លោក ស ខេង បញ្ជាឲ្យទប់ស្កាត់ការឆ្លងដែនខុសច្បាប់ និងចាប់មេខ្យល់មកដាក់ទោសតាមច្បាប់
រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោក ស ខេង នៅថ្ងៃពុធនេះ បានដាក់បទបញ្ជាឲ្យសមត្ថកិច្ចតាមព្រំដែនបង្កើនការទប់ស្កាត់ពលរដ្ឋឆ្លងដែនខុសច្បាប់ និងតាមចាប់មេខ្យល់មកផ្តន្ទាទោសតាមច្បាប់។ ការដាក់បទបញ្ជាជាថ្មីបែបនេះគឺធ្វើឡើងក្នុងពិធីផ្សព្វផ្សាយរបាយការណ៍ជាតិ ឆ្នាំ២០១៩ និងលើកទិសដៅឆ្នាំ២០២០ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ខណៈការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទមានការកើនឡើង។
ចុះផ្សាយនៅថ្ងៃ៖
ស្តាប់ - ០១:៣៦
ការដាក់បទបញ្ជារបស់ប្រមុខក្រសួងមហាផ្ទៃ លោក ស ខេង គឺសង្កត់ធ្ងន់លើការលួចឆ្លងដែនខុសច្បាប់ទៅប្រទេសថៃ ដែលអាជ្ញាធចាប់ខ្លួនបានជាបន្តបន្ទាប់មកនេះ។
បើតាមលោក ស ខេង នៅពេលច្រកព្រំដែនអន្តរជាតិបានបិទដើម្បីទប់ស្កាត់ជំងឺកូវីដ១៩ប៉ុន្តែនៅតាមច្រករបៀងតូចៗ នៅមានមេខ្យល់លួចនាំមនុស្សឆ្លងដែនខុសច្បាប់។ដូចនេះលោកបញ្ជាឲ្យសមត្ថកិច្ចតាមព្រំដែនត្រូវបង្កើនការរឹតបន្តឹង និងតាមចាប់មេខ្យល់មកផ្តន្ទាទោសតាមច្បាប់។
ជាមួយគ្នានោះ លោកស្រី ជូ ប៊ុនអេង អនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានគូសបញ្ជាក់ថា បញ្ហាប្រឈមនៃអំពើជួញដូរមនុស្សនាពេលចុងក្រោយនេះ គឺដោយសារការនាំពលរដ្ឋឆ្លងដែនដោយខុសច្បាប់ ពិសេសទៅកាន់ប្រទេសថៃ។
ការដែលពលរដ្ឋខ្មែរលួចឆ្លងដែនទៅរកការងារធ្វើនៅប្រទេសថៃ នៅតែកើតមាន បើទោះបីជាអាជ្ញាធរប្រទេសទាំងពីរបានបិទព្រំដែន ដើម្បីទប់ស្កាត់ការរីករាលដាលជំងឺកូវីដ១៩ក៏ដោយ។ ជាក់ស្តែងនៅថ្ងៃទី២៧ឧសភានេះ សមត្ថកិច្ចបានឃាត់ខ្លួនពលរដ្ឋខ្មែរចំនួន៦នាក់នៅខេត្តបន្ទាយមានជ័យ ខណៈពួកគេលួចឆ្លងដែនបំណងទៅរកការងារធ្វើនៅខេត្តឈុនបុរី។ នៅថ្ងៃដដែលនេះ ការិយាល័យប្រឆាំងការជួញដូរមនុស្សក៏បានឃាត់ខ្លួនជនសង្ស័យ២នាក់ ដែលនាំក្មេងៗឲ្យដើរសុំទាននៅតាមភ្លើងស្តុបក្នុងទីក្រុងភ្នំពេញ ដោយសង្គ្រោះបានកុមារ៦នាក់ ក្នុងនោះមានទារក២នាក់។
បើតាម លោកស្រី ជូ ប៊ុនអេង សមត្ថកិច្ចបង្ក្រាបបាន ករណីជួញដូរមនុស្ស និងអំពើធ្វើអាជីវកម្មផ្លូវភេទសរុបចំនួនចំនួន១៦៩ករណីនៅឆ្នាំ២០១៩ គឺកើនឡើង៣៥ករណី បើធៀបនឹងឆ្នាំ២០១៨។ ក្នុងនោះឃាត់ខ្លួនជនសង្ស័យបាន២២៩នាក់ និងបានសង្គ្រោះជនរងគ្រោះចំនួន៤៥៦នាក់ ដោយបានផ្ដន្ទាទោសជនល្មើសបានមួយចំនួនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ