ក្រោយចរចា៖ ថៃអនុញ្ញាតឲ្យកម្ពុជាយករថយន្ត៥០គ្រឿងចូលទៅដឹកទំនិញចេញពីផ្សាររុងក្លឿ
អភិបាលខេត្តបន្ទាយមានជ័យនិងអភិបាលខេត្តស្រះកែវរបស់ថៃបានប្រជុំគ្នាតាមវីដេអូ Conference នៅថ្ងៃអង្គារនេះដើម្បីចរចាបើកច្រកទ្វារព្រំដែនឡើងវិញ បន្ទាប់ពីបានបិទតាំងពីពាក់កណ្តាលខែមីនាមកដោយសារតែជំងឺកូវីដ១៩។ ទោះជាយ៉ាងណា ភាគីទាំងពីរនៅមិនទាន់ឯកភាពគ្នាថា នឹងបើកដំណើរការព្រំដែននេះឡើងវិញនៅថ្ងៃណាឡើយ ដោយគ្រាន់តែភាគីថៃអនុញ្ញាតឲ្យភាគីខ្មែរយករថយន្ត៥០គ្រឿងចូលទៅដឹកទំនិញរបស់អាជីវករខ្មែរចេញពីផ្សាររុងក្លឿតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១១
ជាលទ្ធផល ក្រោយកិច្ចប្រជុំ តាមវីដេអូ Conferenceរវាងអភិបាលខេត្តបន្ទាយមានជ័យ លោក អ៊ុំ រាត្រីនិងលោក វរ៉ាផាន់ សុវាណុន អភិបាលខេត្តស្រះកែវ ភាគីទាំងពីរបានឯកភាពជាគោលការណ៍ ឲ្យមានការចូលទៅផ្សាររុងក្លឿ ពិនិត្យទំនិញ និងដឹកឥវ៉ាន់មកវិញ ដោយប្រើរថយន្តចំនួន៥០គ្រឿង។ ក្នុងនោះរថយន្តមួយគ្រឿងគឺមានមនុស្ស២នាក់ ដោយត្រូវបំពេញបែបបទ ពិនិត្យសុខភាព តាមការណែនាំរបស់ក្រសួងសុខាភិបាល តែមិនទាន់អនុញ្ញាតឲ្យមានការចូលទៅលក់ដូរនៅផ្សារព្រំដែននោះឡើយ ។ ការចូលទៅផ្សារនោះ គឺចាប់ពីម៉ោង ៨:០០ នាទីព្រឹក ដល់ ម៉ោង ១៣:០០ នាទីរសៀលត្រូវចេញពីទឹកដីថៃវិញ។ នេះបើតាមរដ្ឋបាលខេត្តបន្ទាយមានជ័យ។
ទោះជាយ៉ាងណានៅមិនទាន់កំណត់ថ្ងៃជាក់លាក់ឲ្យភាគីកម្ពុជាយករថយន្តចូលទៅដឹកទំនិញចេញពីផ្សាររុងក្លឿនោះទេដោយរងចាំការជូនដំណឹងពីថ្នាក់លើរបស់ប្រទេសថៃ។ចំណែកច្រកទ្វារព្រំដែនអន្តរជាតិប៉ោយប៉ែត-ខ្លងលឹក គឺបន្តបិទដដែល ប៉ុន្តែករណីប្រជាពលរដ្ឋខ្មែរដែលចេញពីថៃ មកមាតុប្រទេសវិញគឺមានការសម្របសម្រួលឲ្យចេញតាមច្រកអូរបីជាន់ដដែល។
បើតាមអ្នកនាំពាក្យសាលាខេត្តបន្ទាយមាណជ័យ ពលរដ្ឋកម្ពុជាប្រហែល ១ ម៉ឺន ២ ពាន់នាក់ តែងចេញចូលប្រទេសថៃជាពិសេសអាជីវករខ្មែរដែលមានតូបលក់ដូរនៅផ្សាររុងក្លឿ។
សូមញ្ជាក់ដែរថា ការចរចាស្វែងរកការបើកព្រំដែនឡើងវិញនេះគឺក្រោយពីប្រជាពលរដ្ឋនៅក្រុងប៉ោយប៉ែត កាលពីដើមខែមិថុនានេះប៉ុនប៉ងធ្វើបាតុកម្មដើម្បីទាមទារឱ្យអាជ្ញាធរខ្មែរអន្តរាគមន៍ទៅខាងភាគីថៃសុំបើកទ្វារព្រំដែនប្រទេសទាំង២ឡើងវិញ។ តែគម្រោងធ្វើបាតុកម្មនោះត្រូវបានខកខាន ខណៈក្រុមសមត្ថកិច្ច ដាក់កម្លាំងពង្រាយបិទផ្លូវ មិនឲ្យមានការជួបជុំ។
ជាការកត់សំគាល់ ផែនការបើកព្រំដែនកម្ពុជានៅច្រកទ្វារអន្តរជាតិប៉ោយប៉ែតឡើងវិញនៅពេលនេះ គឺស្របពេលគ្នាដែលកម្ពុជាបានអនុញ្ញាតឲ្យពលរដ្ឋវៀតណាមអាចចេញចូលប្រទេសកម្ពុជាជាធម្មតាតាមលិខិតចុះថ្ងៃទី១៧មិថុនា។ ប៉ុន្តែនៅបន្តអនុវត្តវិធានការប្រយុទ្ធនឹងជំងឺកូវីដ១៩ តាមវិធានសុខាភិបាល។ដោយឡែកអាជ្ញាធរខេត្តស្ទឹងត្រែងក៏អះអាងថានៅថ្ងៃទី២៣មិថុនាដែរថា កម្ពុជានិងឡាវក៏កំពុងពិនិត្យលទ្ធភាពនៃការបើកច្រកព្រំដែនប្រទេសទាំងពីរឡើងវិញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ