មន្ត្រីសិទ្ធិមនុស្សជំរុញឲ្យស៊ើបអង្កេតលើករណីសង្ស័យធ្វើទារុណកម្មរហូតដល់ស្លាប់អ្នកឃុំ
ក្រុមមន្ត្រីសិទ្ធិមនុស្ស នៅថ្ងៃសៅរ៍ ទី៣០ខែឧសភានេះជំរុញឲ្យអាជ្ញាធរកម្ពុជាបើកការស៊ើបអង្កេតឲ្យបានហ្មត់ចត់ និងត្រូវមានយន្តការតាមដានការអនុវត្តច្បាប់របស់មន្ត្រីពន្ធនាគារ ដើម្បីទប់ស្កាត់ការធ្វើទារុណកម្មលើអ្នកជាប់ឃុំឃាំងរហូតដល់ស្លាប់។ សំណើនេះធ្វើឡើងបន្ទាប់ពីមានករណីសង្ស័យនៃការធ្វើទារុណកម្មរហូតដល់ស្លាប់មនុស្សយ៉ាងតិច៣នាក់ នៅពន្ធនាគារ ខេត្តបាត់ដំបង រតនគិរី និងបន្ទាយមានជ័យ នៅក្នុងឆ្នាំ២០២០នេះ។
ចុះផ្សាយនៅថ្ងៃ៖
ស្តាប់ - ០២:៣៤
ផ្តើមចេញពីខេត្តរតនគិរី ស្ត្រីជាអ្នកទោសម្នាក់ បានស្លាប់ពេលបញ្ជូនទៅដល់មន្ទីរពេទ្យនៅថ្ងៃទី២១ខែឧសភា ឆ្នាំ២០២០ បន្ទាប់ពីជាប់ឃុំខ្លួនក្នុងពន្ធនាគារខេត្តនេះទាក់ទងនឹងរឿងដីធ្លី។ នេះជាករណីទី៣នៅឆ្នាំនេះ បន្ទាប់ពីករណីដូចគ្នានេះ បានកើតឡើងនៅខេត្តបាត់ដំបង ដែលបុរសជាជនសង្ស័យម្នាក់បានស្លាប់ពេលបញ្ជូនទៅដល់មន្ទីរពេទ្យកាលពីថ្ងៃទី៣០មេសា។ ករណីនេះត្រូវបានក្រុមគ្រួសារប្តឹងមន្ត្រីពន្ធនាគារពីបទធ្វើទារុណកម្មរហូតដល់ស្លាប់។ ប៉ុន្តែករណីទាំងពីរនេះនៅមិនទាន់មានមន្ត្រីពន្ធនាគារឬសមត្ថកិច្ចពាក់ព័ន្ធណាម្នាក់ចេញមុខទទួលខុសត្រូវឡើយ។ ដោយឡែក ករណីស្លាប់បុរសអ្នកតវ៉ារឿងដីធ្លីនៅខេត្តបន្ទាយមានជ័យត្រូវបានប្រមុខរដ្ឋាភិបាលបញ្ជាឲ្យស៊ើបអង្កេត ហើយជាលទ្ធផល មានមន្ត្រីប៉េអឹម២នាក់ត្រូវបានតុលាការចោទប្រកាន់ពាក់ព័ន្ធនឹងអំពើនោះ។
យ៉ាងណាក៏ដោយ ក្រុមមន្ត្រីសិទ្ធិមនុស្ស នៅតែជំរុញឲ្យអាជ្ញាធរពាក់ព័ន្ធបើកស៊ើបអង្កេតឲ្យបានហ្មត់ចត់ និងត្រូវមានយន្តការតាមដានការអនុវត្តច្បាប់របស់មន្ត្រីពន្ធនាគារ ដើម្បីទប់ស្កាត់ការធ្វើទារុណកម្មលើអ្នកជាប់ឃុំឃាំងរហូតដល់ស្លាប់ ខណៈកម្ពុជាបានផ្តល់សច្ចាប័នលើអនុសញ្ញាប្រឆាំងការធ្វើទារុណកម្មតាំងពីឆ្នាំ២០០៧។
លោក អំ សំអាត នាយករងអង្គការលីកាដូ បានកត់សម្គាល់ថា ករណីសង្ស័យធ្វើទារុណកម្មលើអ្នកជាប់ឃុំជាបន្តបន្ទាប់មកនេះ កើតឡើងដោយសាររដ្ឋាភិបាលខ្វះយន្តការតាមដានការអនុវត្តច្បាប់របស់មន្ត្រីពន្ធនាគារ និងការដាក់ទោសជនដៃដល់មិនបានធ្ងន់ធ្ងរ។
ដូចគ្នានេះដែរ លោក សឹង សែនករុណា អ្នកនាំពាក្យសមាគម អាដហុក បានលើកយកករណីនៅខេត្តបន្ទាយមានជ័យមកជាឧទាហរណ៍ថា ការចោទប្រកាន់របស់តុលាការទៅលើមន្ត្រីប៉េអឹម២នាក់ដែលជាប់ពាក់ព័ន្ធនឹងការធ្វើទារុណកម្មនោះ គឺស្រាលពេក។ មានន័យថា មិនចំនិយមន័យនៃការធ្វើទារុណកម្មដែលអ្នកប្រព្រឹត្តត្រូវជាប់ទោសឧក្រិដ្ឋ តែករណីនោះតុលាការបានចោទត្រឹមតែជាករណីហិង្សា ក្នុងបទល្មើសមជ្ឈឹមទៅវិញ។
បើតាមក្រុមមន្ត្រីសិទ្ធិមនុស្ស ការដាក់ទោសស្រាលៗទៅលើមន្ត្រីដែលធ្វើទារុណកម្ម និងកង្វះយន្តការតាមដានការអនុវត្តច្បាប់របស់មន្ត្រីពន្ធនាគារនេះហើយ ដែលការធ្វើទារុណកម្មលើអ្នកជាប់ឃុំនៅតែកើតមាន បើទោះជានៅឆ្នាំ២០០៩ គណៈកម្មាធិការអន្តរក្រសួង ដើម្បីប្រឆាំងការធ្វើទារុណកម្មត្រូវបានបង្កើតឡើងក្តី។
យោងតាមអង្គការលីកាដូ តាំងពីឆ្នាំ២០០១មក មានទណ្ឌិត និងពិរុទ្ធជនស្លាប់នៅក្នុងពន្ធនាគារចំនួន ៥៣នាក់សង្ស័យទាក់ទងនឹងការធ្វើទារុណកម្ម ក្នុងចំណោមការធ្វើទារុណកម្មជាង២ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ