កម្ពុជា៖ ចលនាទេសចរក្នុងស្រុកចាប់ផ្ដើមកម្រើកឡើងវិញចាប់ពីដើមខែឧសភា
រយៈពេល២សប្ដាហ៍ដើមខែឧសភាឆ្នាំ២០២០នេះ ចលនាទេសចរក្នុងស្រុកបានចាប់ផ្ដើមកើនឡើងវិញជាបណ្ដើរៗហើយ បន្ទាប់ពីស្ងប់ស្ងាត់អស់មួយរយៈពេលដោយសារតែវិបត្តិនៃជំងឺកូវីដ១៩។ របាយការណ៍ពីក្រសួងទេសចរណ៍បង្ហាញថា មានភ្ញៀវទេសចរប្រមាណជាង២៥ម៉ឺននាក់បានចេញដើរកម្សាន្តនៅទូទាំងប្រទេស នៅក្នុងរយៈពេល២សប្ដាហ៍ដើមខែឧសភាកន្លងទៅ។ ចំនួននេះកើនឡើងជិត ៤៧% បើធៀបទៅនឹងរយៈពេលពីរសប្ដាហ៍ចុងខែមេសា។
ចុះផ្សាយនៅថ្ងៃ៖
ស្តាប់ - ០២:៤៤
គឺចាប់ពីថ្ងៃទី០៤ ដល់ថ្ងៃទី១៧ ខែឧសភាមក មានភ្ញៀវទេសចរចំនួនជាង២៥ម៉ឺននាក់ បានធ្វើដំណើរកម្សាន្តនៅតាមគោលដៅទេសចរណ៍នានាទូទាំងប្រទេសកម្ពុជា។ ចំនួននេះ កើនឡើងជិត ៤៧ភាគរយ បើធៀបទៅនឹងរយៈពេលពីរសប្ដាហ៍នៃចុងខែមេសាកន្លងទៅ។ ភាគច្រើននៃអ្នកទេសចរទាំងនេះ បានធ្វើដំណើរទៅកាន់តំបន់អេកូទេសចរណ៍នាភូមិភាគឦសាន ភាគនិរតី និងតំបន់ឆ្នេរ ជាពិសេសខេត្តព្រះសីហនុ ខេត្តកំពត និងខេត្តកែបជាដើម។ នេះបើតាមការគូសបញ្ជាក់ពីលោក ថោង ខុន រដ្ឋមន្ដ្រីក្រសួងទេសចរណ៍ តាមរយៈទំព័រហ្វេសប៊ុកផ្លូវការនៃក្រសួងទេសចរណ៍ កាលពីថ្ងៃទី២២ឧសភា។
ក្នុងចំណោមភ្ញៀវទេសចរសរុបជាង២៥ម៉ឺននាក់នោះ មានភ្ញៀវទេសចរជាតិចំនួន ២៥៣,២៥៦ នាក់ និងភ្ញៀវទេសចរបរទេសផ្ទៃក្នុង មានប្រមាណជា ៤,២៨៥ នាក់។
គួរជម្រាបជូនថា វិបត្តិនៃជំងឺកូវីដ១៩ បានធ្វើឲ្យប៉ះពាល់ដល់វិស័យទេសចរណ៍កម្ពុជាយ៉ាងធ្ងន់ធ្ងរ ជាពិសេសនៅក្នុងអំឡុងខែមេសាកន្លងទៅ ដោយគ្មានភ្ញៀវទេសចរបរទេសណាធ្វើដំណើរមកកម្សាន្តនៅកម្ពុជានោះឡើយ បើមានក៏ជាភ្ញៀវដែលស្ថិតនៅក្នុងស្រុក ឬភ្ញៀវដែលជាប់កុន មិនអាចធ្វើដំណើរវិលត្រឡប់ទៅវិញតែប៉ុណ្ណោះ។ យ៉ាងណាក៏ដោយ បើយោងតាមរបាយការណ៍៣ខែ ពោលគឺនៅមុនពេលនៃការផ្ទុះឡើងខ្លាំងនៃជំងឺកូវីដ១៩ កម្ពុជាបានទទួលភ្ញៀវទេសចរបរទេសប្រមាណជា១លាន១សែននាក់ ដែលក្នុងនោះ ភ្ញៀវទេសចរចិនមានចំនួនច្រើនជាងគេ បន្ទាប់មកគឺភ្ញៀវទេសចរថៃ និងវៀតណាម។
បើតាមលោករដ្ឋមន្ដ្រី នៅចំពោះមុខការកើនឡើងនៃចលនាទេសចរផ្ទៃក្នុងនេះ ក្រសួងទេសចរណ៍បានសហការជាមួយវិស័យឯកជន ដោយបានរៀបចំនូវវិធានការស្ដង់ដារពិសេសមួយ សម្រាប់ធានាសុវត្ថិភាពទេសចរណ៍ ដែលគ្រោងនឹងដាក់ឲ្យអនុវត្តនៅចុងខែឧសភានេះ។ វិធានការស្ដង់ដារពិសេសនោះរួមមានក្រមប្រតិបត្តិគោលការណ៍ណែនាំចាំបាច់មួយចំនួនបន្ថែមពីលើវិធានការសុវត្ថិភាពនិងអនាម័យ ដែលបានដាក់ចេញដោយក្រសួងសុខាភិបាល ជាពិសេសលក្ខខណ្ឌតម្រូវចាំបាច់មួយចំនួនចំពោះបុគ្គលិក ភ្ញៀវទេសចរ និងដៃគូសហប្រតិបត្តិការតាមរមនីយដ្ឋាន សហគមន៍ទេសចរណ៍ សណ្ឋាគារ និងភោជនីយដ្ឋានជាដើម។
គួរជម្រាបជូនផងដែរថា ក្រសួងទេសចរណ៍កម្ពុជាកាលពីពេលថ្មីៗនេះ បានអំពាវនាវដល់ម្ចាស់សណ្ឋាគារ និងសេវាកម្មស្នាក់នៅទេសចរណ៍ទាំងអស់ ឲ្យយកឱកាសនៃវិបត្តិជំងឺកូវីដ១៩នេះ កែលម្អគុណភាពសេវាកម្មរបស់ខ្លួន ដើម្បីត្រៀមខ្លួនទទួលភ្ញៀវទេសចរនៅក្រោយវិបត្តិបិទបញ្ចប់នាពេលខាងមុខ។ ក្រសួងទេសចរណ៍បញ្ជាក់ពីសុទិដ្ឋិនិយមរបស់ខ្លួនថា វិស័យទេសចរណ៍នៅកម្ពុជានឹងវិលត្រឡប់ទៅរកភាពល្អប្រសើរឡើងវិញក្រោយវិបត្តិនៃការរីករាលដាលជាសកលនៃជំងឺកូវីដ១៩ ស្របតាមយុទ្ធនាការ Stay Home Today, Travel Tomorrow ឬជាភាសាខ្មែរថា «នៅផ្ទះថ្ងៃនេះ ដើរលេងថ្ងៃស្អែក»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ