ក្រុមយុវជនបរិស្ថានបដិសេធមិនប្រគល់ញត្តិដល់មន្រ្តីខុន្ធកាល័យនាយករដ្ឋមន្រ្តីដែលចុះទៅយកដល់ខេត្តកោះកុង
នៅព្រឹកថ្ងៃព្រហស្បតិ៍នេះ មន្រ្តីខុន្ធកាល័យនាយករដ្ឋមន្រ្តី ក្រសួងបរិស្ថាន និងរដ្ឋបាលខេត្តកោះកុង បានជួបជាមួយក្រុមយុវជនការពារបរិស្ថានដែលជិះកង់ពីខេត្តកោះកុងមកកាន់រាជធានីភ្នំពេញ ដើម្បីទាមទារឱ្យរដ្ឋាភិបាលកម្ពុជាដាក់តំបន់កោះកុងក្រៅ ជាឧទ្យានជាតិសមុទ្រ។ ប៉ុន្តែការជួបគ្នាផ្ទាល់នេះ មិនទទួលបានដំណោះស្រាយណាមួយទេ ដោយក្រុមយុវជនបដិសេធធ្វើតាមការចង់បានរបស់អាជ្ញាធរ និង បានបដិសេធមិនប្រគល់ញត្តិទាមទារដល់មន្រ្តីខុន្ធកាល័យនាយករដ្ឋមន្រ្តីផងដែរ។
ចុះផ្សាយនៅថ្ងៃ៖
ស្តាប់ - ០២:៣១
ក្រុមយុវជនការពារបរិស្ថានបានអះអាងថា ការមិនប្រគល់ញត្តិដល់មន្រ្តីខុន្ធកាល័យនាយករដ្ឋមន្រ្តី ដោយសារតែពួកគេគ្មានញត្តិនៅក្នុងដៃ ព្រោះមានតែនៅក្នុងកុំព្យូទ័រនៅរាជធានីភ្នំពេញ។ ម្យ៉ាងវិញទៀត ពួកគេចង់យកញត្តិនេះមកដាក់នៅទុន្ធកាល័យនាយរកដ្ឋមន្រ្តីដោយផ្ទាល់តែម្តង។ លោកប៉ាន់ខែម ប៊ុនថន នាយករងខុន្ធកាល័យនាយករដ្ឋមន្រ្តីបានសម្តែងនូវការហូសចិត្តចំពោះកាយវិការរបស់ក្រុមយុវជនទាំងនេះ។ លោកប៉ាន់ខែម ប៊ុនថន បានចុះទៅជួបជាមួយក្រុមយុវជននេះតាំងពីយប់ថ្ងៃពុធ ហើយរហូតដល់ព្រឹកថ្ងៃព្រហស្បតិ៍នៅតែបរាជ័យមិនអាចសម្របសម្រួល និងទទួលបានញត្តិពីក្រុមយុវជនឡើយ។
តាមគម្រោង ក្រុមយុវជនស្រឡាញ់បរិស្ថានចំនួន១៧នាក់ បានធ្វើយុទ្ធនាការសង្រ្គោះតំបន់កោះកុងក្រៅដោយជិះកង់ពីខេត្តកុងកោះមកកាន់រាជធានីភ្នំពេញ ដើម្បីដាក់ញត្តិនៅខុន្ធការិយាល័យនាយករដ្ឋមន្រ្តីស្នើឱ្យដាក់តំបន់កោះកុងក្រៅទៅជាតំបន់ឧទ្យានជាតិសមុទ្រ។ ប៉ុន្តែការជិះកង់ជាក្រុមរបស់ពួកគេនេះ ត្រូវបានអាជ្ញាធរខេត្តកោះកុងឃាត់ដំណើរនៅចំណុចក្បែរសាលាស្រុកកោះកុង ដើម្បីពិនិត្យសុខភាពរកជំងឺកូវីដ១៩។ ក្រោយពីពិនិត្យសុខភាព អាជ្ញាធរខេត្តកោះកុងក៏បានដកហូតកង់របស់ពួកគេទៅរក្សាទុកថែមទៀត។ អាជ្ញាធរខេត្តកោះកុង និង នាយករងខុន្ធកាល័យនាយកមន្រ្តីបានចោទប្រកាន់ពួកគេថា ធ្វើសកម្មភាពជិះកង់នេះមិនបានជូនដំណឹងដល់អាជ្ញាធរ និង ធ្វើឡើងក្នុងគោលបំណងផ្សេង។
ក៏ប៉ុន្តែក្រុមយុវជនបានអះអាងថា សកម្មភាពរបស់ពួកគេនេះ គឺមិនជាប់ពាក់ព័ន្ធនឹងគណបក្សនយោបាយណាមួយឡើយ ហើយការធ្វើសកម្មភាពនេះ មានគោលបំណងតែមួយគត់ គឺដើម្បីបរិស្ថាន និយាយឱ្យចំ គឺការពារតំបន់កោះកុងក្រៅ នៅក្នុងខេត្តកោះកុង។ ក្រុមយុវជនក៏បានអះអាងនៅមុខក្រុមអាជ្ញាធរដែរថា សកម្មភាពរបស់ពួកគេនេះ គឺមិនខុសនឹងច្បាប់នោះទេ ហើយបើសិនខុស តើខុសនឹងច្បាប់មាត្រាមួយណា។
ក៏ប៉ុន្តែ ក្រសួងបរិស្ថានវិញបានចាត់ទុកសកម្មភាពរបស់ក្រុមយុវជននេះ ថាគ្រាន់តែជាលេស ដើម្បីបិទបាំងនូវឧបាយកលនយោបាយទុច្ចរិតដែលស្ថិតក្រោមការរៀបចំមួយដ៏ច្បាស់លាស់ប៉ុណ្ណោះ។ ក្រសួងបរិស្ថានបានគូសបញ្ជាក់ថា បើទោះបីជាគ្មានយុទ្ធនាការ ឬការទាមទារណាមួយក៏ដោយ ក៏រាជរដ្ឋាភិបាលកម្ពុជាតាមរយៈក្រសួងបរិស្ថានបានការពារនិង អភិរក្សតំបន់កោះកុងក្រៅនេះ ដោយបានបញ្ជូនក្រុមមន្ត្រីជំនាញបានធ្វើការសិក្សាស្រាវជ្រាវ រៀបចំឯកសារ និងទិន្នន័យផ្សេងៗទាក់ទងនឹងតំបន់កោះកុងក្រៅនេះតាំងពីឆ្នាំ ២០១៦ ដើម្បីដាក់តំបន់នេះជា«ឧទ្យានជាតិសមុទ្រ»។ បើតាមក្រសួងបរិស្ថាន នៅក្នុងគម្រោងផែនការ ក្រសួងបរិស្ថានរំពឹងថា នឹងអាចប្រកាសតំបន់កោះកុងក្រៅនេះជា«ឧទ្យានជាតិសមុទ្រ»នៅអំឡុងឆ្នាំ២០២១ ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ