រដ្ឋាភិបាលកម្ពុជាសម្រេចលើកលែងការបង់ថ្លៃអគ្គិសនីលើផ្នែកខ្លះដល់រោងចក្រ សហគ្រាសដែលព្យួរការងារ
រដ្ឋាភិបាលកម្ពុជាតាមរយៈក្រសួងរ៉ែ និងថាមពលបានសម្រេចលើកលែងការបង់ថ្លៃអគ្គិសនីលើផ្នែកខ្លះចំពោះទីតាំងអាជីវកម្មដែលបានព្យួរការងារ ឬ កាត់បន្ថយសកម្មភាពផលិតកម្មដោយសារតែវិបត្តិជំងឺកូវីដ១៩។ ចំណែក ដែលមានបរិយាកាសអំណោយផលអាចបង្កើនសកម្មភាពផលិតកម្ម ឬអាជីវកម្មរបស់ខ្លួនវិញ គឺក្រសួងរ៉ែ និងថាមពលនឹងលើកទឹកចិត្តដោយបញ្ចុះថ្លៃអគ្គិសនី២៥%។
ចុះផ្សាយនៅថ្ងៃ៖
ស្តាប់ - ០២:៤០
អាជីវកម្មដែលទទួលបានការអនុគ្រោះលើកលែងការបង់ និងបញ្ចុះថ្លៃអគ្គិសនីពីក្រសួងរ៉ែ និងថាមពលនេះ គឺនៅក្នុងវិស័យឧស្សាហកម្ម កសិកម្ម ពាណិជ្ជកម្ម និងសេវាកម្ម។ តាមរយៈសេចក្តីប្រកាសនៅថ្ងៃទី១៩ ខែឧសភា ក្រសួងរ៉ែ និងថាមពលបានអះអាងថា រដ្ឋាភិបាលកម្ពុជានឹងផ្តល់ការអនុគ្រោះលើកលែងការបង់ថ្លៃអគ្គិសនីតាមលក្ខខណ្ឌអប្បរមា និង លើកលែងការបង់ថ្លៃតាមលក្ខខណ្ឌអានុភាព ដោយអនុញ្ញាតឱ្យបង់ថ្លៃអគ្គិសនីត្រឹមតែចំនួនគីឡូវ៉ាត់ម៉ោងដែលបានប្រើប្រាស់ជាក់ស្តែង។ ការលើកលែងការបង់ថ្លៃអគ្គិសនីនេះ គឺមានរយៈពេល៥ខែ ចាប់ពីខែមិថុនារហូតដល់ខែតុលា ឆ្នាំ២០២០។
ក៏ប៉ុន្តែចំពោះទីតាំងអាជីវកម្មណាដែលមិនមានការប៉ះពាល់ធំដុំ ហើយអាចបន្តដំណើរការផលិតកម្ម ឬអាជីវកម្មរបស់ខ្លួនបានដូចជាធម្មតា គឺក្រសួងរ៉ែ និងថាមពលតម្រូវឱ្យបង់ថ្លៃអគ្គិសនីធម្មតាដូចមុន។ ដោយឡែក ចំពោះទីតាំងអាជីវកម្មណាដែលមានបរិយាកាសអំណោយផលអាចបង្កើនសកម្មភាពផលិតកម្ម ឬ អាជីវកម្មរបស់ខ្លួនដើម្បីជួយទប់ការថយចុះនៃសេដ្ឋកិច្ចកម្ពុជាដោយសារតែវិបត្តិជំងឺកូវីដ១៩ គឺរដ្ឋាភិបាលនឹងផ្តល់ការលើកទឹកចិត្តដោយបន្ថយថ្លៃអគ្គិសនីចំនួន២៥%លើការបង់ថ្លៃអគ្គិសនីដែលបានប្រើលើសពីចំនួនប្រើប្រចាំខែមធ្យមក្នុងរយៈពេល៣ខែដើមឆ្នាំ២០២០នេះ។ នេះបើតាមសេចក្តីប្រកាសរបស់ក្រសួងរ៉ែ និងថាមពល។
ចំពោះការសម្រេចរបស់រដ្ឋាភិបាលកម្ពុជានេះ លោកកាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជា ហៅកាត់ថា GMAC បានលើកឡើងថា ថ្លៃអគ្គិសនីមិនមែនជាខ្ទង់ចំណាយសំខាន់ ដូចជាថ្លៃ កម្លាំងពលកម្មឡើយ។ ប៉ុន្តែនៅក្នុងស្ថានភាពសេដ្ឋកិច្ចដ៏លំបាកនេះ ប្រាក់មួយសេន ឬមួយដុល្លារដែលអាចសន្សំបាន គឺចាំបាច់ខ្លាំងណាស់សម្រាប់វិស័យឯកជន ដើម្បីបន្តជីវិតរស់។ បើទោះបីលើកឡើងបែបនេះ ប៉ុន្តែលោកកាំង ម៉ូនីកា ក៏បានសម្តែងការអរគុណដល់រដ្ឋាភិបាលដែលបានយកចិត្តទុកដាក់ និង ខិតខំជួយដល់វិស័យឯកជន។ បើតាមលោកកាំង ម៉ូនីកា សមាគមរោងចក្រកាត់ដេរកម្ពុជាក៏បានស្នើសុំឥណទានរយៈពេល៣ខែផងដែរពីរដ្ឋាភិបាលកម្ពុជាសម្រាប់រោងចក្រកាត់ដេរប្រើប្រាស់ ដើម្បីជួយដល់ពួកគេដោះស្រាយបញ្ហាលំហូរសាច់ប្រាក់។
សូមបញ្ជាក់ថា នៅក្នុងវិស័យវាយនភណ្ឌ គិតមកដល់ពេលនេះ មានរោងចក្រជាង៣៣០រោងចក្រហើយបានព្យួរការងារ។ ក្នុងនោះ រោងចក្រជាង១០០បានបញ្ចប់នូវការព្យួរការងារ ហើយបន្តចង្វាក់ផលិតកម្មរបស់ខ្លួនឡើងវិញ។ ជារួមទៅ គឺនៅសល់រោងចក្រចំនួន២៣៧រោងចក្រកំពុងព្យួរការងារដែលប៉ះពាល់ដល់កម្មករ កម្មការិនីចំនួនជាង១១ម៉ឺននាក់។ ចំណែក រោងចក្រដែលបានបិទទ្វារតាមនីតិវិធីត្រឹមត្រូវវិញ គឺមានចំនួនជាង២០រោងចក្រ ខណៈជាង៣០រោងចក្រទៀតកំពុងដំណើរការទ្វារផងដែរ។ នេះបើតាមក្រសួងការងារកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ