ខេត្តព្រះសីហនុ៖ ក្រោយការចាកចេញយ៉ាងគំហុក ជនជាតិចិនបានត្រលប់មកវិញជាបណ្តើរៗហើយ
ជនជាតិចិនប្រមាណជាង១ពាន់នាក់ បានសម្រុកចូលមកខេត្តព្រះសីហនុវិញជាបណ្តើៗហើយ គិតចាប់តាំងពីចុងខែឧសភា ដល់ដើមខែមិថុនានេះ។ ជនជាតិចិនទាំងនេះ ភាគច្រើនគឺជាអ្នកជំនួញចាស់ៗ ដែលមានអាជីវកម្ម នៅខេត្តព្រះសីហនុ មុនពេលផ្ទុះជំងឺកូវីដ១៩ ។ អ្នកនាំពាក្យសាលាខេត្តព្រះសីហនុរំពឹងថា ការវិលត្រលប់មកវិញ របស់អ្នកវិនិយោគចិនទាំងនេះ នឹងធ្វើឲ្យខេត្តព្រះសីហនុ កាន់តែមានសក្ដានុពល ទាំងសេដ្ឋកិច្ច ទេសចរណ៍ និងឧស្សាហកម្ម។ ទន្ទឹមនឹងការមកដល់របស់ជនជាតិចិននេះដែរ រដ្ឋបាលខេត្តអះអាងថាខ្លួនបានគោរពតាមគោលការណ៍ណែនាំ របស់ក្រសួងសុខាភិបាលយ៉ាងហ្មត់ចត់ជាទីបំផុត ដើម្បីការពារការរីករាលដាលជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:១៥
ក្រៅពីអ្នកជំនួញចិនច្រើនជាងគេ ក៏មានដែរអ្នកវិនិយោគ បុគ្គលិកក្រុមហ៊ុន និង កម្មករ ដែលសរុបមានចំនួន ១,០៦៦នាក់ ( ស្រី ២១៩នាក់)។ ជនជាតិចិនទាំងនេះ បានចូលមកកម្ពុជា តាមរយៈជើងហោះហើរត្រង់មកកាន់ខេត្តព្រះសីហនុ គិតចាប់តាំងពីថ្ងៃទី ២៣ ខែឧសភា រហូតមកដល់ថ្ងៃទី១៧ មិថុនានេះ។ លោក ឃាង ភារម្យ អ្នកនាំពាក្យសាលាខេត្តព្រះសីហនុ បានលើកឡើងថានេះជាសញ្ញាល្អ ចំពោះការកម្រើកឡើងវិញ នៃសកម្មភាពសេដ្ឋកិច្ចនៅក្នុងខេត្តនេះ ជាពិសេសកំណើនសេដ្ឋកិច្ចទៅលើវិស័យទេសចរណ៍ ឧស្សាហកម្ម និង ការវិនិយោគ។ ខណៈជនជាតិចិននៅខេត្តព្រះសីហនុភាគច្រើន បានវិនិយោគលើវិស័យទេសចរណ៍កាស៊ីណូ សំណង់ សេវាកម្ម និងផលិតកម្ម ជាដើម។
ជាក់ស្តែងរយៈពេលបួនឆ្នាំចុងក្រោយនេះ ខេត្តនេះបានទាក់ទាញការវិនិយោគគម្រោងសាងសង់ដែលមានតម្លៃជាង ៧ ពាន់លានដុល្លារ ដែលភាគច្រើនមកពីជនជាតិចិន។
ទន្ទឹមនឹងការមកដល់នៃជនជាតិចិនដែរ អ្នកនាំពាក្យសាលាខេត្តព្រះសីហនុ អះអាងថា អាជ្ងាធរក៏មិនភ្លេច អនុវត្តតាមចំណាត់ការនិងគោលការណ៍ណែនាំរបស់ក្រសួងសុខាភិបាលដែរ។ ចំពោះការមកដល់ គឺមានការធ្វើតេស្តិ៍ ពិនិត្យសុខភាពគ្រប់ៗគ្នា តម្រូវឱ្យធ្វើចត្តាឡឺស័ករយៈពេល១៤ និងយកសំណាកទៅពិនិត្យនៅវិទ្យាស្ថានប៉ាស្ទ័រ នៅក្រុងភ្នំពេញ ដើម្បីឱ្យប្រាកដថាគ្មានកូរ៉ូណាវីរុស។
យ៉ាងណាបើតាម លោក គួច ចំរើន អភិបាលខេត្តព្រះសីហនុធ្លាប់បានលើកឡើងការពីពេលថ្មីៗនេះថា បច្ចុប្បន្ន នេះមានតែជនជាតិចិនចំនួន ១៥.០០០ នាក់ប៉ុណ្ណោះដែលរស់នៅក្នុងក្រុងព្រះសីហនុ ខណៈពេលមុនផ្ទុះកូវីដ១៩ មានជនជាតិចិនរស់នៅស្ទើពាក់កណ្តាលនៃប្រជាជនសរុប៨ម៉ឺននាក់។
គួររលឹកថា ជនជាតិចិន បានសម្រុកចាកចេញពីខេត្តព្រះសីហនុជាបណ្តើរផ្តើមដំបូង គឺនៅដើមខែកញ្ញា ឆ្នាំ២០១៩ ដោយសារ កាលណោះរដ្ឋាភិបាលប្រកាសបិទអាជីវកម្ម ល្បែងអនឡាញ ក្រោមហេតុផល ពង្រឹងសន្តិសុខ។ បន្ទាប់មកដោយសារការផ្ទុះរាតត្បាតជាសកលនៃជំងឺកូវីដ ១៩ ចំនួននៃការចាកចេញកាន់តែច្រើនឡើង ហើយប៉ះពាក់ស្ទើរគ្រប់វិស័យទាំងអស់។ បើគិតតែក្នុងវិស័យកាស៊ីណូ ការចាកចេញរបស់ជនជាតិចិនកន្លងមកនេះ បានធ្វើឲ្យកម្មករក្នុងវិស័យកាស៊ីណូ យ៉ាងហោចណាស់ជាង ៧ពាន់នាក់ បាត់បង់ការងារធ្វើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ