ធនាគារជាតិ៖បច្ចុប្បន្ន កម្ពុជាមានទុនបម្រុងអន្តរជាតិ១៩,៥ពាន់លានដុល្លារ និងមាស៣៦,៥តោន
ធនាគារជាតិនៃកម្ពុជានៅព្រឹកថ្ងៃព្រហស្បតិ៍នេះ បានចេញមកបញ្ជាក់ឱ្យដឹងថា គិតមកត្រឹមចុងខែមិថុនាកន្លងទៅនេះ កម្ពុជាមានទុនបម្រុងអន្តរជាតិចំនួន១៩,៥ពាន់លានដុល្លារអាមេរិក និង មានមាសរក្សាទុកចំនួន៣៦,៥តោន។ លោកនាយករដ្ឋមន្រ្តីហ៊ុន សែន បានអះអាងថា ការបញ្ជាក់របស់ធនាគារជាតិនេះ គឺដើម្បីបំបាត់ការសង្ស័យរបស់ប្រជាពលរដ្ឋ និង ការវាយប្រហាររបស់មជ្ឈដ្ឋានមួយចំនួនមកលើរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:៣៤
«ទុនបម្រុងអន្តរជាតិរបស់កម្ពុជាគិតជាដុល្លារអាមេរិកមានចំនួន១៩,៥ប៊ីលាន(ពាន់លាន)គិតត្រឹមចុងខែមិថុនា ឆ្នាំ២០២០»។ នេះ គឺជាការបង្ហាញឱ្យដឹងរបស់ធនាគារជាតិនៃកម្ពុជានៅក្នុងសេចក្តីបញ្ជាក់មួយនៅថ្ងៃទី២៣ ខែកក្កដានេះ។ ធនាគារជាតិនៃកម្ពុជាបានអះអាងបន្ថែមថា ខ្លួនត្រូវគ្រប់គ្រងដោយប្រុងប្រយ័ត្ន ដើម្បីរក្សាសុវត្ថិភាពទុនបម្រុងទាំងអស់នេះ។ ជាមួយគ្នានេះ ធនាគារជាតិនៃកម្ពុជាក៏បានបង្ហាញឱ្យដឹងដែរថា បច្ចុប្បន្ន ធនាគារជាតិរក្សាមាសចំនួន៣៦,៥តោន។ ក្នុងនោះ មាសដែលជាកេរ្តិ៍មរតកតាំងពីមុនសម័យសង្រ្គាមមានចំនួន១២,៤តោនដែលកំពុងរក្សាទុកនៅប្រទេសស្វីស រីឯមាសចំនួន១៤,១តោនកំពុងវិនិយោគនៅធនាគារកណ្តាលអង់គ្លេស និងមាសចំនួន១០តោនទៀតត្រូវបានរក្សាទុកនៅក្នុងប្រទេសកម្ពុជា។
ការចេញមកបញ្ជាក់ឱ្យដឹងរបស់ធនាគារជាតិនៃកម្ពុជានាពេលនេះ គឺដើម្បីបង្ហាញប្រាប់ដល់ប្រជាពលរដ្ឋពីសុចរិតភាពនៃការទុកដាក់រក្សាទុកមាសទាំងអស់នេះ ក៏ដូចជា ការឆ្លើយតបទៅនឹងមជ្ឈដ្ឋានមួយចំនួនដែលយកបញ្ហាមាសនេះមកវាយប្រហាររដ្ឋាភិបាលកម្ពុជាថា ចង់បន្លំយកមាសក្នុងពេលមានជំងឺឆ្លងកូវីដ ១៩ ដោយសារមិនដែលឮរដ្ឋាភិបាលនិយាយពីមាសនេះទៀត។ នេះបើតាមការអះអាងរបស់លោកនាយករដ្ឋមន្រ្តីហ៊ុន សែន នៅលើហ្វេសប៊ុកនៅព្រឹកថ្ងៃព្រហស្បតិ៍នេះ។ លោកនាយករដ្ឋមន្រ្តីថែមទាំងបញ្ជាក់ថា មកដល់ពេលនេះ ចំនួនមាសរបស់កម្ពុជាបានកើនឡើងជាលំដាប់ដែលកាលពីមួយឆ្នាំមុនមានតែ៣០តោនប៉ុណ្ណោះ តែនៅពេលនេះ បានកើនឡើង៣៦,៥តោន។
សូមបញ្ជាក់ថា នៅក្នុងពេលនៃការចាប់ផ្តើមវាយលុកដោយជំងឺកូវីដ ១៩មកក្នុងប្រទេសកម្ពុជា លោកនាយករដ្ឋមន្រ្តីហ៊ុន សែន បានលើកឡើងជាបន្តបន្ទាប់ពីលទ្ធភាពដែលកម្ពុជាអាចប្រយុទ្ធប្រឆាំងនឹងជំងឺឆ្លងនេះ និងលទ្ធភាពស្តារសេដ្ឋកិច្ច និងការជួយដល់សង្គមដោយប្រើប្រាស់កញ្ចប់ថវិកាខ្លួនឯង។ លោកហ៊ុន សែន ក៏បានលើកឡើងជារើយៗផងដែរពីទុនបម្រុងអន្តរជាតិ និងមាសដែលកម្ពុជាមាន តែមិនទាន់បានប៉ះពាល់នៅឡើយទេក្នុងការដោះស្រាយវិបត្តិជំងឺកូវីដ១៩នេះ។ ផ្ទុយទៅវិញ កម្ពុជាបានប្រើប្រាស់ថវិកាជាតិ ថវិកាសន្សំ និង ថវិកាជំនួយសប្បុរសធម៌នានា។
គិតមកដល់ពេលនេះ រដ្ឋាភិបាលកម្ពុជាបានបញ្ចេញថវិកាជាតិ១.១៦៤លានដុល្លារអាមេរិក ដើម្បីប្រយុទ្ធប្រឆាំង ស្តារសេដ្ឋកិច្ច និងសង្គមដែលរងការប៉ះពាល់ដោយជំងឺកូវីដ១៩។ ក្នុងនោះ ថវិកា៥៦៤លានដុល្លារអាមេរិក គឺជាថវិកាចំណាយអន្តរាគមន៍ ខណៈថវិកាចំនួន៦០០លានដុល្លារអាមេរិកទៀតជាចំណាយសង្គ្រោះការធ្វើជំនួញតាមរយៈការផ្តល់ជាឥណទាន ។ នេះបើតាមការបញ្ជាក់ឱ្យដឹងរបស់ក្រសួងសេដ្ឋកិច្ច និងហិរញ្ញវត្ថុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ