អ្នកជំនាញក្នុងវិស័យទេសចរណ៍រំពឹងថា សកម្មភាពទេសចរណ៍កម្ពុជានឹងមានសកម្មភាពឡើងវិញក្នុងរយៈពេល៦ខែទៀត
ក្រុមអ្នកជំនាញក្នុងវិស័យទេសចរណ៍កម្ពុជារំពឹងថា ទេសចរណ៍កម្ពុជា នឹងមានសកម្មភាពឡើងវិញ ក្នុងរយៈពេល៦ខែទៀត។ ក្តីរំពឹងនេះ គឺបន្ទាប់ពីរដ្ឋាភិបាលកម្ពុជា ទើបតែបានសម្រេចនិរាករណ៍បម្រាមហាមឃាត់ការធ្វើដំណើររបស់ជនបរទេសមកពី៦ប្រទេស មិនឱ្យចូលមកកម្ពុជាវិញ និងស្របពេលដែលក្រសួងទេសចរណ៍ បានចេញសេចក្តីអំពាវនាវដល់ម្ចាស់សណ្ឋាគារ និងផ្ទះសំណាក់ ឲ្យយកឱកាសកូវីដ ១៩នេះ កែលម្អគុណភាព ដើម្បីត្រៀមខ្លួន ក្រោយពីចប់វិបត្តិនៃជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:០៧
វិបត្តិកូវីដ១៩ បានធ្វើឲ្យប៉ះពាល់ដល់វិស័យទេសចរណ៍កម្ពុជាយ៉ាងធ្ងន់ធ្ងរ។ បើតាមអ្នកជំនាញ ក្នុងរយៈពេលមួយខែចុងក្រោយនេះ គឺស្ទើតែគ្មានភ្ញៀវទេសចរណ៍បរទេសមកទស្សនាកម្ពុជានោះទេ។ យ៉ាងណាក្តី លោក អាង គឹមអៀង អ្នកជំនាញផ្នែកទេសចរណ៍ជើងចាស់ម្នាក់បានរំពឹងថា វិស័យទេសចរណ៍កម្ពុជា នឹងមានសកម្មភាពឡើងវិញ ក្នុងរយៈពេលយ៉ាងយ៉ូ០៦ខែទៀត។ ប៉ុន្តែ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាវិញបានព្យាករណ៍ថា យ៉ាងហោចណាស់ គេត្រូវការពេលវេលាពី៣ទៅ៤ឆ្នាំ ដើម្បីស្តារវិស័យទេសចរណ៍កម្ពុជា ឲ្យវិលមករកប្រក្រតីភាពឡើងវិញបាន។
ក្តីរំពឹងនេះ គឺបន្ទាប់ពីរដ្ឋាភិបាលកម្ពុជា ទើបតែបានសម្រេចនិរាករណ៍បម្រាមហាមឃាត់ការធ្វើដំណើររបស់ជនបរទេសមកពី៦ប្រទេស ចាប់ពីថ្ងៃទី ២០ ឧសភា តទៅ។ ក្នុងនោះ រួមមានប្រទេស អ៊ីរ៉ង់ អ៊ីតាលី អាល្លឺម៉ង់ អេស្ប៉ាញ បារាំង និងអាមេរិក ជាដើម។ បន្ថែមលើនេះ ក្រសួងសុខាភិបាលកម្ពុជា ក៏បានចាប់ផ្តើមបើកឲ្យភ្ញៀវទេសចរណ៍ជាតិ និងអន្តរជាតិ ចូលទស្សនានៅតាមសារមន្ទីរជាតិនានា ចាប់ពីខែមិថុនាខាងមុខនេះតទៅ។ ប៉ុន្តែទោះជាយ៉ាងនេះក្តី ការស្តារឡើងវិញ នូវវិស័យទេសចរណ៍កម្ពុជា គឺមិនអាចធ្វើឡើងក្នុងរយៈពេលខ្លីបាននោះទេ។
គួរជំរាបជូនថា វិបត្តិកូវីដ១៩ បានធ្វើឲ្យប៉ះពាល់ដល់វិស័យទេសចរណ៍កម្ពុជាយ៉ាងធ្ងន់ធ្ងរ ពិសេសនៅក្នុងអំឡុងខែមេសាកន្លងទៅនេះ។ បើយោងតាមរបាយការណ៍របស់ក្រសួងទេសចរណ៍ គិតត្រឹមរយៈពេល៣ខែ នៃឆ្នាំ២០២០នេះ កម្ពុជាបានទទួលភ្ញៀវទេសចរណ៍បរទេសប្រមាណប្រមាណជា១លាន១សែននាក់ (១១៥៥២២៦) ដែលក្នុងនោះ ភ្ញៀវទេសចរណ៍ចិននៅតែឈរលេខ១ បន្ទាប់មក គឺភ្ញៀវទេសចរណ៍ថៃ និងវៀតណាម។ ប៉ុន្តែបើតាមការបញ្ជាក់បន្ថែមពី តុប សុភ័ក អ្នកនាំពាក្យក្រសួងទេសចរណ៍បានពន្យល់ថា ចំនួនទេសចរណ៍បរទេសជាង១លាននាក់នេះ គឺភាគច្រើនបានធ្វើដំណើរចូលមកកម្ពុជានៅអំឡុងខែមករា និងខែកុម្ភៈ គឺមុនពេលដែលជំងឺកូវីដ១៩ បានវាយលុកខ្លាំង។ បើតាមលោក តុប សុភ័ក បើទោះបីជាកម្ពុជាលើកបំរាមខ្លះឲ្យជនបរទេសធ្វើដំណើរចូលមកកម្ពុជាបានវិញក្តី ក៏ប៉ុន្តែមិនមែនមានន័យថា ភ្ញៀវទេសចរណ៍បរទេសនឹងចាប់ផ្តើមដើរកំសាន្តភ្លាមៗវិញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ