរ។
សម្រាប់ប្រទេសកម្ពុជា ជំនួយចំនួន១១លានដុល្លារអាមេរិកនេះ គឺសម្រាប់ជួយដល់ការឆ្លើយតប និងការស្តារឡើងវិញក្រោយពីជំងឺកូវីដ ១៩។ តាមស្ថានទូតអាមេរិក មូលនិធិទាំងនេះ គឺជាការបន្ថែមលើជំនួយបច្ចេកទេសដ៏ច្រើន ដែលមានជាយូរមករបស់អ្នកជំនាញឯកទេសរបស់រដ្ឋាភិបាលអាមេរិកាំង។ លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅទីក្រុងភ្នំពេញធ្លាប់បានគូសបញ្ជាក់ថា ការជួយដល់កម្ពុជាក្នុងការឆ្លើយតបនឹងជំងឺកូវីដ ១៩នេះ គឺបង្ហាញពីការបន្តកិច្ចសហប្រតិបត្តិការ និងភាពជាដៃគូដ៏យូរអង្វែងរបស់អាមេរិកលើផ្នែកសុខាភិបាលជាមួយកម្ពុជា។
លោកឯកអគ្គរដ្ឋទូតសហរដ្ឋអាមេរិក ក៏បានគូសបញ្ជាក់ឱ្យដឹងទៀតថា ជំនួយជាថវិកានេះ នឹងជួយប្រព័ន្ធសុខាភិបាលកម្ពុជានៅក្នុងការតាមដានជំងឺ ព្យាបាលអ្នកឈឺ និង ការពារកុំឱ្យមានការឆ្លងជំងឺកូវីដ ១៩ បន្ថែមទៀត។ បើតាមលោក W. Patrick Murphy អាមេរិកនៅតែបន្តកិច្ចសហការជាមួយប្រជាជនកម្ពុជាក្នុងការប្តេជ្ញាចិត្តដ៏ខ្លាំងក្លា ដើម្បីដោះស្រាយបញ្ហាប្រឈមនានាដែលមិនធ្លាប់មានពីមុនមកនៃជំងឺកូវីដ១៩នេះ។
សូមបញ្ជាក់ថា បន្ថែមពីលើជំនួយរបស់អាមេរិកនេះ កម្ពុជាក៏បានទទួលបានជំនួយជាថវិកាពីសហភាពអឺរ៉ុបមានចំនួនប្រមាណ ៦០លានដុល្លារអាមេរិក។ រីឯ រដ្ឋាភិបាលអាល្លឺម៉ង់វិញ បានផ្តល់នូវទឹកប្រាក់១លាន៦សែនដុល្លារអាមេរិក ខណៈប្រទេសជប៉ុន និងចិន ជួយផ្តល់គ្រូពេទ្យជំនាញ និងបរិក្ខារពេទ្យចាំបាច់សម្រាប់ប្រទេសកម្ពុជា។ ដោយឡែក ប្រទេសវៀតណាម ក៏បានផ្តល់ថវិកាចំនួន២០ម៉ឺនដុល្លារដល់កម្ពុជា និងឡាវ ដើម្បីដោះស្រាយផលប៉ះពាល់នៃជំងឺកូវីដ១៩នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ