បញ្ហាជនអន្តោប្រវេសន៍៖ អតីតបក្សប្រឆាំងទាមទារឱ្យរដ្ឋាភិបាលកម្ពុជាធ្វើស្ថិតិឡើងវិញនិងអនុវត្តច្បាប់ឱ្យបានត្រឹមត្រូវ
អតីតបក្សសង្រ្គោះជាតិតាមរយៈសេចក្តីថ្លែងការណ៍មួយនៅថ្ងៃពុធនេះ បានប្រកាសមិនគាំទ្រចំពោះការផ្តល់ប័ណ្ណស្នាក់នៅអចិន្រ្តៃយ៍របស់ក្រសួងមហាផ្ទៃដល់ជនអន្តោប្រវេសន៍ជាង២ម៉ឺនគ្រួសារដែលរស់នៅខុសច្បាប់នៅកម្ពុជា។ តាមអតីតបក្សប្រឆាំង ការផ្តល់ប័ណ្ណសា្នក់នៅអចិន្ត្រៃយ៍នេះ គឺជាការអនុវត្តខុសច្បាប់អន្តោប្រវេសន៍របស់កម្ពុជា។ ដូច្នេះហើយ អតីតបក្សប្រឆាំងបានទាមទារឱ្យអាជ្ញាធរកម្ពុជាធ្វើស្ថិតិជនអន្តោប្រវេសន៍ឡើងវិញ ហើយអនុវត្តឱ្យបានត្រឹមត្រូវតាមច្បាប់ស្តីពីអន្តោប្រវេសន៍ និងច្បាប់ស្តីពីសញ្ជាតិរបស់កម្ពុជា។
ចុះផ្សាយនៅថ្ងៃ៖
ស្តាប់ - ០២:៤៥
អតីតគណបក្សប្រឆាំងបានសម្តែងនូវការព្រួយបារម្ភពីបញ្ហាជនអន្តោប្រវេសន៍នៅក្នុងប្រទេសកម្ពុជា ដោយសំអាងថា អាជ្ញាធរកម្ពុជាបានអនុវត្តច្បាប់ស្តីពីអន្តោប្រវេសន៍ និងច្បាប់ស្តីពីសញ្ជាតិមានភាពធូររលុង មិនត្រឹមត្រូវ និងមិនឯករាជ្យ ជាពិសេសទៅលើជនជាតិវៀតណាម។ ជនជាតិវៀតណាមចំនួន១.៩៩៦៧គ្រួសារ មានមនុស្សចំនួន៦៩.៧៨៧នាក់ក្នុងចំណោមជនអន្តោប្រវេសន៍សរុបចំនួន២០.១០៧គ្រួសារ មានមនុស្សចំនួន៦៩.៩៥៧នាក់ត្រូវបានក្រសួងមហាផ្ទៃរកឃើញថា បានកាន់កាប់ឯកសាររស់នៅមិនស្របច្បាប់នៅកម្ពុជា។ ប៉ុន្តែក្រោយមក ក្រសួងមហាផ្ទៃនៅតែសម្រេចផ្តល់ប័ណ្ណស្នាក់នៅអចិន្ត្រៃយ៍ដែលមានសុពលភាព២ឆ្នាំម្តងជាបន្តបន្ទាប់ដល់ពួកគេ។
អតីតគណបក្សសង្រ្គោះជាតិមិនគាំទ្រឡើយចំពោះចំណាត់ការនេះ ដោយអះអាងថា អាជ្ញាធរកម្ពុជាបានអនុវត្តផ្ទុយពីច្បាប់ស្តីពីអន្តោប្រវេសន៍។ ច្បាប់ស្តីពីអន្តោប្រវេសន៍ត្រង់មាត្រា៣៧ បានតម្រូវឱ្យអាជ្ញាធរមានសមត្ថកិច្ចត្រូវតែបណ្តេញជនអន្តោប្រវេសន៍ខុសច្បាប់ទាំងអស់នេះចេញពីប្រទេសកម្ពុជាឱ្យទៅប្រទេសកំណើតរបស់ពួកគេវិញ។ នេះ គឺជាទិដ្ឋភាពច្បាប់ដែលអតីតបក្សប្រឆាំងលើកយកមកសំអាងនៅក្នុងសេចក្តីថ្លែងការណ៍របស់ខ្លួននៅថ្ងៃទី១៥ ខែកក្កដា។ ជាមួយនឹងរឿងផ្តល់ប័ណ្ណស្នាក់នៅនេះ អតីតបក្សប្រឆាំងក៏បានលើកឡើងពីបញ្ហារដ្ឋាភិបាលកម្ពុជាផ្តល់ដី៤០ហិកតានៅក្នុងខេត្តកំពង់ឆ្នាំងទៅឱ្យជនជាតិវៀតណាមជាង២ពាន់គ្រួសាររស់នៅផងដែរ។
សម្រាប់អតីតគណបក្សសង្រ្គោះជាតិ វិធានការរបស់រដ្ឋាភិបាលកម្ពុជានេះ មិនមែនជាវិធានការវិជ្ជមាន ដើម្បីការពារផលប្រយោជន៍ជាតិ និង ប្រជាពលរដ្ឋខ្មែរនោះទេ តែផ្ទុយទៅវិញ វាអាចនឹងបង្កគ្រោះថ្នាក់ដល់បូរណភាពទឹកដី អធិបតេយ្យភាព ឯករាជ្យភាព និង សុវត្ថិភាពនៃប្រទេសកម្ពុជានាពេលអនាគត។ ហេតុដូច្នេះហើយ អតីតបក្សប្រឆាំងបានទាមទាររដ្ឋាភិបាលកម្ពុជាធ្វើស្ថិតិជនអន្តោប្រវេសន៍នៅកម្ពុជាឡើងវិញឱ្យបានត្រឹមត្រូវ ច្បាស់លាស់ និងតម្លាភាព ហើយត្រូវអនុវត្តច្បាប់ស្តីពីអន្តោប្រវេសន៍ និងច្បាប់ស្តីពីសញ្ជាតិឱ្យបានត្រឹមត្រូវ និងម៉ឺងម៉ាត់ប្រកបដោយឯករាជ្យ ដើម្បីកុំឱ្យបញ្ហានេះបង្កជាគ្រោះហានិភ័យដល់ជាតិ និងប្រជាពលរដ្ឋខ្មែរ។
ក្រសួងមហាផ្ទៃកម្ពុជាក៏បានមើលឃើញពីបញ្ហាជនអន្តោប្រវេសន៍នេះជាគ្រោះហានិភ័យចំពោះសន្តិសុខជាតិ សណ្តាប់ធ្នាប់ និងសុវត្ថិភាពសង្គមដែរ។ ប៉ុន្តែ ក្រសួងមហាផ្ទៃបានអះអាងថា ការដោះស្រាយបញ្ហានេះនាពេលកន្លងមក គឺត្រូវបានអូសបន្លាយ និងរាំងស្ទះ ដោយសារតែហេតុផលនយោបាយ។ តែទោះជាយ៉ាងណា ក្រសួងមហាផ្ទៃបានប្តេជ្ញាថា នឹងខិតខំគ្រប់គ្រងជនអន្តោប្រវេសន៍ឱ្យបានហ្មត់ចត់ និងមានវិធានការបង្ការ ទប់ស្កាត់ និងបណ្តេញចេញទាន់ពេលវេលាជនបរទេសណាដែលរស់នៅកម្ពុជាដោយខុសច្បាប់។ នេះបើតាមសេចក្តីថ្លែងការណ៍របស់ក្រសួងមហាផ្ទៃកាលពីថ្ងៃទី១០ ខែកក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ